1 Petro 2:1-25
2 Ngauralo, laṱani vhuvhi hoṱhe, vhufhura, muhoyo, vivho na zwitshele zwoṱhe.
2 Sa vhushie vhune ha kha ḓi bva u bebwa, ṱahulelani u tama mafhi a songo vanganywaho a ipfi, uri ni aluwe ngao ni tshidzwe,
3 ngauri no no thetshela uri Murena u na vhuthu.
4 Samusi no ḓa khae, ene tombo ḽi tshilaho ḽo laṱwaho nga vhathu, fhedzi ḽo nangwaho nga Mudzimu na u vha ḽa ndeme khae,
5 inwi vhaṋe ni nga matombo a tshilaho, ni khou fhaṱwa nḓuni ya lwa muya uri ni vhe vhotshifhe vhakhethwa, uri ni ṋekedze zwiṱhavhelo zwa lwa muya zwi ṱanganedzwaho nga Mudzimu a tshi shumisa Yesu Kristo.
6 Ngauri kha Luṅwalo hu pfi: “Ndi vhea tombo ḽo nangwaho Tsioni, thikho ya ndeme ya mutheo; huno ane a vha na lutendo khaḽo ha nga ḓo vhuya a farwa nga ṱhoni.”
7 Nga zwenezwo, ndi wa ndeme kha inwi, ngauri ni vhatendi; fhedzi kha vha sa tendi, “ḽeneḽo tombo ḽe vhafhaṱi vha ḽi laṱa ḽo mbo ḓi vha thikho ya tshifhaṱo,”
8 na “tombo ḽi khukhulaho ḽine ḽa ḓo vha khukhula.” Vha khukhulwa ngauri a vha thetshelesi ipfi. Vha ḓo ṱangana na zwenezwo mafheleloni.
9 Fhedzi inwi ni “lushaka lwo nangwaho, vhotshifhe vha vhuhosini, lushaka lukhethwa, vhathu vho khetheaho, uri ni ḓivhadze huṅwe na huṅwe nga ha vhugala” ha we a ni vhidza ni swiswini a ni ṱanganedza tshedzani tshawe tshi mangadzaho.
10 Ngauri no vha ni si vhathu vha Mudzimu, huno zwino ni vhathu vhawe; no vha ni songo khathutshelwa, huno zwino no khathutshelwa.
11 Vhafunwa, ndi a ni kwengweledza samusi ni vhatsinda na dziṱhunḓu uri ni bvele phanḓa ni tshi iledza nyemulo dza ṋama dzine dza lwisana na vhutshilo haṋu.
12 Dzulani ni tshi ḓifara zwavhuḓi vhukati ha dzitshaka, uri musi vha tshi ni pomoka uri ni vhaitazwivhi, vha vhone mishumo yaṋu i yavhuḓi, nahone nga zwenezwo, vha rende Mudzimu nga ḓuvha ḽa u ṱola hawe.
13 Ni tshi itela Murena, ḓiṱukufhadzeni kha vhoṱhe vha re na maanḓa: hu sa londwi uri ndi khosi samusi e muhulwane
14 kana vhavhusi samusi vho rumiwa ngae uri vha pfise vhuṱungu vhaitazwivhi, na u khoḓa vhane vha ita zwivhuya.
15 Ngauri zwine Mudzimu a zwi funa ndi zwa uri nga u ita zwo lugaho, ni fhumudze vhathu vha si na ṱhalukanyo vha sa ḓivhi tshithu.
16 Samusi ni vhathu vho vhofholowaho, ni songo shumisa mbofholowo yaṋu sa tshithu tsha u ḓidzumba uri ni ite vhukhakhi, fhedzi ni i shumise sa vhalanda vha Mudzimu.
17 Hulisani vhathu vha mifuda yoṱhe, ni fune vhatendi nga inwi vhoṱhe, ni ofhe Mudzimu, ni hulise khosi.
18 Vhashumeli nga vha ḓiṱukufhadze kha vhaṋe vhavho nga nyofho yoṱhe yo fanelaho, hu si kha vhavhuḓi na vha humbulelaho fhedzi, fhedzi na kha vhane zwa konḓa u vha takadza.
19 Ngauri zwi a khoḓwa musi muthu a tshi konḓelela vhuleme na u tambudzwa zwi songo tea nga nṱhani ha u vha na luvalo lwo kunaho phanḓa ha Mudzimu.
20 Ngauri zwi vhuyedza’ni musi ni tshi konḓelela u farwa luvhi nge na ita tshivhi? Fhedzi arali ni tshi konḓelela u tambudzwa ngauri no ita zwivhuya, zwenezwi zwi takadza Mudzimu.
21 Zwi re zwone ndi uri no vhidzelwa zwone, ngauri na Kristo o tambudzelwa inwi, a ni siela tsumbo ya uri ni tevhele ṋayo dzawe nga vhuronwane.
22 Ho ngo ita tshivhi, nahone a ho ngo wanwa vhufhura mulomoni wawe.
23 Musi a tshi semiwa, ho ngo lifhedza. Musi a tshi tambudzwa, ho ngo shushedza muthu, fhedzi o ḓikumedzela kha ane a haṱula nga u luga.
24 Ndi ene we a hwala zwivhi zwashu nga muvhili wawe musi a tshi ombelwa kha danda, uri a ri vhofholole kha zwivhi zwashu na uri ri tshile ro luga. Nahone “no fhodzwa nga mbonzhe dzawe.”
25 Ngauri no vha ni tshi nga nngu dzo xelaho; huno zwino no vhuyelela kha mulisa na mulavhelesi wa vhutshilo haṋu.
