1 Petro 3:1-22
3 Nga hu fanaho, inwi vhafumakadzi, ḓiṱukufhadzeni kha vhanna vhaṋu, uri arali hu na vhane vha si thetshelese ipfi ḽa Mudzimu, vha kungee hu songo ambiwa navho, fhedzi nga vhuḓifari ha vhafumakadzi vhavho,
2 nga ṅwambo wa u vhona vhuḓifari haṋu ho kunaho khathihi na ṱhonifho yo dzikaho.
3 U ḓinakisa haṋu hu songo vha ha nga nnḓa—ha u luka mavhudzi na u ambara zwithu zwa musuku kana zwiambaro zwa maṱeleṱele—
4 fhedzi nga hu vhe ha muthu wa nga ngomu wa mbiluni ane a ḓinakisa nga tshiambaro tshi sa ṱahali tsha u vuḓa na nga vhulenda, zwine zwa vha zwa ndeme vhukuma phanḓa ha Mudzimu.
5 Ngauri yeneyi ndi yone nḓila ye vhafumakadzi vhakhethwa vha kale vhe vha vha vha tshi fulufhela Mudzimu vha ḓinakisa ngayo, vha tshi ḓiṱukufhadza kha vhanna vhavho,
6 vhunga Sara o thetshelesa Abrahamu, a mu vhidza “murena.” Huno ni vhana vhawe, tenda na bvela phanḓa ni tshi ita zwivhuya nahone ni sa ofhi.
7 Inwi vhanna, bvelani phanḓa ni tshi dzula navho nga nḓila i fanaho nga u vha na nḓivho.* Ni vha hulise sa mudzio u songo khwaṱhaho, u pwasheaho, samusi ni maḽaifa navho a vhutshilo vhune ha vha hone nga nṱhani ha vhuthu vhuhulu ha Mudzimu, uri thabelo dzaṋu dzi si thivhelwe.
8 Tsha u fhedza, noṱhe ni humbule nga nḓila i fanaho, ni pfelane vhuṱungu, ni vhe na lufuno lwa vhurathu na vhukomana, ni khathutshelane, nahone ni ḓiṱukufhadze
9 ni songo lifhedza vhuvhi nga vhuvhi kana samba nga samba. Nṱhani hazwo, fhaṱutshedzani, ngauri no vhidzelwa zwenezwi, uri ni wane phaṱhutshedzo.
10 Ngauri “naho e nnyi a funaho vhutshilo na u vhona maḓuvha avhuḓi, u tea u langa lulimi lwawe na mulomo wawe uri zwi si ambe vhufhura.
11 A ṱutshele kule na zwivhi, a ite zwivhuya; a ṱoḓe mulalo na u u tovhola.
12 Ngauri maṱo a Yehova o lavhelesa vho lugaho, na nḓevhe dzawe dzi thetshelesa zwine vha humbela; fhedzi tshifhaṱuwo tsha Yehova tsho sinyutshela vhane vha ita zwithu zwivhi.”
13 I ngoho, ndi nnyi ane a ḓo ni vhaisa arali na fhisetshela zwivhuya?
14 Fhedzi naho ni tshi nga tambula nga nṱhani ha zwivhuya, ni a takala. Naho zwo ralo, ni songo ofha zwine vha zwi ofha, nahone ni songo vhilaela.
15 Fhedzi itani uri Kristo a vhe mukhethwa mbiluni dzaṋu samusi e Murena, ni dzule no ḓiimisela u itela u ḓiimelela phanḓa ha muṅwe na muṅwe ane a ṱoḓa tshiitisi tsha fulufhelo ḽine na vha naḽo, fhedzi ni ite zwenezwo ni na muya wa u vuḓa na ṱhonifho yo dzikaho.
16 Dzulani ni na luvalo lwavhuḓi, uri kha zwiṅwe na zwiṅwe zwine vha ni pomoka zwone, vhenevho vhane vha khou ni pomoka vha shone nga nṱhani ha vhuḓifari haṋu havhuḓi sa vhatevheli vha Kristo.
17 Ngauri ndi khwine u tambula nga nṱhani ha uri ni khou ita zwivhuya, arali hu zwine Mudzimu a zwi funa, nṱhani ha u tambula ngauri ni khou ita vhuvhi.
18 Ngauri na Kristo o fa luthihi fhedzi, muthu o lugaho a tshi itela vha songo lugaho, uri a ni ise ha Mudzimu. O vhulahwa lwa ṋama, fhedzi a vuswa lwa muya.
19 Musi e kha honoho vhuimo o dovha a ya u huwelela kha mimuya i re dzhele
20 ye ya si thetshelese musi Mudzimu a tshi lindela a sa fheli mbilu misini ya Noaxe, musi gungwa ḽi tshi khou fhaṱwa, he vhathu vha si gathi, vha malo, vha tshidzwa maḓini.
21 Ndovhedzo, ine ya fanyisela zwenezwo, i khou dovha ya tshidza na inwi, (hu si nga u ṱanzwa tshika dza lwa ṋama, fhedzi ndi u humbela luvalo lwo kunaho kha Mudzimu,) nga u vuswa ha Yesu Kristo.
22 U tshanḓani tsha u ḽa tsha Mudzimu, ngauri o ya ṱaḓulu; nahone vharuṅwa na vhavhusi na vha re na maanḓa vho itwa uri vha ḓiṱukufhadze khae.
Ṱhaluso dzi re magumoni a siaṱari
^ Kana “nga u vha humbulela; nga u vha pfesesa.”
