1 Petro 4:1-19
4 Samusi Kristo o tambula ṋamani, na inwi ḓilugiseni uri ni vhe na muhumbulo u fanaho na wonoyo; ngauri muthu we a tambula ṋamani o ṱutshela zwivhi,
2 uri a tshile tshifhinga tsha vhutshilo hawe tsho salaho e ṋamani, a si tsha tshilela nyemulo dza vhathu, fhedzi a tshilele u ita zwine Mudzimu a zwi funa.
3 Ngauri no fhedza tshifhinga tsho linganaho ni tshi khou ita zwi funwaho nga dzitshaka musi ni tshi bvela phanḓa kha mishumo ya vhuḓifari vhu shonisaho, u sa kona u langa nyemulo, u nwesa, zwimima zwi sa langei, na zwimima zwa u nwesa, na u rabela midzimu ya zwifanyiso, zwine zwa vha u pfuka mulayo.
4 Vha vho mangala, ngauri a ni tsha bvela phanḓa ni tshi tshimbila navho kha yeneyi nḓila ya u ḓifara luvhi ho kalulaho, ngauralo vha vho ni amba luvhi.
5 Fhedzi vhenevha vhathu vha ḓo ḓifhindulela kha o lugelaho u haṱula vha tshilaho na vho faho.
6 Ndi ngazwo mafhungo maḓifha o dovha a ḓivhadzwa vho faho, uri vha haṱulwe nga lwa ṋama u ya nga mavhonele a vhathu, uri vha tshile u tendelana na muya u ya nga mavhonele a Mudzimu.
7 Huno vhufhelo ha zwoṱhe ho sendela. Nga zwenezwo, ivhani na muhumbulo wo tshaho, ni fhaṱuwe malugana na dzithabelo.
8 Zwa ndeme vhukuma, ni funane nga maanḓa, ngauri lufuno lu fukedza vhunzhi ha zwivhi.
9 Ni ṱanganedzane ni si na lugungulo.
10 U ya nga he muṅwe na muṅwe a wana tshifhiwa, tshi shumiseni u itela u shumelana sa vhakoma vhavhuḓi vha vhuthu vhuhulu ha Mudzimu, vhune ha sumbedzwa nga nḓila dzo fhamba-fhambanaho.
11 Arali muthu a tshi amba, nga a ambe sa ane a amba zwi tshi bva ha Mudzimu; arali muthu a tshi shumela, nga a ite nga u ralo zwi tshi ḓitika nga nungo dze a ṋewa dzone nga Mudzimu; uri nga Yesu Kristo zwoṱhe zwi rendise Mudzimu. Vhugala na maanḓa ndi zwawe lini na lini. Amen.
12 Vhafunwa, ni songo mangadzwa nga milingo mihulwane i ngaho mulilo ine na khou sedzana nayo, zwa tou nga ni khou welwa nga zwithu zwi songo ḓoweleaho.
13 Zwo fhambanaho na zwenezwo, bvelani phanḓa ni tshi takala ngauri ni khou tambula na Kristo, uri ni vhe na dakalo ḽihulu tshifhingani tsha u dzumbululwa ha vhugala hawe.
14 Arali ni tshi khou semelwa dzina ḽa Kristo, ni takale ngauri muya wa vhugala, une wa vha muya wa Mudzimu, u kha inwi.
15 Naho zwo ralo, hu songo vha na ane a tambula nge a vha muvhulahi kana mbava kana muitazwivhi, kana sa ane a dzhenelela kha mafhungo a vhaṅwe vhathu.
16 Fhedzi arali muthu a tshi tambula nge a vha Mukriste, a songo shona, fhedzi nga a bvele phanḓa a tshi renda Mudzimu nga u tshila u tendelana na ḽeneḽi dzina.
17 Ngauri ndi tshifhinga tsho vhewaho tsha uri khaṱulo i thome nga nnḓu ya Mudzimu. Huno arali i tshi thoma nga riṋe, hu ḓo vha na mvelelo dzifhio kha vhane vha si thetshelese mafhungo maḓifha a Mudzimu?
18 “Arali zwi tshi ḓo konḓela o lugaho uri a tshidzwe, hu ḓo itea mini kha a sa ofhi Mudzimu na nga muitazwivhi?”
19 Ngauralo, vhane vha khou tambulela zwine Mudzimu a zwi funa kha vha bvele phanḓa vha tshi ḓikumedza kha Musiki a fulufhedzeaho musi vha tshi khou ita zwivhuya.
