1 Petro 5:1-14
5 Nga zwenezwo, samusi ndi muhulwane u fana na inwi, ndi ṱhanzi ya u tambula ha Kristo nahone ndi na mukovhe kha vhugala vhune ha ḓo dzumbululwa, ndi kwengweledza vhahulwane vha re vhukati haṋu ndi ri:
2 Lisani sambi ḽa Mudzimu ḽine na ḽi ṱhogomela, hu si nga u tou kombetshedzwa, fhedzi nga u ḓifunela; hu si nga lufuno lwa u ṱoḓa u ḓivhuyedza nga nḓila dza vhufhura, fhedzi nga u fhisea;
3 ni songo nga ni khou vhusa vhane vha vha ifa ḽa Mudzimu, fhedzi ni vhe tsumbo kha sambi.
4 Musi mulisa muhulwane a tshi vhonala, ni ḓo wana khare i sa ṱahali ya vhugala.
5 Sa zwenezwo, inwi vhanna vhaṱuku, ḓiṱukufhadzeni kha vhanna vhahulwane. Huno noṱhe ni ḓiṱukufhadze musi ni tshi shumisana na vhaṅwe, ngauri Mudzimu u lwa na vha u ḓihudza, fhedzi u ṋea vhuthu vhuhulu vhane vha ḓiṱukufhadza.
6 Nga zwenezwo, ḓiṱukufhadzeni nga fhasi ha tshanḓa tsha maanḓa tsha Mudzimu, uri a ni hulise nga tshifhinga tsho teaho;
7 musi ni tshi khou mu hwesa mbilaelo dzaṋu dzoṱhe, ngauri u a ni ṱhogomela.
8 Dzulani no dzivhuluwa, ni fhaṱuwe. Swina ḽaṋu Diabolo u mona-mona sa ndau i vhombaho, a tshi ṱoḓa ane a nga mu mila.
9 Fhedzi ilwani nae, no khwaṱha lutendoni, ni tshi ḓivha uri vhatendi nga inwi vhoṱhe vha khou konḓelela u tambula hu fanaho shangoni ḽoṱhe.
10 Huno musi no no tambula lwa tshifhinganyana, Mudzimu wa vhuthu vhuhulu hoṱhe, we a ni vhidzela vhugalani hawe vhu sa fheli khathihi na Kristo, u ḓo ni gudisa nga ho fhelelaho, u ḓo ni khwaṱhisa, u ḓo ni ṋea maanḓa.
11 Maanḓa ndi awe lini na lini. Amen.
12 Ndi ni ṅwalela maipfi a si gathi ndi tshi shumisa Silvano, ane nda mu dzhia sa wahashu a fulufhedzeaho, uri ndi ni ṱuṱuwedze na u ni ṋea vhuṱanzi vhu bvaho mbiluni ha uri honovhu ndi vhuthu vhuhulu ha ngoho ha Mudzimu. Imani no khwaṱha khaho.
13 Ane* a vha Babele o nangwaho u fana na inwi, u a ni lumelisa, na Marko murwa wanga u a ni lumelisa.
14 Ni lumelisane nga khisi* i sumbedzaho lufuno.
Inwi noṱhe vhane na vha na vhuthihi na Kristo ni vhe na mulalo.
Ṱhaluso dzi re magumoni a siaṱari
^ Ḽisala ḽeneḽi ḽa vhushaka ḽa Lugerika ḽi ambela kha mufumakadzi nahone zwi tou vha khagala uri ḽi imela tshivhidzo tshi re Babele.
^ Yeneyo ndi nḓila ye Vhakriste vha vha vha tshi lumelisana ngayo musi vha tshi ṱangana.
