1 Timotheo 1:1-20
1 Nṋe Paulo, muapostola wa Kristo Yesu nga ndaela ya Mudzimu ane a vha mutshidzi washu na ya Kristo Yesu, fulufhelo ḽashu,
2 ndi ṅwalela Timotheo, ṅwana’nga wa vhukuma lutendoni ndi ri:
Vhuthu vhuhulu, khathutshelo na mulalo zwi bvaho ha Mudzimu Khotsi na Kristo Yesu Murena washu nga zwi vhe na iwe.
3 Vhunga ndo u ṱuṱuwedza uri u dzule Efesa musi ndi tsini na u ya Makedonia, ndi kha ḓi ralo na zwino, uri u laye vhaṅwe uri vha si funze pfunzo yo fhambanaho na ye wa funzwa,
4 kana u thetshelesa ngano dza mazwifhi na u ita ṱhoḓisiso nga ha mutevhe wa lushaka. Zwenezwo zwithu a zwi vhuyedzi tshithu, fhedzi zwi ita uri muthu a vhe na dzimbudziso nṱhani ha uri zwi mu ṋee zwithu zwi bvaho ha Mudzimu zwine zwa tshimbidzana na lutendo.
5 Vhukuma, tshipikwa tsha yeneyi ndaela ndi uri u fune nga mbilu yo kunaho na nga luvalo lwavhuḓi na nga lutendo lu si na muhoyo.
6 Nga u litsha zwenezwi vhaṅwe vho pambutshela kha mafhafhaḓo.
7 Vha ṱoḓa u vha vhagudisi vha mulayo, fhedzi a vha pfesesi zwithu zwine vha zwi amba kana zwine vha zwi amba vho khwaṱhisa.
8 Hone ri a zwi ḓivha uri mulayo ndi wavhuḓi arali u tshi shumiswa nga nḓila yo teaho
9 ri tshi ṱhogomela uri mulayo a wo ngo vhetshelwa muthu o lugaho, fhedzi wo vhetshelwa vhane vha pfuka mulayo na mashandukwa, vha sa ofhi Mudzimu na vhaitazwivhi, vha sa fulufhedzei, vhane vha nyadza zwikhethwa, vhane vha vhulaha vhokhotsi na vhane vha vhulaha vhomme kana vhaṅwe vhathu,
10 dziphombwe, vhanna vhane vha ita zwa vhudzekani na vhaṅwe vhanna, vhane vha tswa vhathu, vhadzia u zwifha, vhadzia u ana nga fhedzi, na zwoṱhe zwi lwisanaho na pfunzo i pfalaho
11 u ya nga mafhungo maḓifha a vhugala a Mudzimu o takalaho, e nda ṋewa one.
12 Ndi livhuha Kristo Yesu Murena washu, we a nṋea maanḓa na vhuḓinḓa hawe ngauri o vha a tshi ndzhia ndi tshi fulufhedzea,
13 naho ndo vha ndi tshi semana ndi mutovholi nahone ndi na vhuhali. Naho zwo ralo, ndo khathutshelwa, ngauri ndo zwi ita nga u sa ḓivha na u sa vha na lutendo.
14 Ndo wana vhuthu vhuhulu ha Murena ho andaho nda dovha nda wana lutendo na lufuno zwine zwa vha malugana na Kristo Yesu.
15 Eneo mafhungo a a fulufhedzea nahone a fanela u ṱanganedzwa nga ho fhelelaho: Kristo Yesu o ḓa shangoni uri a tshidze vhaitazwivhi. Nṋe ndi muvhi u fhira vhoṱhe.
16 Naho zwo ralo, ndo khathutshelwa uri hu sumbedzwe nga nṋe ane a vha muitazwivhi u fhira vhoṱhe uri Kristo Yesu a sumbedze u sa fhela mbilu hawe hoṱhe uri zwi vhe tsumbo kha vhane vha ḓo vha na lutendo khae vha wane vhutshilo vhu sa fheli.
17 Huno Khosi ya lini na lini, ine ya tshila nga hu sa fheli, i sa vhonali, Mudzimu e eṱhe, nga a huliswe na u ṋewa vhugala u ya nga hu sa fheli. Amen.
18 Timotheo, ṅwana’nga ndi u ṋea yeneyi ndaela, u tendelana na vhuporofita he ha dzula ho amba nga ha iwe, uri nga zwenezwi u bvele phanḓa u tshi lwa nndwa tshidele;
19 u na lutendo na luvalo lwavhuḓi, zwe vhaṅwe vha zwi laṱa, zwa ita uri lutendo lwavho lu tshinyale u fana na tshikepe tsho pwasheaho.
20 Himeneo na Alesandere ndi vhaṅwe vhavho, nahone ndo vha kumedzela Sathane* uri vha laiwe uri vha songo sema Mudzimu.
Ṱhaluso dzi re magumoni a siaṱari
^ Zwine zwa amba uri “vho bviswa tshivhidzoni.”
