1 Timotheo 2:1-15
2 Nga zwenezwo, tsha u thoma ndi a ni ṱuṱuwedza uri ni ite dzikhumbelo, dzithabelo, u humbelela vhaṅwe, na u livhuha ni tshi itela vhathu vha mifuda yoṱhe,
2 ni rabelele mahosi na vhoṱhe vha re vhuimoni ha nṱha; uri ri tshile ho dzika hu na mulalo nga u ḓikumedza tshoṱhe kha Mudzimu na u ḓiimisela hoṱhe.
3 Zwenezwi zwo luga nahone zwi a ṱanganedzea phanḓa ha Mudzimu, Mutshidzi washu,
4 ane a funa vhathu vha mifuda yoṱhe vha tshi tshidzwa nahone vha vha na nḓivho yo teaho ya ngoho.
5 Ngauri hu na Mudzimu muthihi, na mupfumedzanyi muthihi vhukati ha Mudzimu na vhathu, onoyo muthu ndi Kristo Yesu,
6 we a ḓikumedza uri a vhe tshirengululi* tsha vhoṱhe—zwenezwi ndi zwine ha fanela u ṱanzielwa nga hazwo nga tshifhinga tshazwo.
7 Ndo nangwa uri ndi vhe muhuweleli na muapostola nga nṱhani ha ndivho ya honovhu vhuṱanzi—ndi khou amba ngoho, a thi khou zwifha—uri ndi vhe mugudisi wa dzitshaka uri ndi vha funze lutendo na ngoho.
8 Ngauralo, ndi tama uri fhethu huṅwe na huṅwe vhanna vha rabele, vho imisela nṱha zwanḓa zwikhethwa, vha sa sinyuwi na u ṱaṱa khani.
9 Na vhafumakadzi ndi tama vha tshi ambara nga nḓila yo dzudzanyeaho na nga tshirunzi na u vha na muhumbulo wo tshaho, hu si nga u luka mavhudzi na u ḓinakisa nga musuku kana nga vhulungu kana nga zwiambaro zwi ḓuraho vhukuma,
10 fhedzi vha ambare nga nḓila yo fanelaho vhafumakadzi vhane vha amba uri vho ḓikumedza kha Mudzimu, nga mishumo mivhuya.
11 Mufumakadzi nga a gude o fhumula a tshi ḓiṱukufhadza nga ho fhelelaho.
12 A thi tendeli mufumakadzi a tshi funza, kana u vha na maanḓa kha munna, fhedzi u fanela u fhumula.
13 Ngauri Adamu ndi ene we a vhumbwa u thoma, ha tevhela Eva.
14 Zwiṅwe hafhu, Adamu ho ngo fhurwa, fhedzi ndi mufumakadzi o fhurwaho tshoṱhe nahone a pfuka mulayo.
15 Naho zwo ralo, mufumakadzi u ḓo tshidzwa nga u beba vhana, arali vha bvela phanḓa vha tshi sumbedza lutendo na lufuno na vhukhethwa khathihi na u vha na muhumbulo wo tshaho.
Ṱhaluso dzi re magumoni a siaṱari
^ Zwi ambela kha mutengo une wa eḓana na zwe zwa xela.
