1 Timotheo 3:1-16
3 Haya mafhungo a a fulufhedzea:
Arali munna a tshi ṱoḓa u vha mulavhelesi, u vha o tama mushumo wavhuḓi.
2 Nga zwenezwo, mulavhelesi u fanela u vha a sa solei, munna a re na mufumakadzi muthihi, ane a linganyisela, o tshaho muhumbuloni, o dzudzanyeaho, a ṱanganedzaho vhaeni, a re na vhukoni ha u funza,
3 a songo vha e tshidakwa, e mudzia-khakhathi, u fanela u humbulela, a songo vha e mudzia-dzinndwa, a songo vha e mufuni wa tshelede,
4 a vhe muthu a konaho u langa vha muṱa wawe nga nḓila yavhuḓi, vhana vhawe vha vhe vhane vha ḓiṱukufhadza na u ita zwithu nga u ḓiimisela hoṱhe;
5 (arali muthu a sa koni u langa vha muṱa wawe, tshivhidzo tsha Mudzimu u ḓo tshi ṱhogomela hani?)
6 a songo vha e muthu ane a kha ḓi bva u vha mutendi, uri a sa ḓo ḓikukumusa nahone a haṱulwa nga nḓila ye Diabolo a haṱulwa ngayo.
7 Zwiṅwe hafhu, u fanela u vha muthu ane na vha re nnḓa ha tshivhidzo vha mu amba zwavhuḓi, uri a si nyadziwe nahone a wela kha tshikwekwe tsha Diabolo.
8 Vhashumeli na vhone vha fanela u ḓiimisela, vha songo zwifha, vha songo nwesa waini, vha songo ṱoḓa u ḓivhuyedza nga nḓila dza vhupangwa,
9 vha fare tshiphiri tshikhethwa tsha lutendo nga luvalo lwo kunaho.
10 Hafhu, vha fanela u thoma vha lingwa u itela u vhona arali vha tshi fanelea, nga murahu ha zwenezwo vha shume, samusi vha tshi ḓo vha vha sa solei.
11 Vhafumakadzi na vhone vha fanela u ḓiimisela, a vho ngo fanela u vha na zwitshele, vha fanela u linganyisela, na u fulufhedzea kha zwithu zwoṱhe.
12 Mushumeli u fanela u vha munna a re na mufumakadzi muthihi, ane a langa vhana na muṱa wawe nga nḓila yavhuḓi.
13 Ngauri vhanna vhane vha shuma nga nḓila yavhuḓi vha khou ḓiitela bvumo ḽavhuḓi na u vha na mbofholowo khulwane ya u amba nga lutendo malugana na Kristo Yesu.
14 Ndi u ṅwalela zwenezwi zwithu, ndi tshi fulufhela uri ndi ḓo ḓa ha iwe hu si kale,
15 arali nda lenga, ndi uri u ḓivhe nḓila ine wa tea u ḓifara ngayo nḓuni ya Mudzimu, ine ya vha tshivhidzo tsha Mudzimu a tshilaho, phuphu na thikho ya ngoho.
16 I ngoho, tshiphiri tshikhethwa tsha honohu u ḓikumedza kha Mudzimu ndi tshihulwane vhukuma: ‘O itwa uri a vhonale nga lwa ṋama, o itwa o lugaho a tshi kha ḓi vha kha tshivhumbeo tsha muya, o vhonwa na nga vharuṅwa, ho huwelelwa nga hae kha dzitshaka, shango ḽo mu tenda, nahone o ṱanganedzwa vhugalani.’
