1 Timotheo 4:1-16
4 Naho zwo ralo, ipfi ḽo hevhedzwaho ḽo zwi amba zwavhuḓi uri tshifhingani tshi ḓaho vhaṅwe vha ḓo wa lutendoni, vha thetshelesa maipfi a vhufhura ane a nga a bva ha Mudzimu na pfunzo dza madimoni,
2 dzi ḓiswaho nga vhathu vha re na muhoyo vhane vha zwifha, vha luvalo lwo rindilaho lu fanaho na lukanda lwo fhiswaho nga tsimbi ya u swaya.
3 Vha ḓo thivhela vhathu uri vha vhinge kana vha vhingwe, vha tshi amba uri vhathu vha songo ḽa zwiḽiwa zwe Mudzimu a zwi sika uri zwi ḽiwe nga u mu livhuha nga vhane vha vha na lutendo na vhane vha ḓivha ngoho nga ho teaho.
4 Ngauri zwoṱhe zwe Mudzimu a zwi sika ndi zwavhuḓi, nahone a hu na tshine tsha fanela u landulwa arali tsho ṱanganedzwa nga ndivhuho,
5 ngauri tsho itwa tshikhethwa nga ipfi ḽa Mudzimu na nga u rabelelwa.
6 Nga u ṋea vhahashu yeneyi nyeletshedzo, iwe u ḓo vha muḓinḓa wavhuḓi wa Kristo Yesu, a fushwaho nga maipfi a lutendo na pfunzo yavhuḓi ye wa i tevhedza nga vhuronwane.
7 Fhedzi iledza ngano dza mazwifhi dzi nyadzisaho, dzi fanaho na dzine dza anetshelwa nga vhakegulu. Kha ḽiṅwe sia, ḓiḓowedze u vha na tshipikwa tsha u ḓikumedza kha Mudzimu.
8 Ngauri u ḓowedza muvhili hu vhuyedza zwiṱuku; fhedzi u ḓikumedza kha Mudzimu hu vhuyedza kha zwoṱhe, samusi hu na fulufhedziso ḽa vhutshilo ha zwino na ḽa zwa tshifhingani tshi ḓaho.
9 Eneo mafhungo a a fulufhedzea nahone a fanela u ṱanganedzwa tshoṱhe.
10 Ndi ngazwo ri tshi khou shuma nga maanḓa na u ḓidina, ngauri ro fulufhela Mudzimu a tshilaho, ane a vha Mutshidzi wa vhathu vhoṱhe, zwihuluhulu vha fulufhedzeaho.
11 Dzula u tshi vha ṋea dzenedzi ndaela na u dzi funza.
12 U songo tenda muthu a tshi u nyadza ngauri u kha ḓi vha muswa. Zwo fhambanaho na zwenezwo, ivha tsumbo yavhuḓi kha vha fulufhedzeaho nga u amba, nga vhuḓifari, nga lufuno, nga lutendo, na nga u kuna.
13 Bvela phanḓa u tshi ita vhuḓidini ha u vhalela vhaṅwe khagala, u tshi ṱuṱuwedza, u tshi funza, ndi vhuye ndi swike.
14 U songo litshelela tshifhiwa tshine wa vha natsho, tshe wa ṋewa tshone nga vhuporofita musi tshigwada tsha vhahulwane tshi tshi u vhea zwanḓa.
15 Elekanya nga zwenezwi zwithu; u ḓikumedze khazwo tshoṱhe, uri mvelaphanḓa yau i vhonwe zwavhuḓi nga vhathu vhoṱhe.
16 Ḓiṱhogomele, u dovhe u ṱhogomele na nḓila ine wa funza ngayo. Konḓelela kha zwenezwi zwithu, ngauri nga u ita zwenezwo u ḓo ḓitshidza nahone wa tshidza na vhane vha u thetshelesa.
