1 Timotheo 5:1-25
5 U songo sasaladza nga maanḓa mukalaha. Nṱhani hazwo, u mu kwengweledze vhunga khotsi, vhaṱhannga vhunga vharathu,
2 vhakegulu vhunga vhomme, vhabvana vhunga dzikhaladzi nga vhukhethwa hoṱhe.
3 Ṱhogomela tshilikadzi dzine dza shaya zwa vhukuma.
4 Arali tshilikadzi i na vhana kana vhaḓuhulu, vha fanela u thoma vha guda u ḓikumedza kha Mudzimu miṱani yavho na u lifhela vhabebi vhavho na vhomakhulu wavho zwo vha fanelaho, ngauri zwenezwi ndi zwine zwa ṱanganedzea phanḓa ha Mudzimu.
5 Huno tshilikadzi ine ya shaya i si na ane a i ṱhogomela, yo fulufhela Mudzimu nahone i bvela phanḓa i tshi humbela vhusiku na masiari.
6 Fhedzi tshilikadzi ine ya ḓiṋekedza kha u fusha ṋama yo fa naho i tshi khou tshila.
7 Nga zwenezwo, bvela phanḓa u tshi ṋea dzenedzi ndaela, uri tshilikadzi dzi si solisee.
8 Zwi re zwone ndi uri arali muthu a sa ṱhogomeli vhahawe,* zwihuluhulu miraḓo ya muṱa wawe, o landula lutendo nahone ndi muvhi u fhira muthu a si na lutendo.
9 Tshilikadzi nga i ṅwalwe kha mutevhe wa vha thuswaho musi yo no vha na miṅwaha ya furathi (60), i vhe mufumakadzi o fulufhedzeaho kha munna wawe,*
10 i na bvumo ḽa u ita mishumo mivhuya, i ngaho sa u alusa vhana zwavhuḓi, u ṱanganedza vhaeni, u ṱanzwa milenzhe ya vhakhethwa, u thusa vha re maṱunguni, u ḓikumedza kha mishumo mivhuya yoṱhe.
11 Kha ḽiṅwe sia, u songo ṅwala tshilikadzi dzine dza kha ḓi vha vhaswa, ngauri lutamo lwa zwa vhudzekani lune lwa ita uri vha ṱoḓe u vhingwa lu ḓo thithisa u shumela havho Kristo.
12 Vha ḓo haṱulwa ngauri vho ṱutshela zwe vha zwi fulufhedzisa u thomani.
13 Vha dovha vha vha na mukhwa wa u sa shuma tshithu, vha tshi sokou tshimbila-tshimbila na miḓi; a vha iti zwenezwo fhedzi, fhedzi vha dovha vha ita zwitshele na u ḓidzhenisa kha mafhungo a vhaṅwe vhathu, vha tshi amba na zwithu zwine vha si fanele u zwi amba.
14 Ngauralo, ndi tama uri tshilikadzi dzine dza kha ḓi vha vhaswa dzi vhingwe, dzi vhe na vhana, dzi ṱhogomele zwa muṱani, uri dzi si ṋee mupikisi tshibuli tsha u ri amba luvhi.
15 Zwi re zwone ndi uri vhaṅwe vho no ḓi pambuwa vha tevhela Sathane.
16 Arali mufumakadzi ane a vha mutendi e na mashaka a dzitshilikadzi, kha a thuse, uri tshivhidzo tshi si lemedzwe. Nga zwenezwo, tshivhidzo tshi ḓo kona u thusa tshilikadzi dzi shayaho zwa vhukuma.
17 Vhahulwane vhane vha ranga phanḓa nga nḓila yavhuḓi vha fanela u ṱhonifhiwa zwihulu, zwihuluhulu vhane vha shuma nga maanḓa kha u amba na u gudisa.
18 Ngauri luṅwalo lu ri: “U songo vhofha phulu mulomo musi i tshi khou fhula thoro”; na uri: “Mushumi u fanela u ṋewa malamba awe.”
19 U songo tenda muhulwane a tshi hwelelwa, arali hu si na ṱhanzi mbili kana tharu.
20 Vhathu vhane vha ita zwivhi u vha kaidze phanḓa ha vhoṱhe, uri zwi vhe tsevho kha vhoṱhe.
21 Ndi a u laya nga ho khwaṱhaho phanḓa ha Mudzimu na Kristo Yesu na nga vharuṅwa vho nangwaho uri u tevhedze dzenedzi ndaela u si na luvhengelambiluni kana tshiṱalula.
22 U songo ṱavhanya wa vhea muthu naho e ufhio zwanḓa; u songo ṱanganela kha zwivhi zwa vhaṅwe; u dzule wo kuna.
23 U songo tsha nwa maḓi fhedzi, fhedzi u nwe na waininyana nga nṱhani ha uri u a vhaisala thumbuni na u dzulela u lwala.
24 Zwivhi zwa vhaṅwe vhathu zwi a ḓivhiwa khagala, zwa ita uri vha haṱulwe, fhedzi zwa vhaṅwe vhathu zwi vhonala nga murahu.
25 Nga nḓila i fanaho, na mishumo yavhuḓi ine ya ḓivhiwa khagala na miṅwe mishumo yavhuḓi i sa ḓivhiwi khagala i ḓo vhonala.
Ṱhaluso dzi re magumoni a siaṱari
^ Kana “vhane a vha na vhuḓifhinduleli ha u vha ṱhogomela.”
^ Ṱhalutshedzelo ya ipfi nga ipfi i ri “mufumakadzi wa munna muthihi.”
