1 Timotheo 6:1-21
6 Vha re nga fhasi ha dzhogo ya vhupuli, vha dzule vha tshi dzhia vhaṋe vhavho vhe vho fanelwaho nga u huliswa vhukuma, uri dzina ḽa Mudzimu na pfunzo dzawe zwi si ambiwe luvhi.
2 Zwiṅwe hafhu, vhane vha vha na vhaṋe vha re vhatendi vha songo vha nyadza, ngauri ndi vhatendi ngavho. Vha fanela u ita zwo fhambanaho na zwenezwo, vha vha shumele vho ḓiimisela vhukuma, ngauri vhane vha wana malamba a tshumelo yavho yavhuḓi ndi vhatendi nahone vha a funwa.
Dzula u tshi gudisa zwenezwi zwithu na u ṋea dzenedzi ṱhuṱhuwedzo.
3 Arali hu na muthu naho e ufhio ane a gudisa dziṅwe pfunzo dzi sa tendelani na pfunzo dzi pfalaho, dzi bvaho ha Murena washu Yesu Kristo kana pfunzo dzi tendelanaho na u ḓikumedza kha Mudzimu,
4 u a ḓikukumusa nahone ha pfesesi tshithu. U dzula a tshi hanedza na u ṱaṱa khani nga ha maipfi. Zwenezwi zwithu zwi ita uri hu vhe na vivho, dzinndwa, maṱamba, na u humbulelana vhuvhi,
5 na u dzulela u hanedzana nga ha mafhungo a si a ndeme nga vhathu vho tshinyalaho muhumbuloni na vha sa pfesesi ngoho, vhane vha humbula uri u ḓikumedza kha Mudzimu ndi nḓila ya u ḓivhuyedza.
6 Ndi ngoho uri u ḓikumedza kha Mudzimu zwi a vhuyedza vhukuma arali ri tshi fushea nga zwine ra vha nazwo.
7 Ngauri a ro ngo ḓa na tshithu fhano shangoni, na musi ri tshi fa a ri nga ṱuwi na tshithu.
8 Ngauralo, arali ri na zwiḽiwa na zwa u fuka, nga ri fushee nga zwenezwo zwithu.
9 Naho zwo ralo, vho ḓiimiselaho u pfuma vha wela milingoni na tshikwekweni na nyemuloni nnzhi dza vhutsilu dzi huvhadzaho dzine dza ita uri vhathu vha fheliswe.
10 Ngauri mudzi wa zwithu zwoṱhe zwivhi ndi u funesa tshelede, nahone nga u ṱahulela lwonolwo lufuno vhaṅwe vho ṱutshela lutendo, vha ḓipfisa vhuṱungu vhunzhi zwa tou nga vho tou ḓiṱhavhekanya.
11 Naho zwo ralo, iwe muthu wa Mudzimu, shavha zwenezwi zwithu. Fhedzi u tovhole u luga, u ḓikumedza kha Mudzimu, lutendo, lufuno, u konḓelela na u vuḓa.
12 Ilwa nndwa yavhuḓi ya lutendo, u farelele wo khwaṱha kha vhutshilo vhu sa fheli he wa vhidzelwa hone nahone wa ṋekedza vhuṱanzi havhuḓi khagala phanḓa ha ṱhanzi nnzhi.
13 Phanḓa ha Mudzimu, ane a ita uri zwithu zwoṱhe zwi tshile, na phanḓa ha Kristo Yesu, we a ṋekedza vhuṱanzi havhuḓi khagala phanḓa ha Pontio Pilato, ndi a u laya
14 uri u tevhedze ndaela nga nḓila i si na tshilavhi, i sa solisei u swikela hu tshi vhonala Murena washu Yesu Kristo.
15 Murena wa Maanḓa o takalaho ane a vha ene e eṱhe u ḓo ḓivhonadza nga zwifhinga zwo vhewaho, ane a vha Khosi ya vhane vha vhusa sa mahosi na u vha Murena wa vhane vha vhusa sa marena,
16 ene e eṱhe ane a si fe, ane a dzula tshedzani tshi sa swikelelei, a sa athu vhonwa nga muthu kana hu si vhe ane a nga mu vhona. Nga a huliswe na u vha na maanḓa a sa fheli. Amen.
17 Laya vho pfumaho kha ano maitele a zwithu uri vha si ḓikukumuse, uri vha si fulufhele lupfumo lu si na vhungoho, fhedzi vha fulufhele Mudzimu, ane a ri pfumisa nga zwoṱhe zwine ra ḓiphina ngazwo.
18 U vha vhudze uri vha ite zwivhuya, vha pfume kha mishumo yavhuḓi, vha vhe na mafunda, vha ḓiimisele u kovhela vhaṅwe,
19 nga zwenezwo, vha ḓikuvhanganyele lupfumo lune lwa vha mutheo wavhuḓi une vha ḓo fhaṱa khawo vhumatshelo, uri vha farelele vho khwaṱha vhutshilo ha vhukuma.
20 Timotheo, tsireledza zwe wa ṋewa zwone, u furalele zwiambo zwi sa ḓivhalei zwine zwa tshinya zwithu zwikhethwa na “nḓivho” ya mazwifhi ine ya itiswa nga zwiambo zwine zwa lwisana na ngoho.
21 Nga u ṱongisa yeneyo nḓivho vhaṅwe vho ṱutshela lutendo.
Vhuthu vhuhulu ha Mudzimu nga vhu vhe na inwi.
