1 Vhakorinta 1:1-31
1 Nṋe Paulo, ndo vhidzwa uri ndi vhe muapostola wa Yesu Kristo nge Mudzimu a vha a tshi zwi funa, na wahashu Sostene
2 ndi ṅwalela tshivhidzo tsha Mudzimu tshi re Korinta, inwi vhe na itwa vhakhethwa uri ni vhe na vhuthihi na Kristo Yesu, no vhidzwa uri ni vhe vhakhethwa, khathihi na vhoṱhe vhane hoṱhe vha vhidzelela dzina ḽa Murena washu, Yesu Kristo, a re Murena wavho na washu:
3 Ni vhe na vhuthu vhuhulu na mulalo zwi bvaho ha Mudzimu Khotsi ashu na Murena Yesu Kristo.
4 Ndi dzula ndi tshi livhuha Mudzimu ndi tshi itela inwi nga nṱhani ha vhuthu vhuhulu he Mudzimu a ni ṋea hone nga Kristo Yesu;
5 ngauri no pfumiswa kha zwoṱhe, kha vhukoni ha u amba na kha nḓivho yo fhelelaho,
6 na vhuṱanzi malugana na Kristo ho ṋekedzwa nga ho khwaṱhaho vhukati haṋu,
7 uri ni si shaye tshifhiwa naho tshi tshifhio, musi no lindela nga maṱo matswuku u dzumbululwa ha Murena washu Yesu Kristo.
8 U ḓo dovha a ni khwaṱhisa u swika vhufheloni, uri ni si vhe na mulandu nga ḓuvha ḽa Murena washu Yesu Kristo.
9 Mudzimu we a ni vhidza uri ni vhe na vhukonani na Murwa wawe Yesu Kristo Murena washu u a fulufhedzea.
10 Zwino ndi a ni ṱuṱuwedza vhahashu, nga dzina ḽa Murena washu Yesu Kristo uri noṱhe ni tea u tendelana musi ni tshi amba, na uri a ho ngo tea u vha na dziphambano vhukati haṋu, fhedzi ni vhe vhathihi nga ho fhelelaho ni na muhumbulo muthihi na kuhumbulele kuthihi.
11 Vhahashu, ndi ngauri vhaṅwe vha muṱani wa Kloe vho nnḓivhadza malugana na inwi, uri hu na dziphambano vhukati haṋu.
12 Zwine nda khou amba zwone ndi zwa uri, muṅwe na muṅwe kha inwi u ri: “Nṋe ndi wa Paulo,” muṅwe a ri: “Nṋe ndi wa Apolo,” muṅwe a ri: “Nṋe ndi wa Kefa,” muṅwe a ri: “Nṋe ndi wa Kristo.”
13 Kristo o fhandekana. Naa Paulo o vhuya a ombelwa kha danda a tshi itela inwi? Kana naa no lovhedzwa dzinani ḽa Paulo?
14 Ndi a livhuha uri a tho ngo lovhedza na muthihi waṋu nga nnḓa ha Krisipo na Gayo,
15 uri hu si vhe na muthihi kha inwi ane a amba uri o lovhedzwa dzinani ḽanga.
16 Vhukuma, ndo dovha nda lovhedza vha muṱa wa Stefanasi. A thi tsha ḓivha arali hu na vhaṅwe vhe nda vha lovhedza.
17 Ngauri Kristo ho ngo nthuma uri ndi lovhedze, fhedzi o nthuma uri ndi ḓivhadze mafhungo maḓifha, hu si nga vhuṱali ha u kona u amba, uri zwi si nge danda ḽa tshengedzo ḽa Kristo a ḽo ngo shuma tshithu.
18 Ngauri u amba nga ha danda ḽa tshengedzo ndi vhutsilu kha vhane vha ḓo fheliswa, fhedzi kha riṋe vhane ra ḓo tshidzwa ndi maanḓa a Mudzimu.
19 Ngauri ho ṅwalwa u pfi: “Ndi ḓo ita uri vhuṱali ha vho ṱalifhaho vhu fhele, na ṱhalukanyo ya vha re na maano ndi ḓo i hana.”
20 Muṱali u ngafhi? U ngafhi wa maṅwalo? U ngafhi mudzia u ṱaṱa khani wa ano maitele a zwithu? Naa Mudzimu ho ngo ita uri vhuṱali ha ḽino shango vhu vhe vhutsilu?
21 Ngauri u ya nga vhuṱali ha Mudzimu, shango a ḽo ngo ḓivha Mudzimu nga vhuṱali haḽo, Mudzimu o takalela u tshidza vhe vha tenda nga vhutsilu he ha ḓivhadzwa.
22 Vhayuda vha ṱoḓa vhuṱolo nahone Vhagerika vha ṱoḓa vhuṱali;
23 fhedzi ri huwelela nga ha Kristo o ombelwaho kha danda, ane kha Vhayuda a vha tshikhukhulisi, fhedzi kha dzitshaka ndi vhutsilu;
24 naho zwo ralo, kha vho vhidzwaho, Vhayuda na Vhagerika, Kristo ndi maanḓa a Mudzimu na vhuṱali ha Mudzimu.
25 Ngauri tshithu tsho tsilufhalaho tshi bvaho ha Mudzimu tsho ṱalifha u fhira vhathu, nahone tshithu tshi si na nungo tshi bvaho ha Mudzimu tshi na maanḓa a fhiraho a vhathu.
26 Ngauri ni a zwi vhona uri vhukati ha inwi no vhidzwaho, vhahashu, a si vhanzhi vho ṱalifhaho nga lwa ṋama, a si vhanzhi vha re na maanḓa, a si vhanzhi vha re vhakololo;
27 fhedzi Mudzimu o nanga zwithu zwo tsilufhalaho zwa shango uri a shonise vhaṱali; nahone Mudzimu o nanga zwi si na nungo zwa shango uri a shonise zwi re na maanḓa;
28 nahone Mudzimu o nanga zwithu zwi nyadzeaho zwa shango na zwithu zwi dzhielwaho fhasi, na zwine zwa dzhiiwa zwi si tshithu uri hu fheliswe zwine zwa dzhielwa nṱha,
29 uri hu si vhe na vhathu vhane vha zuwa phanḓa ha Mudzimu.
30 Fhedzi ndi nga nṱhani hawe uri ni vhe na vhuthihi na Kristo Yesu, we a vha vhuṱali vhu bvaho ha Mudzimu kha riṋe, khathihi na u luga, vhukhethwa, na u vhofhololwa nga tshirengululi;
31 uri zwi vhe nga nḓila ye zwa ṅwalwa ngayo ha pfi: “Ane a zuwa, nga a zuwe nga Yehova.”
