1 Vhakorinta 10:1-33
10 Vhahashu, ndi ṱoḓa ni tshi ḓivha uri vhomakhulukuku washu vhoṱhe vho vha vhe nga fhasi ha gole nahone vhoṱhe vho wela lwanzhe,
2 vhoṱhe vho lovhedzwa sa vhatevheli vha Mushe musi vhe nga fhasi ha gole na musi vhe lwanzheni,
3 vhoṱhe vho ḽa zwiḽiwa zwi fanaho zwi bvaho ha Mudzimu,
4 vhoṱhe vho nwa maḓi a bvaho ha Mudzimu. Ngauri vho vha vho ḓowela u nwa maḓi a bvaho kha tombo ḽe ḽa vha ḽi tshi nga ḽi khou vha tevhela, ḽeneḽo tombo ḽo vha ḽi tshi bva ha Mudzimu, nahone ḽo vha ḽi tshi imela Kristo.
5 Naho zwo ralo, vhunzhi havho Mudzimu ho ngo vha takalela, ndi ngazwo vho vhulahwa sogani.
6 Huno zwenezwo zwithu zwo vha tsumbo kha riṋe, uri ri si emule zwithu zwivhi, samusi vho zwi emula.
7 Ni songo rabela midzimu ya zwifanyiso, u fana na zwe vhaṅwe vhavho vha zwi ita; samusi ho ṅwalwa ha pfi: “Vhathu vho dzula fhasi vha ḽa na u nwa, vha takuwa vha ḓiphina.”
8 Ri songo ita vhupombwe, samusi vhaṅwe vhavho vho ita vhupombwe, ha fa vha zwigidi zwa fumbili-raru (23 000) nga ḓuvha ḽithihi.
9 Ri songo linga Yehova, samusi vhaṅwe vhavho vho mu linga, vha lumiwa nga dziṋowa vha fa.
10 Ni songo gungula, samusi vhaṅwe vhavho vho gungula, vha vhulahwa nga mulozwi.
11 Huno zwenezwo zwithu zwo itea khavho uri zwi vhe tsumbo, zwo ṅwalwa uri zwi ri sevhe riṋe vhane ra khou tshila vhufheloni ha maitele a zwithu.
12 Nga nṱhani ha zwenezwo, ane a humbula uri o ima a ṱhogomele a sa ḓo wa.
13 A hu na mulingo une na khou ṱangana nawo we vhaṅwe vha si sedzane nawo. Fhedzi Mudzimu u a fulufhedzea, ha nga ḓo tenda ni tshi lingwa lune na sa ḓo kona u konḓelela, fhedzi musi ni tshi lingwa u ḓo dovha a ni vulela nḓila ine na ḓo bva ngayo uri ni kone u konḓelela.
14 Ngauralo vhafunwa, shavhelani kule ha midzimu ya zwifanyiso.
15 Ndi amba sa ane a amba na vhathu vha re na ṱhalukanyo; ḓiiteleni phetho nga ha zwine nda zwi amba.
16 Tshinwelo tsha phaṱhutshedzo tshine ra tshi rabelela, naa a si tsha uri ri vhuyelwe nga malofha a Kristo? Tshinkwa tshine ra tshi ṅwata, naa a si u ṱanganela kha muvhili wa Kristo?
17 Ngauri hu na tshinkwa tshithihi, naho ri vhanzhi, ri muvhili muthihi, ngauri roṱhe ri khou ḽa tshenetsho tshinkwa tshithihi.
18 Vhonani Vhaisiraele vha ṋama: Naa vhane vha ḽa zwiṱhavhelo a si vhone vhane vha ṱanganela aletareni?
19 Ngauralo, ndi ḓo ri mini? Naa zwine zwa ṋekedzwa midzimu ya zwifanyiso ndi zwa ndeme, kana midzimu ya zwifanyiso ndi ya ndeme?
20 Hai; fhedzi ndi ri zwithu zwine tshaka dza zwi ṋekedza, dzi khou zwi ṋekedza madimoni, hu si Mudzimu; nahone a thi ṱoḓi ni tshi ṱanganela na madimoni.
21 Ni nga si kone u nwa tshinwelo tsha Yehova na tsha madimoni; ni nga si kone u ḽa “ṱafulani ḽa Yehova” na ṱafulani ḽa madimoni.
22 Kana “naa ri khou sinyusa Yehova”?* Naa ri na maanḓa ane a mu fhira?
23 Zwithu zwoṱhe zwo tendelwa; fhedzi a si zwithu zwoṱhe zwi vhuyedzaho. Zwithu zwoṱhe zwo tendelwa nga mulayo; fhedzi a si zwithu zwoṱhe zwine zwa fhaṱa.
24 Muṅwe na muṅwe nga a ṱoḓe zwine zwa vhuyedza muṅwe, hu si zwine zwa vhuyedza ene muṋe fhedzi.
25 U nga bvela phanḓa u tshi ḽa tshiṅwe na tshiṅwe tshine tsha rengiswa fhethu hu rengiswaho ṋama, u songo vhudzisesa nga nṱhani ha luvalo lwau;
26 ngauri “ḽifhasi ndi ḽa Yehova na zwithu zwo ḓalaho khaḽo.”
27 Arali muṅwe wa vhane vha si vhe vhatendi a ni ramba nahone na tama u ya, ni ḽe tshiṅwe na tshiṅwe tshine na ḓo ṋewa tshone, ni songo vhudzisesa nga nṱhani ha luvalo lwaṋu.
28 Fhedzi arali muṅwe muthu a ni vhudza uri: “Hezwi ndi zwa tshiṱhavhelo,” ni songo ḽa ni tshi itela muthu we a ni vhudza, uri hu si vhe na ane a dinwa nga luvalo lwawe.
29 A thi khou amba luvalo lwau, fhedzi ndi khou amba lwa muṅwe muthu. Ndi ngani u vha hanga na mbofholowo hu tshi fanela u haṱulwa nga luvalo lwa muṅwe?
30 Arali ndi tshi ḽa ndi tshi livhuha, ndi ngani ndi tshi ambiwa luvhi nga zwe nda zwi livhuha?
31 Nga zwenezwo, musi ni tshi ḽa, ni tshi nwa, kana ni tshi ita naho tshi tshini, ni ite zwoṱhe uri ni rendise Mudzimu.
32 Ni songo khukhulisa Vhayuda khathihi na Vhagerika na tshivhidzo tsha Mudzimu,
33 samusi ndi tshi takadza vhathu vhoṱhe nga zwithu zwoṱhe, ndi sa ṱoḓi u ḓivhuyedza, fhedzi ndi tshi ṱoḓa u vhuyedza vhanzhi, uri vha tshidzwe.
Ṱhaluso dzi re magumoni a siaṱari
^ Zwine zwa amba “u sinyusa Yehova nga u sa gwadamela ene e eṱhe.”
