1 Vhakorinta 11:1-34
11 Ivhani vha edzisaho nṋe, samusi na nṋe ndi tshi edzisa Kristo.
2 Huno ndi a ni khoḓa ngauri no nkhumbula kha zwithu zwoṱhe na uri ni khou tevhedza zwenezwo zwithu u ya nga nḓila ye nda ni ṋea ngayo.
3 Fhedzi ndi ṱoḓa ni tshi ḓivha uri ṱhoho ya munna muṅwe na muṅwe ndi Kristo; na uri ṱhoho ya mufumakadzi ndi munna; na uri ṱhoho ya Kristo ndi Mudzimu.
4 Munna muṅwe na muṅwe ane a rabela kana u porofita o fukedza ṱhoho u nyadzisa ṱhoho yawe;
5 fhedzi mufumakadzi muṅwe na muṅwe ane a rabela kana u porofita a songo fukedza ṱhoho u nyadzisa ṱhoho yawe, ngauri u fana na mufumakadzi o vheulwaho ṱhoho.
6 Arali mufumakadzi a sa fukedzi ṱhoho yawe, kha gere mavhudzi awe; fhedzi arali zwi tshi nyadzisa mufumakadzi uri a gere mavhudzi awe kana u vheula, kha fukedze ṱhoho yawe.
7 Munna ho ngo fanela u fukedza ṱhoho yawe, samusi e tshifanyiso tsha Mudzimu nahone a tshi mu rendisa; fhedzi mufumakadzi u rendisa munna.
8 Ngauri munna ho ngo bva kha mufumakadzi, fhedzi mufumakadzi o bva kha munna;
9 zwiṅwe hafhu, munna ho ngo sikwa hu tshi itelwa mufumakadzi, fhedzi mufumakadzi o sikwa hu tshi itelwa munna.
10 Ndi ngazwo mufumakadzi a tshi fanela u vha na luswayo lwa u ḓiṱukufhadza kha ṱhoho yawe a tshi itela vharuṅwa.
11 Nga nnḓa ha zwenezwo, u ya nga Murena, mufumakadzi ho ngo fhandekana na munna, na munna ho ngo fhandekana na mufumakadzi.
12 Samusi mufumakadzi o bva kha munna, na munna o vha hone nga mufumakadzi; fhedzi zwithu zwoṱhe zwi bva ha Mudzimu.
13 Haṱulani inwi vhaṋe: Naa zwo fanela uri mufumakadzi a rabele Mudzimu a songo fukedza ṱhoho?
14 Naa a ni athu guda uri nga lwa nzulele arali munna e na mavhudzi malapfu u a nyadzea;
15 fhedzi arali mufumakadzi e na mavhudzi malapfu, naa ha iti uri a rendwe? Ngauri o ṋewa mavhudzi nṱhani ha u ṋewa tshithu tsha u fukedza ṱhoho.
16 Naho zwo ralo, arali muthu naho e ufhio a tshi ṱoḓa u hanedza muṅwe mukhuvha, ni mu vhudze uri riṋe na zwivhidzo zwa Mudzimu a ri na muṅwe.
17 Naho ndi tshi khou ni ṋea nyeletshedzo, a thi ni khoḓi ngauri a ni vhuyelwi, fhedzi ni a vhaisala musi ni tshi kuvhangana nṱhani ha u vhuyelwa.
18 Musi ni tshi kuvhangana tshivhidzoni, ndi pfa hu tshi pfi hu na dziphambano vhukati haṋu; zwiṅwe ndi a zwi tenda.
19 Zwi re zwone ndi uri hu ḓo vha na zwigwada vhukati haṋu, uri vhane vha ṱanganedzea na vhone vha vhonale vhukati haṋu.
20 Nga zwenezwo, musi ni tshi kuvhangana fhethu huthihi, a zwi konadzei uri ni ḽe tshilalelo tsha Murena.
21 Ngauri musi ni tshi tshi ḽa, muṅwe na muṅwe waṋu u vha o no ḓi ḽa tshilalelo tshawe hu tshee nga phanḓa, hune muṅwe a pfa nḓala ngeno muṅwe o kambiwa.
22 Naa a ni na nnḓu dza u ḽela na u nwela khadzo? Kana ni tou nyadza tshivhidzo tsha Mudzimu na ita uri vhane vha si vhe na tshithu vha farwe nga ṱhoni? Ndi ambe na inwi ndi ri mini? Naa ndi ni khoḓe? Kha zwenezwi a thi ni khoḓi.
23 Ngauri zwe nda zwi ṱanganedza zwi tshi bva ha Murena ndi zwi pfukisela kha inwi, uri Murena Yesu nga vhusiku he a vha a tshi ḓo fheṱiwa ngaho o dzhia tshinkwa
24 a livhuha, a tshi ṅwata a ri: “Tshi imela muvhili wanga une wa ḓo ṋekedzwa u itela inwi. Dzulani ni tshi ita zwenezwi u itela u nkhumbula.”
25 O ita zwi fanaho na kha tshinwelo, musi vho no ḽa tshilalelo, a ri: “Tshinwelo itshi tshi imela mulanga muswa nga mutheo wa malofha anga. Ni dzule ni tshi ita zwenezwi tshifhinga tshoṱhe, musi ni tshi tshi nwa, uri ni nkhumbule.”
26 Ngauri tshifhinga tshoṱhe musi ni tshi ḽa tshenetshi tshinkwa na u nwa tshinwelo itshi, ni dzula ni tshi ṱanziela lufu lwa Murena, u swika a tshi vhuya.
27 Nga nṱhani ha zwenezwo, muṅwe na muṅwe ane a ḽa tshinkwa kana u nwa tshinwelo tsha Murena a sa fanelei u ḓo vha na mulandu malugana na muvhili na malofha zwa Murena.
28 Muthu nga a thome a ḓiṱolisise uri a vhone arali a tshi fanelea, nga murahu ndi hone a tshi ḓo kona u ḽa tshinkwa na u nwa tshinwelo.
29 Ngauri ane a ḽa na u nwa, u ḽa na u nwela u haṱulwa arali a sa ṱalukanyi zwine muvhili wa imela zwone.
30 Ndi ngazwo vhanzhi vhukati haṋu vha si na nungo, vha tshi lwala, nahone vhanzhi vha a fa.
31 Arali ri tshi ṱalukanya zwine ra vha zwone, ri nga si haṱulwe.
32 Naho zwo ralo, musi ri tshi haṱulwa, ri vha ri tshi khou laiwa nga Yehova, uri ri sa ḓo vhonwa mulandu khathihi na shango.
33 Nga zwenezwo, vhahashu, musi ni tshi kuvhangana u itela u ḽa tshilalelo, ni lindelane.
34 Arali muthu e na nḓala, nga a ḽe hayani, uri musi ni tshi kuvhangana, ni si haṱulwe. Fhedzi mafhungo o salaho ndi ḓo a dzudzanya musi ndi tshi swika henefho.
