1 Vhakorinta 12:1-31
12 Vhahashu, ndi ṱoḓa ni tshi ḓivha zwavhuḓi nga ha zwifhiwa zwa muya.
2 Ni a zwi ḓivha uri musi ni tshi kha ḓi vha vhathu vha dzitshaka, no vha ni tshi gwadamela midzimu ya zwifanyiso i sa koni u amba, ni tshi i tevhela huṅwe na huṅwe hune ya ni isa hone.
3 Nga nṱhani ha zwenezwo, ndi ṱoḓa ni tshi zwi ḓivha uri a hu na muthu ane musi a tshi amba nga muya wa Mudzimu a ri: “Yesu o semiwa!” a hu na muthu ane a nga ri: “Yesu ndi Murena!” arali hu si nga muya mukhethwa.
4 Huno hu na zwifhiwa zwo fhambanaho, fhedzi hu na muya muthihi;
5 hu na mishumo yo fhambanaho ya u thusa, naho zwo ralo, hu na Murena muthihi;
6 hu na mishumo yo fhambanaho, naho zwo ralo, ndi Mudzimu muthihi we a i shuma yoṱhe kha muṅwe na muṅwe.
7 Fhedzi muya u vhonala kha muṅwe na muṅwe uri a vhuyelwe.
8 Sa tsumbo, muya wo ṋea muṅwe tshifhiwa tsha u amba nga vhuṱali, wonoyo muya wo dovha wa ṋea muṅwe nḓivho ya u amba,
9 nga wonoyo muya muṅwe u a kona u vha na lutendo nahone muṅwe a vha na tshifhiwa tsha u fhodza,
10 muṅwe a ita mishumo ya maanḓa, muṅwe a porofita, muṅwe a ṱalukanya mafhungo o hevhedzwaho, muṅwe a amba nga ndimi dzo fhambanaho, muṅwe a ṱalutshedza dzindimi.
11 Fhedzi yeneyo mishumo yoṱhe i itwa nga wonoyo muya muthihi, u tshi kovhela muṅwe na muṅwe nga nḓila ine wa funa ngayo.
12 Samusi muvhili muthihi u na miraḓo minzhi, nahone miraḓo yoṱhe ya muvhili naho i minzhi, ndi muvhili muthihi, zwo tou ralo na nga muvhili wa Kristo.
13 Ngoho ndi ya uri roṱhe ro lovhedzwa nga muya kha muvhili muthihi, hu sa londwi uri ri Vhayuda kana Vhagerika, ri vhalanda kana ro vhofholowa, roṱhe ro ṱanganedza wonoyo muya.
14 Vhukuma, muvhili a u na muraḓo muthihi, fhedzi u na minzhi.
15 Arali mulenzhe u nga ri: “Ngauri a thi tshanḓa, a thi muraḓo wa muvhili,” zwenezwo a zwi iti uri u sa vhe muraḓo wa muvhili.
16 Arali nḓevhe ya nga ri: “Ngauri a thi ḽiṱo, a thi muraḓo wa muvhili,” zwenezwo a zwi iti uri u sa vhe muraḓo wa muvhili.
17 Arali muvhili woṱhe wo vha u ḽiṱo, u pfa ho vha hu tshi ḓo vha ngafhi? Arali muvhili woṱhe wo vha u nḓevhe, u nukhedza ho vha hu tshi ḓo vha ngafhi?
18 Huno Mudzimu o vhea miraḓo ya muvhili vhudzuloni hayo nga nḓila ine a funa ngayo.
19 Arali yoṱhe yo vha i muraḓo muthihi, muvhili wo vha u tshi ḓo vha ngafhi?
20 Huno hu na miraḓo minzhi, fhedzi muvhili ndi muthihi.
21 Ḽiṱo ḽi nga si ambe na tshanḓa ḽa ri: “A thi u ṱoḓi”; kana, ṱhoho i nga si ambe na milenzhe ya ri: “A thi ni ṱoḓi.”
22 U fhambana na zwenezwo, miraḓo ya muvhili ine ya vhonala i si na nungo ndi yone ine ya ṱoḓea,
23 miraḓo ya muvhili ine ra humbula uri i a nyadzea ndi yone ine ya huliswa vhukuma, na miraḓo ine ya vhonala i si yavhuḓi i dzhiiwa sa ine ya vha na ndeme vhukuma,
24 ngeno miraḓo ine ya vha yavhuḓi i sa ṱoḓi tshithu. Naho zwo ralo, Mudzimu o vhumba muvhili nga yeneyo nḓila, a tshi hulisa vhukuma muraḓo une wa si huliswe,
25 uri hu si vhe na u fhandekana muvhilini, fhedzi miraḓo yawo i fanela u ṱhogomelana.
26 Arali muraḓo muthihi u tshi pfa vhuṱungu, na miṅwe miraḓo yoṱhe i ḓo pfa vhuṱungu; kana arali muṅwe muraḓo u tshi huliswa, na miṅwe miraḓo yoṱhe i ḓo takala nawo.
27 Huno ni muvhili wa Kristo, muṅwe na muṅwe waṋu u muraḓo wawo.
28 Nahone Mudzimu o nanga muṅwe na muṅwe tshivhidzoni, vha u thoma ndi vhaapostola; vha vhuvhili ndi vhaporofita; vha vhuraru ndi vhagudisi; ha tevhela mishumo ya maanḓa; ha ḓa zwifhiwa zwa u fhodza; mishumo ya u thusa, vhukoni ha u ranga phanḓa, ha ḓa ndimi dzo fhambanaho.
29 Naa ndi vhoṱhe vhane vha vha vhaapostola? Naa ndi vhoṱhe vhane vha vha vhaporofita? Naa ndi vhoṱhe vhane vha vha vhagudisi? Naa ndi vhoṱhe vhane vha ita mishumo ya maanḓa?
30 Naa ndi vhoṱhe vhane vha vha na zwifhiwa zwa u fhodza? Naa ndi vhoṱhe vhane vha amba nga dzindimi? Naa ndi vhoṱhe vhane vha vha vhaṱalutshedzeli?
31 Fhedzi dzulani ni tshi fhisetshela u wana zwifhiwa zwihulwane. Huno ndi ni sumbedza nḓila i fhiraho dzoṱhe.
