1 Vhakorinta 13:1-13
13 Arali ndi tshi amba nga ndimi dza vhathu na dza vharuṅwa fhedzi ndi si na lufuno, ndi fana na tsimbi kana simbala* i lilaho.
2 Arali ndi na tshifhiwa tsha u porofita na u ḓivha zwiphiri zwikhethwa zwoṱhe na u vha na nḓivho yoṱhe, ndi na lutendo lwo khwaṱhaho lune lwa nga kona u sudzulusa dzithavha, fhedzi ndi si na lufuno, a thi tshithu.
3 Arali ndi tshi ṋea vhaṅwe zwithu zwanga zwoṱhe u itela u vha fusha, nahone nda kumedza muvhili wanga sa tshiṱhavhelo uri ndi zuwe, fhedzi ndi si na lufuno, a thi vhuyelwi na luthihi.
4 Lufuno a lu fheli mbilu, lu na vhuthu. Lufuno a lu na vivho, a lu zuwi, a lu ḓikukumusi,
5 a lu ḓifari nga nḓila i si yavhuḓi, a lu ḓiṱoḓeli zwalwo, a lu sinyuwi. A lu vhaleli muthu vhukhakhi.
6 A lu takaleli u sa luga, fhedzi lu takalela ngoho.
7 Lu fukedza zwoṱhe, lwa tenda zwoṱhe, lwa fulufhela zwoṱhe, lwa konḓelela zwoṱhe.
8 Lufuno lu nga si vhuye lwa fhela. Arali hu zwifhiwa zwa u porofita, zwi ḓo fhela; arali hu ndimi dzi ḓo fhumula; arali hu nḓivho, i ḓo fheliswa.
9 Ngauri ri na nḓivho ṱhukhu i songo fhelelaho nahone ri porofita nga nḓila i songo fhelelaho;
10 musi hu tshi swika zwo fhelelaho, zwi songo fhelelaho zwi ḓo fheliswa.
11 Musi ndi tshi kha ḓi vha ṅwana, ndo vha ndi tshi amba sa ṅwana; ndi tshi humbula sa ṅwana, ndi tshi ṱolisisa zwine zwithu zwa amba zwone sa ṅwana; fhedzi zwino ndo no vha munna, ndo laṱa zwiito zwa hana.
12 Ngauri zwino a ri koni u vhona zwavhuḓi nga tshivhoni tsha tsimbi, fhedzi nga murahu ri ḓo kona u vhona zwavhuḓi ra nga ri khou vhonana ro livhana zwifhaṱuwo. Zwa zwino ndi na nḓivho i songo fhelelaho, fhedzi nga murahu ndi ḓo ḓivha nga ho teaho samusi ndi tshi ḓivhiwa nga ho teaho.
13 Naho zwo ralo, zwi sa fheli ndi lutendo, fulufhelo, na lufuno, kha zwenezwo zwithu zwiraru; tshihulwanesa ndi lufuno.
Ṱhaluso dzi re magumoni a siaṱari
^ Tshilidzo tsha muzika tsha mutengelele tshine tsha ita phosho musi vhuvhili hazwo zwi tshi rwana.
