1 Vhakorinta 14:1-40
14 Tovholani lufuno, fhedzi ni ite vhuḓidini ha u wana zwifhiwa zwa muya, fhedzi zwihuluhulu ni porofite.
2 Ane a amba nga ndimi ha ambi na vhathu, fhedzi u amba na Mudzimu, ngauri a hu na ane a mu thetshelesa, u vha a tshi khou amba zwiphiri zwikhethwa nga muya.
3 Naho zwo ralo, ane a porofita u a khwaṱhisa, u a ṱuṱuwedza, na u khuthadza vhathu nga zwine a zwi amba.
4 Ane a amba nga ndimi u a ḓikhwaṱhisa, fhedzi ane a porofita u khwaṱhisa tshivhidzo.
5 Ndi nga tama arali noṱhe no vha ni tshi amba nga ndimi, fhedzi zwine nda zwi takalela ndi zwa uri ni porofite. Vhukuma, ane a porofita u fhira ane a amba nga ndimi, nga nnḓa ha musi a tshi ṱalutshedza uri tshivhidzo tshi khwaṱhiswe.
6 Vhahashu, arali nda ḓa nda amba na inwi nga ndimi nga tshino tshifhinga, ndi ḓo ni vhuyedza ngani nga nnḓa ha musi ndo ni vhudza zwe Mudzimu a ndzumbululela kana nga zwine nda zwi ḓivha kana nga zwine nda porofita kana u zwi gudisa?
7 Zwi fana na zwithu zwi sa tshili zwine zwa lidzwa, u fana na tshiṱiringo kana mbila. Nga nnḓa ha musi zwi tshi bveledza muungo u sa fani, zwine zwa khou lidzwa kha tshiṱiringo kana kha mbila zwi nga ḓivhiwa hani?
8 Arali phalaphala ya lila i si pfale, ndi nnyi ane a ḓo ḓilugiselela u lwa?
9 Nga nḓila i fanaho, nga nnḓa ha musi inwi ane a amba nga ndimi ni tshi amba nga nḓila ine ya pfesesea nga ho leluwaho, muṅwe muthu u ḓo ḓivha hani zwine zwa khou ambiwa? Zwi re zwone ndi uri ni ḓo vha ni tshi khou amba zwi sa vhuyedzi.
10 Hu nga vha hu na nyambo nnzhi dzine dza ambiwa shangoni, fhedzi a hu na luambo lu si na zwine lwa amba zwone.
11 Arali ndi sa pfesesi zwine zwa khou ambiwa, ndi ḓo nga mutsinda kha ane a khou amba, nahone ane a khou amba u ḓo nga mutsinda kha nṋe.
12 Samusi ni tshi tama zwifhiwa zwa muya, lwelani u pfuma nga zwenezwo zwifhiwa zwine zwa ḓo khwaṱhisa tshivhidzo.
13 Nga zwenezwo, ane a amba nga ndimi nga a rabele uri a kone na u ṱalutshedzela.
14 Arali ndi tshi rabela nga ndimi, ndi tshifhiwa tsha muya tshe nda ṋewa tshone tshine tsha khou rabela, fhedzi nṋe a thi zwi pfesesi.
15 Zwino hu itwe mini-ha? Ndi ḓo rabela nga tshifhiwa tsha muya tshe nda ṋewa tshone, fhedzi ndi ḓo dovha nda rabela thabelo ine nda i pfesesa. Ndi ḓo imbela Mudzimu nga tshifhiwa tsha muya tshe nda ṋewa tshone, fhedzi ndi ḓo dovha nda imbela Mudzimu luimbo lune nda lu pfesesa.
16 Zwa sa ralo, arali ni tshi renda Mudzimu nga tshifhiwa tsha muya, muthu zwawe a re vhukati haṋu u ḓo amba hani uri “Amen” kha zwine na zwi livhuha, samusi a sa ḓivhi zwine na khou zwi amba?
17 Ndi ngoho uri ni khou livhuha nga nḓila yavhuḓi, fhedzi muṅwe muthu ha khou khwaṱhiswa.
18 Ndi livhuha Mudzimu, ngauri ndi amba ndimi nnzhi u ni fhira.
19 Naho zwo ralo, ndi nga amba maipfi maṱanu ane a pfala tshivhidzoni, u itela u gudisa vhaṅwe, nṱhani ha u amba maipfi a zwigidi zwa fumi nga ndimi dzi sili.
20 Vhahashu, ni songo vha vhana kha maanḓa a u ṱalukanya, fhedzi ni vhe vhana musi zwi tshi ḓa kha vhuvhi; ivhani vho aluwaho kha maanḓa a u ṱalukanya.
21 Kha mulayo ho ṅwalwa u pfi: “‘Ndi ḓo amba na avha vhathu nga ndimi dza vhatsinda na milomo ya vhathu vhane vha si vha ḓivhe, naho zwo ralo, a vha nga ḓo nthetshelesa,’ Yehova u ralo.”
22 Nga zwenezwo, ndimi a si tshiga tsha vha tendaho, fhedzi ndi tsha vha sa tendi, ngeno vhuporofita vhu si ha vhathu vha sa tendiho, fhedzi ndi ha vhane vha tenda.
23 Arali tshivhidzo tshoṱhe tsha kuvhangana fhethu huthihi nahone vhoṱhe vha amba nga ndimi, ha dzhena vhathu zwavho kana vha sa tendi, naa vha nga si ambe uri no ṱangana ṱhoho?
24 Arali noṱhe ni tshi khou porofita nahone ha dzhena a sa tendi kana muthu zwawe, u ḓo ḓivhona vhukhakhi nahone vhoṱhe vha mu ṱuṱuwedza uri a ḓiṱolisise.
25 Zwiphiri zwi re mbiluni yawe zwi ḓo bvela khagala, zwa ita uri a we nga tshifhaṱuwo a rabele Mudzimu, a ri: “Zwa vhukuma Mudzimu u vhukati haṋu.”
26 Huno hu itwe mini, vhahashu? Musi ni tshi kuvhangana, muṅwe u imba dzipsalme, muṅwe ndi wa u gudisa, muṅwe o dzumbululelwa nga Mudzimu, muṅwe u na ndimi, muṅwe ndi wa u ṱalutshedzela. Zwithu zwoṱhe kha zwi itwe u itela u fhaṱana.
27 Arali muthu a tshi amba nga ndimi, kha vha vhe vhavhili kana vhararu fhedzi, vha sielisane; nahone muṅwe u fanela uri a ṱalutshedzele.
28 Fhedzi arali hu si na muṱalutshedzeli, u fanela uri a fhumule tshivhidzoni nahone a ambe na Mudzimu mbiluni yawe.
29 Zwiṅwe hafhu, hu ambe vhaporofita vhavhili kana vhararu, nahone vhaṅwe vha ṱalukanye zwine zwa amba zwone.
30 Arali muṅwe a dzumbululelwa nga Mudzimu o dzula henefho, we a vha a tshi khou amba a thome a fhumule.
31 Ngauri noṱhe ni nga porofita nga muthihi nga muthihi, uri vhoṱhe vha gude na u ṱuṱuwedzea.
32 Zwifhiwa zwa muya zwa vhaporofita zwi fanela u langiwa nga vhaporofita.
33 Ngauri Mudzimu a si Mudzimu a songo dzudzanyeaho, fhedzi ndi wa mulalo.
U fana na zwivhidzoni zwoṱhe zwa vhakhethwa,
34 vhafumakadzi vha fhumule zwivhidzoni, ngauri a zwo ngo tendelwa uri vha ambe. Nṱhani hazwo, kha vha ḓiṱukufhadze, samusi na Mulayo u tshi amba nga u ralo.
35 Arali vha tshi ṱoḓa u guda zwiṅwe zwithu, vha fanela u vhudzisa vhanna vhavho hayani, zwi a shonisa musi mufumakadzi a tshi amba tshivhidzoni.
36 Naa ipfi ḽa Mudzimu ḽo thoma kha inwi, kana ḽo tou swika kha inwi?
37 Arali muthu a tshi humbula uri u muporofita kana o ṋewa tshifhiwa tsha muya, u fanela u ṱalukanya uri zwine nda khou ni ṅwalela ndi ndaela i bvaho ha Murena.
38 Arali muthu a sa pfesesi, mu litsheni a dzule o ralo.
39 Nga zwenezwo, vhahashu, dzulani ni tshi ita vhuḓidini ha uri ni porofite, fhedzi ni songo thivhela u amba nga ndimi.
40 Zwithu zwoṱhe kha zwi itwe nga nḓila yavhuḓi na yo dzudzanyeaho.
