1 Vhakorinta 15:1-58
15 Vhahashu, ndi khou ni humbudza mafhungo maḓifha e nda ni ḓivhadza one, e na a ṱanganedza, e na dzula no khwaṱha khao.
2 Ni ḓo dovha na tshidzwa arali ni tshi farelela no khwaṱha kha mafhungo maḓifha e nda ni ḓivhadza one, nga nnḓa ha musi no vha vhatendi hu si na tshiitisi.
3 Kha zwithu zwa ndeme zwe nda ni ṋea zwone zwo vha zwe nda zwi ṱanganedza, uri Kristo o fela zwivhi zwashu u ya nga Maṅwalo,
4 o vhulungwa, o vuswa nga ḓuvha ḽa vhuraru u ya nga Maṅwalo,
5 o ḓivhonadza kha Kefa nga murahu a ḓivhonadza kha vha fumi-mbili (12).
6 Nga murahu ha zwenezwo a ḓivhonadza kha vhahashu vha fhiraho maḓana maṱanu, vhane vhunzhi havho vha kha ḓi vha na riṋe, nahone vhaṅwe vho no fa.
7 Nga murahu o ḓivhonadza kha Yakobo, a dovha a ḓivhonadza kha vhaapostola vhoṱhe;
8 mafheleloni a ḓivhonadza kha nṋe we nda vha ndi tshi nga ṅwana we a bebwa tshifhinga tshi sa athu swika.
9 Ngauri ndi muṱuku kha vhaapostola, a thi fanelei u vhidzwa muapostola, ngauri ndo tovhola tshivhidzo tsha Mudzimu.
10 Fhedzi ndi zwine nda vha zwone nga nṱhani ha vhuthu vhuhulu ha Mudzimu. Nahone vhuthu vhuhulu hawe he a ntsumbedza hone ho vha vhu si mahandana, ndo shuma u fhira vhoṱhe, fhedzi ho vha vhu vhuthu vhuhulu ha Mudzimu vhu re kha nṋe.
11 Naho zwo ralo, hu sa londwi uri ndi nṋe kana ndi vhaṅwe vhaapostola, zwenezwi ndi zwine ra zwi huwelela nahone ndi nga nḓila yeneyo ye na tenda ngayo.
12 Arali hu tshi huwelelwa uri Kristo o vuswa vhafuni, ndi ngani vhaṅwe kha inwi vha tshi amba uri a hu na mvuwo ya vhafu?
13 Vhukuma, arali hu si na mvuwo ya vhafu, izwo na Kristo ho ngo vuswa.
14 Arali Kristo a songo vuswa, u huwelela hashu ndi ha fhedzi, na lutendo lwashu ndi lwa fhedzi.
15 Zwiṅwe hafhu, arali vhafu vha sa vuswi zwa vhukuma, ri dzhiiwa ri ṱhanzi dzo zwifhelaho Mudzimu, ngauri ro ṱanziela nga ha Mudzimu nga u amba uri o vusa Kristo, fhedzi a songo mu vusa.
16 Arali vhafu vha sa ḓo vuswa, na Kristo ho ngo vuswa.
17 Zwiṅwe hafhu, arali Kristo a songo vuswa, lutendo lwaṋu a lu na mushumo; ni ḓo dzula ni zwivhini zwaṋu.
18 Zwi re zwone ndi uri, vho faho vhe na vhuthihi na Kristo vho fa lwa tshoṱhe.
19 Arali ro fulufhela Kristo kha vhuno vhutshilo fhedzi, ri ḓo ṱungufhala u fhira naho e nnyi.
20 Ngoho ndi ya uri Kristo o vuswa vhafuni, ndi tshiranzhe tsha vho faho.
21 Samusi lufu lwo vha hone nga muthu, na mvuwo ya vhafu yo vha hone nga muthu.
22 Samusi roṱhe ri tshi fa nga mulandu wa Adamu, roṱhe ri ḓo vuswa nga nṱhani ha Kristo.
23 Fhedzi muṅwe na muṅwe u na vhuimo hawe: Kristo ndi tshiranzhe, ha tevhela vhane vha vha vha Kristo tshifhingani tsha u vha hone hawe.
24 Ngauralo, mafheleloni u ḓo humisela muvhuso ha Mudzimu, ane a vha Khotsi awe. Zwenezwi zwi ḓo itea musi o no fhelisa mivhuso yoṱhe na vhavhusi.
25 Ngauri u fanela u vhusa sa khosi u swika Mudzimu a tshi vhea maswina fhasi ha milenzhe yawe.
26 Lufu ndi swina ḽa u fhedza ḽine a ḓo ḽi fhelisa.
27 Ngauri Mudzimu “o vhea zwithu zwoṱhe nga fhasi ha milenzhe yawe.” Fhedzi musi a tshi amba uri ‘zwithu zwoṱhe zwi fhasi ha milenzhe yawe,’ zwi tou vha khagala uri a zwi kateli we a vhea zwithu zwoṱhe khae.
28 Musi zwithu zwoṱhe zwo no vhewa nga fhasi ha milenzhe yawe, Murwa u ḓo dovha a ḓivhea nga fhasi ha we a vhea zwithu zwoṱhe nga fhasi hawe, uri Mudzimu a vhe zwithu zwoṱhe kha vhoṱhe.
29 Arali zwi songo ralo, vhane vha lovhedzelwa uri vha vhe vhafu vha ḓo ita mini? Arali vhafu vha sa ḓo vuswa na luthihi, ndi ngani na vhone vha tshi khou lovhedzwa uri vha vhe vhafu?
30 Ndi ngani ri tshi dzula ri khomboni tshifhinga tshoṱhe?
31 Ḓuvha ḽiṅwe na ḽiṅwe ndi vha ndo livhana na lufu. Dakalo ḽine nda vha naḽo kha inwi vhahashu, ndi ḽine nda vha naḽo kha Kristo Yesu Murena washu.
32 Arali ndo lwa na zwivhanda ngei Efesa u fana na vhaṅwe vhathu, zwi ḓo mmbuyedza nga’ni? Arali vhafu vha sa ḓo vuswa, “kha ri ḽe ri nwe, ngauri matshelo ri ḓo fa.”
33 Ni songo fhurwa. Vhukonani vhu si havhuḓi vhu tshinya vhuḓifari havhuḓi.
34 Dzivhuluwani nga nḓila yo lugaho nahone ni songo dzulela u ita tshivhi, ngauri vhaṅwe a vha ḓivhi Mudzimu. Ndi khou amba na inwi uri ni farwe nga ṱhoni.
35 Naho zwo ralo, muṅwe muthu u ḓo ri: “Vhafu vha ḓo vuswa nga nḓila-ḓe? Vha ḓo vuswa vhe na tshivhumbeo tsha mufuda-ḓe?”
36 Tsilu ndi iwe! Zwine wa zwala zwi thoma zwa fa zwa kona u tshila;
37 zwine wa zwala, a si tshivhumbeo tshine tsha ḓo vha tshone, u zwala thoro fhedzi hu sa londwi uri ndi ya goroi, kana ndi ya muṅwe mufuda;
38 fhedzi Mudzimu u i ṋea tshivhumbeo nga hune a funa ngaho, u ṋea mbeu iṅwe na iṅwe tshivhumbeo tshayo.
39 A si uri ṋama dzoṱhe dzi a fana, hu na ya vhathu, hu na iṅwe ya kholomo, iṅwe ndi ya zwiṋoni, nahone iṅwe ndi ya khovhe.
40 Hu na zwivhumbeo zwa ṱaḓulu, na zwivhumbeo zwa kha ḽifhasi; fhedzi lunako lwa zwivhumbeo zwa ṱaḓulu ndi lwa muṅwe mufuda, lwa zwivhumbeo zwa kha ḽifhasi ndi lwa muṅwe mufuda-vho.
41 Lunako lwa ḓuvha ndi lwa muṅwe mufuda, na lwa ṅwedzi ndi lwa muṅwe mufuda, na lwa ṋaledzi ndi lwa muṅwe mufuda; zwi re zwone ndi uri, ṋaledzi dzo fhambana nga lunako lwadzo.
42 Zwo tou ralo nga u vuswa ha vhafu. Hu zwalwa muvhili u sinaho, ha vuswa u sa sini.
43 U zwalwa nga nḓila i nyadzeaho, u vuswa u wo nakaho. U zwalwa u na vhushayanungo, wa vuswa u na maanḓa.
44 U zwalwa u tshivhumbeo tsha ṋama, wa vuswa u tshivhumbeo tsha muya. Arali hu na tshivhumbeo tsha ṋama, hu dovha ha vha na tshivhumbeo tsha muya.
45 Ho itwa na u ṅwalwa u pfi: “Adamu muthu wa u thoma o vha muthu a tshilaho.” Adamu wa u fhedza o vha muthu a ṋeaho vhutshilo.
46 Naho zwo ralo, zwine zwa vha zwa muya a si zwone zwa u thoma. Zwine zwa vha zwa ṋama ndi zwone zwa u thoma, ha tevhela zwine zwa vha zwa muya.
47 Muthu wa u thoma u bva kha ḽifhasi nahone o itwa nga buse; muthu wa vhuvhili u bva ṱaḓulu.
48 Samusi o itwaho nga buse e buse, na vho itwaho nga buse na vhone ndi buse; samusi wa ṱaḓulu e wa ṱaḓulu, na vhane vha vha ṱaḓulu ndi vha ṱaḓulu.
49 Samusi ri tshi fana na o itwaho nga buse, ri ḓo fana na wa ṱaḓulu.
50 Vhahashu, ndi khou amba zwenezwi uri ṋama na malofha zwi nga si ḽe ifa ḽa muvhuso wa Mudzimu, kana u ḽa ifa ḽa u sa sina.
51 Ndi ni vhudza tshiphiri tshikhethwa: Ri nga si fe roṱhe, fhedzi roṱhe ri ḓo shandukiswa,
52 nga tshifhinganyana, nga u poidza ha ḽiṱo, musi hu tshi lila phalaphala ya u fhedza. Ngauri phalaphala i ḓo lila, vhafu vha ḓo vuswa vha si tsha sina, nahone ri ḓo shandukiswa.
53 Ngauri zwine zwa sina zwi fanela u ambara u sa sina, nahone zwine zwa fa zwi fanela u ambara u sa fa.
54 Musi zwine zwa sina zwi tshi ambara u sa sina, zwine zwa fa zwi tshi ambara u sa fa, ndi hone hu tshi ḓo ḓadzea maipfi o ṅwalwaho ane a ri: “Lufu lwo milwa tshoṱhe.”
55 “Lufu, gundo ḽau ḽi ngafhi? Lufu, luvholela lwau lu ngafhi?”
56 Luvholela lu bveledzaho lufu ndi tshivhi, maanḓa a tshivhi a bva kha Mulayo.
57 Fhedzi ri livhuha Mudzimu, ngauri o ri ṋea gundo nga Murena washu Yesu Kristo!
58 Nga zwenezwo, vhahashu vhane nda vha funa, ivhani no khwaṱhaho, ni sa dzinginyei, tshifhinga tshoṱhe ni vhe na zwinzhi zwine na zwi ita mushumoni wa Murena, ni tshi ḓivha uri mushumo waṋu a si wa fhedzi Murenani.
