1 Vhakorinta 16:1-24
16 Malugana na kose-kose ya vhakhethwa, ni nga tevhela nyeletshedzo dze nda dzi ṋea zwivhidzo zwa Galatia.
2 Nga ḓuvha ḽa u thoma ḽa vhege iṅwe na iṅwe, muṅwe na muṅwe waṋu a vhetshele tshiṅwe tshithu thungo u ya nga hune a nga kona ngaho, uri ndi tshi swika hu si vhe na kose-kose.
3 Fhedzi musi ndi tshi swika henefho, ndi ḓo ruma vhanna vhe na vha ṅwala kha vhurifhi uri vha a fulufhedzea, uri vha ise tshifhiwa tshaṋu tsha vhuthu ngei Yerusalema.
4 Naho zwo ralo, arali zwi tshi vhonala zwo tea uri na nṋe ndi ye henengei, na nṋe ndi ḓo ṱuwa navho henefho.
5 Fhedzi ndi ḓo ḓa kha inwi musi ndo no fhira Makedonia, ngauri ndi ḓo fhira nga Makedonia;
6 khamusi ndi ḓo dzula kana nda fhedza vhuriha ndi na inwi, uri ni mphelekedze hune nda ḓo vha ndi tshi khou ya hone.
7 A thi ṱoḓi u ni vhona musi ndi tshi khou tou fhira, samusi ndi tshi fulufhela u fhedza tshifhinga tshilapfu ndi na inwi, arali Yehova a tshi zwi tendela.
8 Fhedzi ndi ḓo sala Efeso u swika nga vhuṱambo ha Pentekoste;
9 ngauri ndo vulelwa muṋango muhulu u isaho tshumeloni, fhedzi hu na vhapikisi vhanzhi.
10 Musi Timotheo a tshi swika, ni ite vhungoho ha uri a si ofhe tshithu musi e na inwi, ngauri u khou ita mushumo wa Yehova, u fana na nṋe.
11 Ngauralo, hu songo vha na ane a mu nyadza. Ni mu fhelekedze nga mulalo, uri a kone u swika kha nṋe, ngauri nṋe na vhahashu ro mu lindela.
12 Malugana na wahashu Apolo, ndo mu ṱuṱuwedza nga maanḓa uri a ḓe kha inwi khathihi na vhahashu, naho o vha a songo ḓiimisela u ḓa zwino; fhedzi u ḓo ḓa kha inwi musi a tshi wana tshibuli.
13 Dzulani no fhaṱuwa, imani no khwaṱha lutendoni, ni vhe na tshivhindi, ni vhe na maanḓa.
14 Zwoṱhe zwine na zwi ita ni zwi ite nga lufuno.
15 Ndi a ni ṱuṱuwedza vhahashu: Ni a zwi ḓivha uri muṱa wa ha Stefanasi wo vha wone wa u thoma u vha vhafunziwa ngei Axaya na uri wo ḓikumedza uri u shumele vhakhethwa.
16 Ngavhe ni tshi ḓiṱukufhadza kha vhathu vho raloho na kha vhoṱhe vhane vha shumisana navho na vhane vha vha vhashumi vha biko.
17 Fhedzi ndi a takala uri Stefanasi, Fortunato, na Axaiko vha fhano, ngauri vho vala tshikhala tsha u sa vha hone haṋu fhano.
18 Ngauri vho ri homolosa. Nga zwenezwo, ni dzhiele nṱha vhathu vho raloho.
19 Vha zwivhidzoni zwa Asia vha a ni lumelisa. Akwila na Prisika* u katela na tshivhidzo tshine tsha kuvhangana nḓuni yavho vha a ni lumelisa Murenani zwi tshi bva mbiluni.
20 Vhahashu vhoṱhe vha a ni lumelisa. Ni lumelisane nga khisi khethwa.*
21 Nṋe Paulo, ndi khou ni ṅwalela yeneyi ndumeliso nga tshanḓa tshanga.
22 Arali muthu a sa funi Murena, nga a semiwe. Murena washu, iḓa!
23 Ni vhe na vhuthu vhuhulu ha Murena Yesu.
24 Ngavhe lufuno lwanga lu tshi vha na inwi noṱhe vhane na vha na vhuthihi na Kristo Yesu.
Ṱhaluso dzi re magumoni a siaṱari
^ U dovha a vhidzwa “Prisila.”
^ Yeneyo ndi nḓila ye Vhakriste vha vha vha tshi lumelisana ngayo musi vha tshi ṱangana.
