1 Vhakorinta 2:1-16
2 Vhahashu, musi ndi tshi ḓa ha inwi, a tho ngo ni ḓivhadza tshiphiri tshikhethwa tsha Mudzimu nga maipfi a u nakisa kana a vhuṱali.
2 Ngauri ndo nanga u sa ḓivha zwiṅwe zwithu vhukati haṋu nga nnḓa ha Yesu Kristo, na uri o ombelwa kha danda.
3 Ndo ḓa kha inwi ndi tshi shaya nungo, ndi tshi ofha, ndi tshi tetemela zwihulu;
4 nahone zwe nda amba na u zwi huwelela zwo vha zwi si zwa u ni kunga nga maipfi a vhuṱali, fhedzi zwe nda zwi amba zwo sumbedza maanḓa a muya,
5 uri lutendo lwaṋu lu si vhe kha vhuṱali ha vhathu, fhedzi lu vhe kha maanḓa a Mudzimu.
6 Zwino ri amba vhuṱali ri vhukati ha vho vhibvaho, fhedzi hu si vhuṱali ha ano maitele a zwithu kana ha vhavhusi vha ano maitele a zwithu, vhane vha ḓo fheliswa.
7 Fhedzi ri amba vhuṱali ha Mudzimu tshiphirini tshikhethwa, vhuṱali ho dzumbiwaho, he Mudzimu a dzula o dzudzanya nga phanḓa ha maitele a zwithu uri ri wane vhugala.
8 Honovhu vhuṱali a ho ngo ḓivhiwa nga muvhusi na muthihi, ngauri arali vho vha vho vhu ḓivha, vho vha vha sa ḓo ombela Murena washu wa vhugala kha danda.
9 Samusi ho ṅwalwa ha pfi: “Ḽiṱo a ḽo ngo zwi vhona na nḓevhe a yo ngo zwi pfa, a hu na na muthihi we a ṱalukanya mbiluni zwithu zwe Mudzimu a zwi lugiselela vhane vha mu funa.”
10 Ngauri Mudzimu o zwi dzumbululela riṋe a tshi shumisa muya wawe, muya u ṱoḓisisa zwoṱhe, khathihi na zwiphiri zwo dzikaho zwa Mudzimu.
11 Ngauri ndi nnyi vhukati ha vhathu ane a ḓivha zwithu zwa muthu nga nnḓa ha muya wa muthu u re ngomu hawe? Ngauralo, a hu na muthu ane a ḓivha zwithu zwa Mudzimu, nga nnḓa ha muya wa Mudzimu.
12 Zwino a ro ngo ṱanganedza muya wa shango, fhedzi ro ṱanganedza muya u bvaho ha Mudzimu, uri ri ḓivhe zwe Mudzimu a ri ṋea zwone nga vhuthu hawe.
13 A ri ambi zwenezwi zwithu nga maipfi o funzwaho nga vhuṱali ha muthu, fhedzi ri amba nga maipfi o funzwaho nga muya, musi ri tshi ṱalutshedza mafhungo a lwa muya nga maipfi a lwa muya.
14 Fhedzi muthu wa ṋama ha ṱanganedzi zwithu zwa muya wa Mudzimu, ngauri ndi vhutsilu khae; nahone a nga si zwi ḓivhe, ngauri zwi ṱolisiswa nga lwa muya.
15 Naho zwo ralo, muthu wa muya u ṱolisisa zwithu zwoṱhe, fhedzi ene muṋe ha ṱolisiswi nga muthu naho e ufhio.
16 Ngauri “ndi nnyi ane a ḓivha muhumbulo wa Yehova, uri a kone u mu funza?” Fhedzi riṋe ri na muhumbulo wa Kristo.
