1 Vhakorinta 3:1-23
3 Vhahashu, a tho ngo kona u amba na inwi sa vhathu vha muya, fhedzi ndo amba na inwi sa vhathu vha ṋama, sa vhushie kha Kristo.
2 Ndo ni ṋea mafhi, hu si zwiḽiwa zwo dziaho, ngauri no vha ni sa athu vha na maanḓa. Zwi re zwone ndi uri, na zwino a ni athu vha na maanḓa,
3 ni kha ḓi vha vhathu vha ṋama. Ngauri ni kha ḓi vha na vivho na u lwa vhukati haṋu, naa a ni vhathu vha ṋama, vhane vha tshimbila nga nḓila ine vhathu vha tshimbila ngayo?
4 Ngauri musi muṅwe a tshi ri: “Nṋe ndi wa Paulo,” fhedzi muṅwe a ri: “Nṋe ndi wa Apolo,” naa a ni sokou vha vhathu zwaṋu?
5 Zwino Apolo ndi nnyi? Nahone Paulo ndi nnyi? Ndi vhaḓinḓa vhe vha ita uri ni vhe vhatendi, samusi Murena o ṋea muṅwe na muṅwe washu.
6 Nṋe ndo ṱavha, Apolo a sheledza, fhedzi Mudzimu ndi ene ane a medza;
7 ngauralo, o ṱavhaho na a sheledzaho a vha tshithu, fhedzi ane a tea u khoḓwa ndi Mudzimu ane a ita uri zwi aluwe.
8 A ṱavhaho na a sheledzaho vha ita mushumo u fanaho, fhedzi muthu muṅwe na muṅwe u ḓo wana malamba awe u ya nga zwe a zwi shuma.
9 Ngauri ri vhashumisani na Mudzimu. Inwi ni tsimu ya Mudzimu yo limiwaho, ni tshifhaṱo tsha Mudzimu.
10 U ya nga vhuthu vhuhulu ha Mudzimu he nda ṋewa hone, ndo adza mutheo sa mufhaṱi makone, fhedzi muṅwe u khou fhaṱa kha wonoyu mutheo. Muṅwe na muṅwe a dzule a tshi sedza nḓila ine a khou fhaṱa ngayo.
11 Ngauri a hu na muthu ane a nga adza muṅwe mutheo nga nnḓa ha wo adzwaho, une wa vha Yesu Kristo.
12 Zwino arali naho e nnyi a tshi fhaṱa kha wonoyo mutheo nga musuku, tsimbi-tseṱha, matombo a thengo khulu, dzithanda, hatsi kana maṱanga,
13 musi ḓuvha ḽa u lingwa ḽi tshi swika, mushumo wa muṅwe na muṅwe u ḓo vhonala, ngauri mulilo u ḓo dzumbulula tshiṅwe na tshiṅwe; nahone u ḓo sumbedza zwine mushumo wa muṅwe na muṅwe wa vha zwone.
14 Arali mushumo we muthu a u fhaṱa wa sala, u ḓo wana malamba;
15 arali mushumo wa muṅwe wa swa, u ḓo vha o xelelwa, fhedzi ene u ḓo vha o tshidzwa; zwi ḓo tou nga o tou tshidzwa muliloni.
16 Naa a ni zwi ḓivhi zwa uri ni thembele ya Mudzimu, na uri muya wa Mudzimu u dzula kha inwi?
17 Arali muthu a tshinya thembele ya Mudzimu, Mudzimu u ḓo mu fhelisa; ngauri thembele ya Mudzimu ndi khethwa, nahone ni yeneyo thembele.
18 Hu songo vha na muthu ane a ḓifhura: Arali naho e nnyi vhukati haṋu a tshi humbula uri o ṱalifha kha ano maitele a zwithu, nga a vhe tsilu, uri a ṱalifhe.
19 Ngauri vhuṱali ha ḽino shango ndi vhutsilu kha Mudzimu; ndi ngazwo ho ṅwalwa ha pfi: “U fasha vhaṱali vhe kha vhukwila havho.”
20 Zwiṅwe hafhu, hu pfi: “Yehova u a ḓivha uri nḓila ine vhaṱali vha elekanya ngayo a i thusi tshithu.”
21 Ngauralo, hu songo vha na ane a zuwa nga vhathu; ngauri zwithu zwoṱhe ndi zwaṋu,
22 hu Paulo kana Apolo kana Kefa kana shango kana vhutshilo kana lufu kana zwithu zwi re hone zwino kana zwine zwa khou ḓa, zwoṱhe ndi zwaṋu;
23 inwi ni vha Kristo; Kristo ndi wa Mudzimu.
