1 Vhakorinta 4:1-21
4 Muthu nga a ri dzhie sa vhaḓinḓa vha Kristo na vhakoma vho kumedzwaho zwiphiri zwikhethwa zwa Mudzimu.
2 Nga nnḓa ha zwenezwo, kha enea mafhungo, zwi lavhelelwaho kha vhalanda ndi uri vha wanwe vha tshi fulufhedzea.
3 Zwino a si zwa ndeme kha nṋe arali ndi tshi fanela u sengiswa nga inwi kana nga khothe ya vhathu. Zwi re zwone ndi uri, na nṋe a thi ḓisengisi.
4 Ngauri a thi ḓivhi na tshithu na tshithihi tshe nda tshi ita tsho khakheaho. Naho zwo ralo, a thi dzhiiwi ndi o lugaho, fhedzi ane a ntsengisa ndi Yehova.
5 Nga zwenezwo, ni songo haṱula tshifhinga tsho vhewaho tshi sa athu swika, u vhuya u swika Murena a tshi ḓa. U ḓo vhonetshela zwithu zwa tshiphiri zwi re swiswini na u bvisela khagala maano a re mbiluni, nga murahu ha zwenezwo, muṅwe na muṅwe u ḓo khoḓwa nga Mudzimu.
6 Zwino vhahashu, nṋe na Apolo ro shumisa zwenezwi zwithu uri ni vhuyelwe, uri kha enea mafhungo ni gude mulayo une wa ri: “Ni songo pfuka mukano wa zwithu zwo ṅwalwaho,” uri ni si ḓikukumuse, na vho takalela muṅwe u fhira muṅwe.
7 Ngauri ndi nnyi a itaho uri u fhambane na muṅwe? Vhukuma, ndi mini tshine wa vha natsho tshe u si ṋewe? Arali zwino wo tou tshi ṋewa, ndi ngani u tshi zuwa zwa tou nga a wo ngo tou tshi ṋewa?
8 Naa no no fura? Naa no no pfuma? Naa no no thoma u vhusa sa mahosi ni songo ri katela? Vhukuma, ndi tou tama arali no vha no no thoma u vhusa sa mahosi, uri na riṋe ri vhuse na inwi sa mahosi.
9 Ngauri kha nṋe zwi tou nga Mudzimu o vhea riṋe vhaapostola uri ri vhe vha u fhedzisela ṱanoni sa vhathu vhane vha khou ya u fa, ngauri ri khou vhonwa nga shango ḽoṱhe na vharuṅwa na vhathu.
10 Ri matsilu nga mulandu wa Kristo, fhedzi inwi no ṱalifha ngauri ni tevhela Kristo, a ri na nungo, fhedzi inwi ni na maanḓa; inwi ni na bvumo ḽavhuḓi, fhedzi riṋe ri a nyadziwa.
11 U swika nga tshino tshifhinga ri tshee ro farwa nga nḓala na ḓora na tsiku na u rwiwa nga mavili na u sa vha na haya
12 na u shuma nga maanḓa nga zwanḓa zwashu. Musi ri tshi semiwa, ri a fhaṱutshedza; musi ri tshi tovholwa, ri a konḓelela ri sa fheli mbilu;
13 musi ri tshi zwifhelwa, ri fhindula nga vhulenda; u swika zwino ri vho tou nga mathukhwi a shango, tshika ya zwithu zwoṱhe.
14 Ndi khou ni ṅwalela zwenezwi zwithu, hu si uri ndi ni shonise, fhedzi uri ndi ni ṱuṱuwedze sa vhana vhanga vha funwaho.
15 Ngauri naho ni tshi nga vha na vhatsireledzi vha zwigidi zwa fumi malugana na Kristo, ngoho ndi ya uri a ni na vhokhotsi vhanzhi; ngauri malugana na Kristo Yesu ndo vha khotsi aṋu nga mafhungo maḓifha.
16 Nga zwenezwo, ndi a ni humbela uri ni vhe vha edzisaho nṋe.
17 Ndi ngazwo ndi tshi khou ruma Timotheo ha inwi, samusi e ṅwana’nga a fulufhedzeaho ane nda mu funa Murenani; nahone u ḓo ni humbudza maitele anga tshumeloni ya Kristo Yesu, samusi ndi tshi funza fhethu hoṱhe zwivhidzoni zwoṱhe.
18 Vhaṅwe vha a ḓikukumusa zwa tou nga ndo vha ndi sa khou ḓa ha inwi.
19 Fhedzi arali Yehova a tshi zwi funa, ndi ḓo ḓa ha inwi hu si kale, nahone a thi nga ṱoḓi u ḓivha zwine vha u ḓikukumusa vha zwi amba, fhedzi ndi ḓo ṱoḓa u ḓivha maanḓa avho.
20 Ngauri Muvhuso wa Mudzimu a u vhonali vhutshiloni ha muthu nga zwine a zwi amba, fhedzi u vhonala nga u vha na maanḓa a Mudzimu.
21 Ndi zwifhio zwine na zwi takalela? Naa ndi ḓe ndo fara ṱhamu, kana ndi ḓe nga lufuno na u vuḓa muyani?
