1 Vhakorinta 6:1-20
6 Naa hu na muṅwe waṋu ane a khou lwa na muṅwe, o ḓiimiselaho u ya khothe uri a ime phanḓa ha vhathu vha songo lugaho, ane a si ṱoḓe u ima phanḓa ha vhakhethwa?
2 Kani a ni zwi ḓivhi uri vhakhethwa vha ḓo haṱula shango? Arali ni tshi ḓo haṱula shango, naa a ni fanelei u haṱula mafhungo a si a ndeme?
3 Naa a ni zwi ḓivhi uri ri ḓo haṱula vharuṅwa? Nga zwenezwo, ndi ngani ri sa haṱuli mafhungo a vhuno vhutshilo?
4 Arali ni na mafhungo a vhuno vhutshilo ane a ṱoḓa u haṱulwa, ndi ngani ni tshi nanga vhane vha nyadzwa nga tshivhidzo uri vha vhe vhahaṱuli vhaṋu?
5 Ndi khou amba zwenezwo uri ni farwe nga ṱhoni. Naa a hu na muthu vhukati haṋu o ṱalifhaho ane a ḓo kona u haṱula Vhakriste ngae?
6 Nṱhani hazwo, Vhakriste vha isana khothe uri milandu yavho i sengiswe nga vhane vha si vhe vhatendi!
7 Ngoho ndi ya uri ni vha ni tshi khou shonisana musi ni tshi hwelelana nga tshaṋu. Ndi ngani ni sa tendi u khakhelwa? Ndi ngani ni sa tendi u fhurwa?
8 Zwo fhambanaho na zwenezwo, ndi inwi ni khakhelaho na u fhura Vhakriste nga inwi.
9 Naa a ni zwi ḓivhi uri vhathu vha songo lugaho a vha nga ḽi ifa ḽa Muvhuso wa Mudzimu? Ni songo fhurwa. Dziphombwe, vhane vha gwadamela midzimu ya zwifanyiso, vhadzia-u-ṱonḓola, vhanna vhane vha dzeana nga tshavho, vhanna vhane vha ita zwa vhudzekani na vhaṅwe vhanna,
10 dzimbava, vhadzia-vhupangwa, zwidakwa, vhane vha semana, mavemu a vha nga ḽi ifa ḽa Muvhuso wa Mudzimu.
11 Vhaṅwe vhaṋu vho vha vha tshi ita zwenezwo. Fhedzi no ṱanzwiwa, no itwa vhakhethwa, no itwa vho lugaho dzinani ḽa Murena washu Yesu Kristo na nga muya wa Mudzimu washu.
12 Kha nṋe zwithu zwoṱhe zwo tendelwa; fhedzi a si zwithu zwoṱhe zwi vhuyedzaho. Kha nṋe zwithu zwoṱhe zwo tendelwa nga mulayo; fhedzi a thi nga tendi u langiwa nga tshiṅwe na tshiṅwe.
13 Zwiḽiwa ndi zwa thumbu, thumbu ndi ya zwiḽiwa; fhedzi Mudzimu u ḓo fhelisa vhuvhili hazwo. Huno muvhili a si wa vhupombwe, fhedzi ndi wa Murena; Murena ndi wa muvhili.
14 Samusi Mudzimu o vusa Murena, u ḓo dovha a vusa na riṋe lufuni nga maanḓa awe.
15 Naa a ni zwi ḓivhi uri mivhili yaṋu ndi miraḓo ya Kristo? Naa ndi nga dzhia miraḓo ya Kristo nda i ita miraḓo ya phombwe? Na kathihi!
16 Naa a ni zwi ḓivhi uri ane a vha na vhushaka na phombwe u muvhili muthihi nayo? Ngauri o ri, “vhuvhili havho vha ḓo vha ṋama nthihi.”
17 Fhedzi ane a vha na vhushaka na Murena u na muhumbulo u fanaho na wawe.
18 Shavhani vhupombwe. Tshivhi naho tshi tshifhio tshine muthu a nga tshi ita a tshi kwami muvhili wawe nga ho livhaho, fhedzi ane a dzulela u ita vhupombwe u ita tshivhi tshine tsha kwama muvhili wawe.
19 Naa a ni zwi ḓivhi uri muvhili waṋu ndi thembele ya muya mukhethwa u re ngomu haṋu, we na u wana kha Mudzimu? Zwiṅwe hafhu, ni vha Mudzimu,
20 ngauri no rengwa nga mutengo muhulu. Ngauralo, rendani Mudzimu nga mivhili yaṋu.
