1 Vhakorinta 7:1-40
7 Malugana na zwe na nṅwalela, ndi zwavhuḓi arali munna a sa kwami mufumakadzi;*
2 fhedzi nga mulandu wa u anda ha vhupombwe, munna muṅwe na muṅwe nga a vhe na mufumakadzi wawe na mufumakadzi muṅwe na muṅwe a vhe na munna wawe.
3 Munna nga a fushe ṱhoḓea dza mufumakadzi wawe,* na mufumakadzi a ḓi ita zwi fanaho kha munna wawe.
4 Mufumakadzi ha vhusi muvhili wawe ene muṋe, fhedzi u vhuswa nga munna wawe; nga hu fanaho, na munna ha vhusi muvhili wawe ene muṋe, fhedzi u vhuswa nga mufumakadzi wawe.
5 Ni songo dzimana, nga nnḓa ha musi vhuvhili haṋu no tendelana u litsha lwa tshifhinganyana, uri ni kumedze tshifhinga tshaṋu kha thabelo, ni dovhe ni ṋeane ṱhoḓea dzaṋu, uri Sathane a si dzule a tshi ni linga nga u sa kona haṋu u ḓifara.
6 Naho zwo ralo, ndi khou ni ṋea thendelo ya u ita nga u ralo, a thi khou ni kombetshedza.
7 Fhedzi ndi tama arali vhathu vhoṱhe vha vhe vha tshi nga nṋe. Naho zwo ralo, muṅwe na muṅwe u na tshifhiwa tshawe tshi bvaho ha Mudzimu, vhaṅwe vha a kona u dzula vha siho mbinganoni, fhedzi vhaṅwe vha a vhinga.
8 Huno ndi vhudza vha songo vhingaho na dzitshilikadzi uri ndi zwavhuḓi arali vha dzula vho ralo u fana na nṋe.
9 Fhedzi arali vha sa koni u ḓifara, vha litsheni vha vhinge kana vha vhingwe, ngauri ndi khwine u vhinga nṱhani ha u swa nga nyemulo.
10 Vha re mbinganoni ndi vha ṋea ndaela, a si nṋe, fhedzi ndi Murena, uri mufumakadzi a songo fhandekana na munna wawe;
11 fhedzi zwi re zwone ndi uri, arali a fhandekana nae, kha dzule a songo vhingwa kana a dovhe a pfumedzane na munna wawe; na munna ho ngo fanela u ṱutshela mufumakadzi wawe.
12 Fhedzi kha vhaṅwe ndi ri, a si Murena ndi nṋe: Arali wahashu naho e ufhio e na mufumakadzi ane a si vhe mutendi, o tenda u dzula nae, a songo mu ṱutshela;
13 arali na mufumakadzi e na munna ane a si vhe mutendi, o tenda u dzula nae, a songo ṱutshela munna wawe.
14 Munna ane a si vhe mutendi u vha mukhethwa nga nṱhani ha mufumakadzi wawe, na mufumakadzi ane a si vhe mutendi u vha mukhethwa nga nṱhani ha wahashu; arali zwi vhe zwi songo ralo, vhana vhaṋu vho vha vha tshi ḓo vha vhe na dzitshika, fhedzi vho kuna.
15 Fhedzi arali ane a si vhe mutendi a ita phetho ya u ṱuwa,* kha ṱuwe; munna wa mutendi kana mufumakadzi wa mutendi ha tsha vhofhea u dzula na onoyo ane a si vhe mutendi, fhedzi Mudzimu o ni ṋea mulalo.
16 Iwe mufumakadzi, u zwi ḓivha hani arali u tshi ḓo tshidza munna wau? Kana iwe munna, u zwi ḓivha hani arali u tshi ḓo tshidza mufumakadzi wau?
17 Samusi Yehova o ṋea muṅwe na muṅwe mukovhe wawe, muṅwe na muṅwe kha tshimbile u ya nga he Mudzimu a mu vhidza ngaho. Nga zwenezwo, ndi ṋea yeneyi ndaela zwivhidzo zwoṱhe.
18 Naa hu na munna naho e ufhio we a vhidzwa o fumba? Nga a dzule o ralo. Naa hu na munna naho e ufhio we a vhidzwa a songo fumba? A songo fumba.
19 U fumba a zwi ambi tshithu, na u sa fumba a zwi ambi tshithu, fhedzi tshine tsha vha tsha ndeme ndi ndaela dza Mudzimu.
20 Hu sa londwi vhuimo he muṅwe na muṅwe a vhidzwa e khaho, nga a dzule e khaho.
21 Naa wo vhidzwa u mulanda? Zwenezwo zwi songo u dina; fhedzi arali u tshi nga kona u vhofholowa, shumisa tshenetsho tshibuli.
22 Ngauri muṅwe na muṅwe we a vhidzwa Murenani e mulanda ndi muḓilangi nahone ndi wa Murena; nga hu fanaho na we a vhidzwa o vhofhololwa ndi mulanda wa Kristo.
23 No rengwa nga mutengo muhulu; litshani u vha vhalanda vha vhathu.
24 Vhahashu, hu sa londwi vhuimo he muṅwe na muṅwe a vhidzwa e khaho, nga a dzule e khaho phanḓa ha Mudzimu.
25 Huno malugana na vhaṱhannga na vhasidzana* a thi na ndaela i bvaho ha Murena, fhedzi ndi khou amba mavhonele anga sa o sumbedzwaho khathutshelo nga Murena uri ndi fulufhedzee.
26 Nga nṱhani ha zwenezwo, ndi humbula uri ndi zwavhuḓi uri muthu a bvele phanḓa e zwine a vha zwone malugana na vhuimo ha zwino.
27 Naa u na mufumakadzi? U songo mu ṱutshela. Naa a wo ngo vhinga? U songo ṱoḓa mufumakadzi.
28 Fhedzi naho wa vhinga, u ḓo vha u songo ita tshivhi. Arali muthu a sa athu ita zwa vhudzekani a vhinga kana a vhingwa, na onoyo u ḓo vha a songo ita tshivhi. Naho zwo ralo, vhane vha vhinga kana vha vhingwa vha ḓo pfa vhuṱungu ṋamani. Fhedzi ndi khou ni tsireledza.
29 Zwiṅwe hafhu, ndi a ni vhudza vhahashu, tshifhinga tsho salaho ndi tshiṱuku. U bva zwino vha re na vhafumakadzi vha nge a vha na,
30 na vha lilaho vha nge vha sa liliho, na vhane vha takala vha nge vha songo takalaho, na vhane vha renga vha nge vha si na tshithu,
31 na vha shumisaho zwi re shangoni vha nge avho vhane vha sa ḽi shumise nga vhuḓalo; ngauri zwithu zwine zwa khou itea shangoni zwi khou shanduka.
32 Vhukuma, a thi ṱoḓi ni tshi vhilaela. Munna a songo vhingaho u vhilaelela zwithu zwa Murena, uri a takalelwe nga Murena.
33 Fhedzi munna o vhingaho u vhilaelela zwithu zwa shango, uri a takalelwe nga mufumakadzi wawe,
34 u a thithisea. Zwiṅwe hafhu, mufumakadzi a songo vhingwaho kana musidzana,* u vhilaelela zwithu zwa Murena, uri a vhe mukhethwa muvhilini wawe na muhumbuloni wawe. Naho zwo ralo, mufumakadzi o vhingwaho u vhilaelela zwithu zwa shango, uri a takalelwe nga munna wawe.
35 Fhedzi ndi khou zwi ambela uri ni vhuyelwe, hu si uri ndi ni dzivhise, ndi khou ṱoḓa u ni ṱuṱuwedzela zwo teaho vha siho mbinganoni na uri ni shumele Mudzimu nga mbilu yoṱhe ni sa thithisei.
36 Arali muthu a songo vhingaho a tshi pfa uri ha nga ḓo kona u langa lutamo lwa zwa vhudzekani, arali o no pfuka miṅwaha ya vhuswa, hezwi ndi zwine a fanela u zwi ita: nga a vhinge arali hu zwenezwo zwine a zwi ṱoḓa; u vha a sa khou ita tshivhi. Vha litsheni vha vhinge kana vha vhingwe.
37 Fhedzi arali muthu o ḓiimisela mbiluni yawe, a tshi pfa hu si na ṱhoḓea ya u vhinga, a tshi kona u ḓilanga, o ita phetho mbiluni yawe uri a nga si vhinge kana u vhingwa, u ḓo vha o ita zwavhuḓi.
38 Nga nṱhani ha zwenezwo, ane a vhinga u a vhuyelwa, fhedzi ane a si vhinge u ḓo vhuyelwa vhukuma.
39 Mufumakadzi u vha o vhofhea musi munna wawe a tshi kha ḓi tshila. Fhedzi arali munna wawe a fa, o vhofhololwa uri a nga vhingwa nga ane a mu funa, hu vhe Murenani fhedzi.
40 U ya nga mavhonele anga, u a takala nga maanḓa arali a dzula a songo vhingwa, zwi re zwone ndi humbula uri na nṋe ndi na muya wa Mudzimu.
Ṱhaluso dzi re magumoni a siaṱari
^ Khamusi zwi nga amba “u sa vhinga na u ita zwa vhudzekani.”
^ Zwenezwi zwi ambela kha zwa vhudzekani.
^ Kana “u fhandekana.”
^ Ipfi ḽa Lugerika ḽi ambela kha vhaṱhannga na vhasidzana vha sa athu ita zwa vhudzekani.
^ Ipfi ḽa Lugerika ḽi ambela kha muthu wa tshisadzini a sa athu ita zwa vhudzekani.
