1 Vhakorinta 8:1-13
8 Malugana na zwiḽiwa zwo ṋekedzwaho midzimu ya zwifanyiso: ri a zwi ḓivha uri roṱhe ri na nḓivho. Nḓivho i nga ita uri ri ḓikukumuse, fhedzi lufuno lu a fhaṱa.
2 Arali hu na ane a humbula uri u ḓivha zwiṅwe zwithu, ha athu zwi ḓivha zwavhuḓi u ya nga nḓila ine a fanela u zwi ḓivha ngayo.
3 Fhedzi arali muthu a tshi funa Mudzimu, onoyo u ḓivhiwa ngae.
4 Malugana na u ḽa zwiḽiwa zwo ṋekedzwaho midzimu ya zwifanyiso, ri a zwi ḓivha uri midzimu ya zwifanyiso a i tshithu shangoni, na uri Mudzimu ndi muthihi fhedzi.
5 Naho hu na zwine zwa vhidzwa “midzimu,” ṱaḓulu kana kha ḽifhasi, samusi hu na “midzimu” minzhi na “marena” manzhi,
6 kha riṋe hu na Mudzimu muthihi fhedzi, ane a vha Khotsi ashu wa ṱaḓulu, ndi ene o sikaho zwithu zwoṱhe, na riṋe ro sikwa ngae; hu na Murena muthihi, Yesu Kristo, zwoṱhe zwo vha hone ngae, na riṋe ro vha hone nga nṱhani hawe.
7 Ngauri a si vhoṱhe vhane vha vha na yeneyi nḓivho; ngauri vhaṅwe vho vha vha tshi rabela midzimu ya zwifanyiso, musi vha tshi ḽa zwiḽiwa na u zwi dzhia zwi zwo ṋekedzwaho midzimu ya zwifanyiso, luvalo lwavho lu songo gudiswaho lu a tshikafhala.
8 Fhedzi zwiḽiwa zwi nga si ri sendedze tsini-tsini na Mudzimu; arali ri sa ḽi, a ri shayi tshithu, arali ri tshi ḽa, a ri vhuyelwi nga tshithu.
9 Ni dzule no fhaṱuwa uri ndugelo yaṋu ya u nanga i si vhe tshikhukhulisi kha vha shayaho nungo.
10 Arali iwe u re na nḓivho wa vhonwa nga muṅwe muthu wo dzula u tshi khou ḽa zwiḽiwa thembeleni ya midzimu ya zwifanyiso, naa luvalo lwa onoyo muthu a shayaho nungo lu nga si mu ṱuṱuwedzele uri a ḽe zwiḽiwa zwo ṋekedzwaho midzimu ya zwifanyiso?
11 Zwi re zwone ndi uri nga nḓivho yau, muthu a shayaho nungo u a khukhulisea, na Kristo o fela onoyo wahau.
12 Musi ni tshi khakhela vhahaṋu na u huvhadza luvalo lwavho lu songo gudiswaho, ni vha ni tshi khou ita tshivhi kha Kristo.
13 Arali zwiḽiwa zwi tshi ita uri wahashu a khukhulisee, a thi tsha ḓo dovha nda ḽa ṋama na luthihi, uri ndi sa ḓo khukhulisa wahashu.
