1 Vhakorinta 9:1-27
9 Naa a tho ngo vhofholowa? Naa a thi muapostola? Naa a tho ngo vhona Yesu Murena washu? Naa a no ngo vha hone nga nṱhani ha mushumo wanga Murenani?
2 Naho ndi si muapostola kha vhaṅwe, zwi re zwone ndi uri ndi muapostola kha inwi, ni vhuṱanzi vhu sumbedzaho uri ndi muapostola wa Murena.
3 Nḓila ine nda ḓiimelela ngayo kha vhane vha nkhaṱula ndi heyi:
4 Naa a ri na ndugelo ya u ḽa na u nwa?
5 Naa a ri na ndugelo ya u fhelekedzwa nga mufumakadzi wa mutendi, u fana na vhaṅwe vhaapostola vhoṱhe na vharathu vha Murena na Kefa?
6 Kani ndi nṋe na Baranaba fhedzi vha si na ndugelo ya u litsha u ita mushumo wa u ḓitshidza?
7 Ndi ḽifhio swole ḽine ḽa nga shuma nga tshinyalelo dzaḽo? Ndi nnyi ane a nga lima tsimu ya minḓirivhe nahone a si ḽe mitshelo yayo? Kana ndi nnyi ane a lisa sambi a si ḽe maṅwe a mafhi a sambi ḽeneḽo?
8 Kani ndi khou amba u ya nga mavhonele a vhathu? Kana naa Mulayo a u dovhi wa amba zwenezwi zwithu?
9 Ngauri kha mulayo wa Mushe ho ṅwalwa ha pfi: “U songo vhofha phulu mulomo musi i tshi khou fhula thoro.” Naa Mudzimu u khou vhilaela nga ha dziphulu?
10 Kani o zwi amba a tshi itela riṋe? Vhukuma, zwo ṅwalelwa riṋe, ngauri ane a lima na ane a fhula u fanela u zwi ita e na fulufhelo ḽa uri u ḓo ḽa zwenezwo.
11 Arali ro zwala zwithu zwi bvaho ha Mudzimu kha inwi, naa zwi ḓo vha zwo khakhea arali ra kaṋa zwithu zwi vhonalaho zwi bvaho ha inwi?
12 Arali vhaṅwe vhathu vhe na ndugelo ya u ni vhila zwenezwo zwithu, naa na riṋe a ri na ndugelo i fhiraho yeneyo? Naho zwo ralo, a ro ngo shumisa yeneyo ndugelo, fhedzi ri khou konḓelela zwithu zwoṱhe, uri ri si thivhele mafhungo maḓifha a ambaho nga Kristo nga nḓila naho i ifhio.
13 Naa a ni zwi ḓivhi uri vhathu vhane vha ita tshumelo khethwa vha ḽa zwithu zwa thembeleni, na uri vhane vha shuma tshifhinga tshoṱhe aletareni vha wana mukovhe u bvaho kha aletare?
14 Nga yeneyo nḓila, Murena o laedza vhane vha fanela u ḓivhadza mafhungo maḓifha uri vha ḓikanzwe ngao.
15 Fhedzi a tho ngo shumisa na nthihi ya dzenedzo ndugiselelo. Vhukuma, a tho ngo ṅwala zwenezwi zwithu uri ndi itelwe zwone, ndi khwine u fa nṱhani ha u dzhielwa zwiitisi zwanga zwa u ḓihudza!
16 Huno arali ndi tshi khou ḓivhadza mafhungo maḓifha, a thi na tshiitisi tsha u ḓikukumusa ngauri ndo ṋewa vhuḓifhinduleli. Khombo kha nṋe arali ndi sa ḓivhadzi mafhungo maḓifha!
17 Arali ndi tshi ita zwenezwo nga u ḓifunela, ndi na malamba; fhedzi arali ndi tshi tou ḓikombetshedza, naho zwo ralo, ndo ṋewa vhuḓifhinduleli.
18 Nga zwenezwo, malamba anga ndi afhio? Uri naho ndo ḓivhadza mafhungo maḓifha hu si na mbadelo, uri ndi si shumise ndugelo yanga luvhi kha mafhungo maḓifha.
19 Naho ndo vhofholowa kha vhathu vhoṱhe, ndo ḓiita mulanda kha vhoṱhe, uri ndi kunge vhathu vhanzhi nga hune zwa nga konadzea ngaho.
20 Kha Vhayuda, ndo ḓiita Muyuda, uri ndi kunge Vhayuda; kha vhane vha vha nga fhasi ha mulayo, ndo ḓiita ane a nga u fhasi ha mulayo, naho nṋe muṋe ndi siho fhasi ha mulayo, uri ndi kone u kunga vha re fhasi ha mulayo.
21 Kha vha si na mulayo ndo ḓiita a si na mulayo, naho ndi na mulayo phanḓa ha Mudzimu na phanḓa ha Kristo, uri ndi kunge vha si na mulayo.
22 Kha vha shayaho nungo ndo vha a shayaho nungo, uri ndi kunge vha shayaho nungo. Ndo vha zwithu zwoṱhe kha vhathu vha mifuda yoṱhe, uri ndi tshidze vhaṅwe nga hune zwa nga konadzea ngaho.
23 Fhedzi ndi ita zwoṱhe ndi tshi itela mafhungo maḓifha, uri ndi kone u a huwelela kha vhaṅwe.
24 Naa a ni zwi ḓivhi uri vhagidimi vha gidima vhoṱhe mbambeni, fhedzi dzanga ḽa wanwa nga muthihi? Gidimani nga nḓila ine zwa ḓo ita uri ni ḽi wane.
25 Zwiṅwe hafhu, muthu muṅwe na muṅwe ane a dzhenela mbambe u a ḓifara kha zwithu zwoṱhe. Vhukuma, vha zwi itela u wana khare i ṱahalaho, fhedzi riṋe ri wana i sa ṱahali.
26 Nga zwenezwo, a thi gidimi sa muthu ane a si ḓivhe hune a khou ya hone; nḓila ine nda posa ngayo vili a zwi ngi a rwaho muya;
27 fhedzi ndi langa muvhili wanga sa mulanda, uri musi ndo no huwelela kha vhaṅwe, nṋe muṋe ndi si takalelwe nga Mudzimu nga nḓila naho i ifhio.
