1 Vhathesalonika 1:1-10
1 Nṋe Paulo na Silvano na Timotheo ndi ṅwalela tshivhidzo tsha Vhathesalonika vha re na vhuthihi na Mudzimu Khotsi na Murena Yesu Kristo ndi ri:
Vhuthu vhuhulu na mulalo nga zwi vhe na inwi.
2 Tshifhinga tshoṱhe ri livhuha Mudzimu musi ri tshi amba nga ha inwi noṱhe thabeloni dzashu,
3 ngauri a ro ngo vhuya ra litsha u humbula u shuma haṋu nga u fulufhedzea na u ḓinetisa haṋu nga lufuno na u konḓelela zwi tshi itiswa nga fulufhelo ḽine na vha naḽo kha Murena washu Yesu Kristo phanḓa ha Mudzimu washu a re Khotsi.
4 Inwi vhahashu ni funwaho nga Mudzimu, ri a zwi ḓivha uri o ni nanga,
5 ngauri musi ri tshi huwelela mafhungo maḓifha kha inwi, a ro ngo sokou amba fhedzi, fhedzi o vha na ṱhuṱhuwedzo khulwane, a tshi tshimbidzana na u shuma ha muya mukhethwa nahone a ita uri ni vhe na lutendo lwo khwaṱhaho. Na inwi ni a zwi ḓivha uri ro vha ri vhathu vha mufuda-ḓe ri tshi itela uri ni vhuyelwe.
6 Ngauralo, no vha vha edzisaho riṋe na Murena, samusi no ṱanganedza ipfi ni maṱunguni mahulu nga dakalo ḽi ḓiswaho nga muya mukhethwa,
7 nahone no vha tsumbo kha vhatendi vhoṱhe vha ngei Makedonia na ngei Axaya.
8 Zwi re zwone ndi uri ipfi ḽa Yehova a ḽo ngo pfala fhedzi ngei Makedonia na ngei Axaya nga nṱhani haṋu, fhedzi u vha haṋu na lutendo kha Mudzimu zwo phaḓalala fhethu hoṱhe, lune zwi si tsha ṱoḓea uri ri ambe tshithu.
9 Ngauri vhone vhaṋe vho bvela phanḓa vha tshi amba nga nḓila ye ra ṱangana ngayo na inwi lwa u thoma na nḓila ye na ṱutshela ngayo midzimu ya zwifanyiso na shumela Mudzimu a tshilaho wa ngoho
10 na u lindela Murwa wawe a tshi bva ṱaḓulu, we a mu vusa vhafuni, ane a vha Yesu, ane a ri tshidza kha mbiti dzine dza khou ḓa.
