1 Vhathesalonika 2:1-20
2 Vhukuma, inwi vhahashu ni a zwi ḓivha uri u ni dalela hashu ho vha hu si ha fhedzi.
2 Vhunga ni tshi zwi ḓivha uri ro thoma ra tambula na u sa farwa zwavhuḓi ngei Filipi, Mudzimu o ri ṋea tshivhindi tsha uri ri ni ḓivhadze mafhungo maḓifha a Mudzimu ro sedzana na u pikiswa huhulu.
3 Ngauri nyeletshedzo ye ra ni ṋea yone yo vha i songo khakhea kana u vha na zwiṱuṱuwedzi zwivhi kana u vha na vhufhura,
4 fhedzi samusi Mudzimu o vhona ri tshi fanelea uri a ri ṋee mafhungo maḓifha, ngauralo a ro ngo amba uri ri takadze vhathu, fhedzi ro amba uri ri takadze Mudzimu, ane a ṱolisisa mbilu dzashu.
5 Zwi re zwone ndi uri ni a zwi ḓivha uri a ro ngo vhuya ra ni fhura, kana u ita zwithu nga nṱhani ha vhupangwa nahone ra lingedza u zwi dzumba, Mudzimu ndi ene ṱhanzi!
6 A ro ngo ṱoḓa uri ri rendwe nga vhathu kana ri rendwe nga inwi kana nga vhaṅwe, naho ro vha ri tshi nga vha muhwalo u lemelaho samusi ri vhaapostola vha Kristo.
7 Ro ita zwo fhambanaho na zwenezwo, ro ni fara nga vhulenda, u fana na mme a mamisaho a tshi ṱhogomela vhana vhawe nga lufuno.
8 Ngauri ri a ni funa nga maanḓa, a ro ngo takalela u ni ḓivhadza mafhungo maḓifha a Mudzimu fhedzi, fhedzi ro kumedza na vhutshilo hashu nge ra ni funa.
9 Ndi ngoho vhahashu, ni a humbula u shuma hashu na u ḓinetisa hashu nga maanḓa. Ro vha ri tshi shuma vhusiku na masiari uri ri si vhe muhwalo u lemelaho kha muthu naho e ufhio musi ri tshi khou ni ḓivhadza mafhungo maḓifha a Mudzimu.
10 Ni dziṱhanzi, na Mudzimu ndi ṱhanzi ya uri ro vha vha fulufhedzeaho, vho lugaho, na vha sa solei kha inwi vhatendi.
11 Ni a ḓivha zwavhuḓi uri ro dzula ri tshi ni ṱuṱuwedza, u ni khuthadza na u ṱanziela kha muṅwe na muṅwe waṋu, u fana na zwine khotsi a zwi ita kha vhana vhawe,
12 uri ni tshimbile nga nḓila yo fanelaho Mudzimu ane a khou ni vhidza muvhusoni wawe na vhugalani hawe.
13 Ndi ngazwo ri tshi dzulela u livhuha Mudzimu, ngauri musi ni tshi ṱanganedza ipfi ḽa Mudzimu, ḽe na ḽi pfa kha riṋe, a no ngo ḽi ṱanganedza sa ipfi ḽa vhathu, fhedzi no ḽi ṱanganedza sa zwine ḽa vha zwone, sa ipfi ḽa Mudzimu, ḽine ḽa dovha ḽa shuma kha inwi vha tendaho.
14 Ngauri inwi vhahashu no edzisa tsumbo ya zwivhidzo zwa Mudzimu zwi re na vhuthihi na Kristo Yesu zwine zwa vha ngei Yudea, ngauri na inwi no tambudzwa nga vhathu vha shangoni ḽa haṋu nga nḓila i fanaho na ye vhahashu vha ngei Yudea vha tambudzwa ngayo nga Vhayuda,
15 vhe vha ita na u vhulaha Murena Yesu na vhaporofita na u ri tovhola. Zwiṅwe hafhu, a vha khou takadza Mudzimu, fhedzi vha khou ita zwithu zwine zwi si vhuyedze vhathu vhoṱhe
16 musi vha tshi lingedza u ri thivhela uri ri si ambe na vhathu vha dzitshaka uri vha tshidzwe. Nga u ita nga u ralo, vha dzulela u ita zwivhi zwinzhi. Fhedzi mbiti dzawe dzo fhedzisela dzo vha ḓela.
17 Fhedzi vhahashu, musi ro ṱuwa lwa tshifhinganyana, (nga lwa ṋama, fhedzi ro vha ri tshi dzula ri tshi ni humbula) nga nṱhani ha tshiṱuvho tshashu, ro ita vhuḓidini vhuhulwane uri ri ḓe ri ni vhone.
18 Nga tshenetshi tshiitisi ro vha ri tshi ṱoḓa u ḓa ha inwi; nṋe Paulo ndo lingedza luvhili, fhedzi Sathane a ri thivhela nḓila.
19 Naa inwi a ni fulufhelo ḽashu kana dakalo kana dzanga ḽi itaho uri ri fhululedze phanḓa ha Murena washu Yesu?
20 Vhukuma, ni vhugala na dakalo ḽashu.
