1 Vhathesalonika 3:1-13
3 Ngauralo, musi ri si tsha kona u konḓelela, ro humbula uri zwi ḓo vha khwine uri ri sale ri roṱhe Athene;
2 nahone ro mbo ḓi ruma wahashu Timotheo, muḓinḓa wa Mudzimu ane a ḓivhadza mafhungo maḓifha nga ha Kristo, uri a ni khwaṱhise, a ni khuthadze a tshi itela lutendo lwaṋu,
3 uri hu si vhe na muthu ane a tsikeledzwa nga enea maṱungu. Ngauri ri nga si iledze u tambudzwa nga zwithu zwo raloho.
4 Ngauri musi ri na inwi, ro vha ri tshi ni vhudza hu tshee nga phanḓa uri ri ḓo sedzana na maṱungu, nahone zwa itea nga u ralo, samusi ni tshi zwi ḓivha.
5 Ndi ngazwo musi ndi si tsha kona u konḓelela, ndo mu ruma uri ndi ḓivhe mafhungo avhuḓi a lutendo lwaṋu arali lu tshee lwo khwaṱha, uri khamusi Mulingi a sa ḓo vha o ni linga nga iṅwe nḓila, na uri mushumo washu u si vhe wa mahandana.
6 Fhedzi Timotheo o ḓa kha riṋe a tshi bva ha inwi nahone a ri vhudza mafhungo avhuḓi nga ha lutendo lwaṋu na lufuno lwaṋu, na uri tshifhinga tshoṱhe ni a takala musi ni tshi ri humbula, na uri no ṱulutshelwa u ri vhona samusi na riṋe ro ṱulutshelwa u ni vhona.
7 Vhahashu, ndi ngazwo no ri khuthadza musi ro tsikeledzea na musi ri maṱunguni ashu oṱhe nga nṱhani ha u fulufhedzea he na hu sumbedza.
8 Ngauri ni ima no khwaṱha Murenani, zwenezwo zwi a ri khwaṱhisa.
9 Ngauralo, ri livhuha Mudzimu nga nṱhani haṋu ngauri no ita uri ri takale vhukuma,
10 vhusiku na masiari ri rabela zwi tshi bva mbiluni uri ri ni vhone na uri ri ni thuse nga zwine na zwi shaya uri ri khwaṱhise lutendo lwaṋu.
11 Mudzimu ane a vha Khotsi ashu na Murena washu Yesu nga a ite uri zwi konadzee u ḓa ha inwi.
12 Zwiṅwe hafhu, Murena nga a ite uri u funana haṋu na u funa vhoṱhe zwi engedzee, vhunga na riṋe ri tshi ni funa;
13 uri a khwaṱhise mbilu dzaṋu, uri ni vhe vha sa solei na u vha vhakhethwa phanḓa ha Mudzimu ane a vha Khotsi ashu na phanḓa ha Murena washu Yesu khathihi na vhakhethwa vhawe vhoṱhe.
