1 Vhathesalonika 4:1-18
4 Tsha u fhedza vhahashu, vhunga no ṱanganedza nyeletshedzo dzi bvaho kha riṋe malugana na nḓila ine na fanela u tshimbila ngayo uri ni takadze Mudzimu samusi ni tshi khou ita zwenezwo, ri ni ṱuṱuwedza na u ni humbela dzinani ḽa Murena Yesu uri ni bvele phanḓa ni tshi ita zwenezwo nga vhuḓalo.
2 Ngauri ni a ḓivha nyeletshedzo dze ra ni ṋea dzone dzinani ḽa Murena Yesu.
3 Ngauri zwenezwi ndi zwine Mudzimu a zwi funa, uri ni fanela u vha vhakhethwa na uri ni fanela u iledza vhupombwe.
4 Muṅwe na muṅwe waṋu u fanela u ḓivha nḓila ine a nga langa ngayo muvhili wawe nga nḓila ine wa ḓo vha mukhethwa na u ṱhonifheaho,
5 hu si nga u vha na nyemulo dza zwa vhudzekani dzo kalulaho u fana na vha dzitshaka vha sa ḓivhi Mudzimu.
6 A ho ngo fanela u vha na muthu ane a huvhadza na u khakhela wahawe kha enea mafhungo, ngauri Yehova u ḓo pfisa vhuṱungu vhane vha ita zwenezwo zwithu zwoṱhe, samusi ro ni vhudza hu tshee nga phanḓa nahone ri khou dovha ra ni ṱalutshedza zwavhuḓi.
7 Ngauri Mudzimu ho ngo ri vhidzela vhuyaḓa, fhedzi o ri vhidzela vhukhethwa.
8 Nga zwenezwo, muthu ane a sumbedza lunyadzo ha nyadzi muthu, fhedzi u nyadza Mudzimu, we a ni ṋea muya wawe mukhethwa.
9 Naho zwo ralo, malugana na lufuno lwa vhurathu na vhukomana, a zwi ṱoḓei uri ri ni ṅwalele nga hazwo, ngauri Mudzimu o ni gudisa uri ni funane;
10 zwi re zwone ndi uri ni khou ita zwenezwo kha vhahashu vhoṱhe kha ḽoṱhe ḽa Makedonia. Vhahashu, ri a ni ṱuṱuwedza uri ni bvele phanḓa ni tshi ita zwenezwo nga vhuḓalo.
11 Ni zwi ite tshipikwa u tshila nga mulalo nahone ni songo dzhenelela kha mafhungo a vhaṅwe, ni shume nga zwanḓa zwaṋu samusi ro ni eletshedza;
12 uri ni tshimbile nga nḓila yo kunaho kha vhathu vha re nnḓa ha tshivhidzo na uri hu si vhe na tshithu na tshithihi tshine na tshi shaya.
13 Zwiṅwe hafhu, vhahashu, a ri ṱoḓi uri ni si ḓivhe nga ha vho faho; uri ni si ṱungufhale u fana na zwine vhaṅwe vhoṱhe vha ita nga u sa vha na fulufhelo.
14 Arali ri na lutendo lwa uri Yesu o fa nahone a dovha a vuswa, vhe vha fa vhe vhathihi na Yesu, Mudzimu u ḓo vha vusa khathihi nae.
15 Ngauri zwenezwo ndi zwine ra ni vhudza nga ipfi ḽa Yehova, uri riṋe vhane ra ḓo vha ri tshi khou tshila tshifhingani tsha u vha hone ha Murena ri nga si ḓo vuswa phanḓa ha vho faho;
16 Murena u ḓo tsa a tshi bva ṱaḓulu, a ṋea ndaela nga ipfi ḽa muruṅwa muhulwane na phalaphala ya Mudzimu, nahone vhe vha fa vhe vhathihi na Kristo vha ḓo vuswa u thoma.
17 Nga murahu ha zwenezwo, riṋe vhane ra khou tshila ri ḓo takulelwa makoleni khathihi navho, uri ri ṱangane na Murena tshikhalani; nga zwenezwo ri ḓo vha ri na Murena misi yoṱhe.
18 Ngauralo, dzulani ni tshi khuthadzana nga enea maipfi.
