1 Vhathesalonika 5:1-28
5 Vhahashu, malugana na zwifhinga, a zwi ṱoḓei uri ndi ni ṅwalele tshithu.
2 Ngauri inwi ni a zwi ḓivha zwavhuḓi uri ḓuvha ḽa Yehova ḽi ḓo ḓa sa mbava ine ya ḓa vhusiku.
3 Nga tshifhinga tshine vha ḓo ri: “Mulalo na u tsireledzea!” ndozwo i ḓo vha ḓela vha songo zwi lavhelela sa vhuṱungu vhune ha pfiwa nga mufumakadzi musi e tsini na u beba; nahone a vha nga ponyoki na khathihi.
4 Fhedzi inwi vhahashu, a ni swiswini lune ḽeneḽo ḓuvha ḽa ḓo ni ḓela ni songo zwi lavhelela u fana na musi ḓuvha ḽi tshi ṱavhela dzimbava,
5 ngauri inwi noṱhe ni vharwa vha tshedza na vharwa vha masiari. Riṋe a ri vha vhusiku kana vha swiswi.
6 Nga zwenezwo-ha, ri songo eḓela u fana na vhaṅwe vhoṱhe, fhedzi kha ri dzule ro fhaṱuwa na u dzula ro dzivhuluwa.
7 Ngauri vhane vha eḓela kanzhi vha eḓela vhusiku, na vhane vha kambiwa kanzhi vha kambiwa vhusiku.
8 Fhedzi riṋe ri vha masiari, kha ri dzule ro dzivhuluwa, ro tsireledza khana nga lutendo na lufuno nahone ri ambare fulufhelo ḽa u tshidzwa sa gondolo;
9 ngauri Mudzimu ho ngo ri haṱulela mbiti, fhedzi o ita uri ri tshidzwe nga Murena washu Yesu Kristo.
10 O ri fela, hu sa londwi uri ro fhaṱuwa kana ro eḓela, ri fanela u tshila khathihi nae.
11 Ngauralo, bvelani phanḓa ni tshi ṱuṱuwedzana ni tshi fhaṱana, samusi ni tshi khou ita nga u ralo.
12 Huno vhahashu ri khou ni humbela uri ni ṱhonifhe vhane vha shuma nga maanḓa vhukati haṋu na vhane vha ni ingamela Murenani na vhane vha ni eletshedza;
13 ni vha fune na u vha hulisa nga maanḓa nga nṱhani ha mushumo wavho. Ni vhe na mulalo na muṅwe na muṅwe.
14 Vhahashu, kha ḽiṅwe sia ri a ni ṱuṱuwedza uri ni sevhe vha sa tshimbili nga maitele a Mudzimu, ṱuṱuwedzani vho tsikeledzeaho, tikedzani vha shayaho nungo, vhathu vhoṱhe ni songo vha fhelela mbilu.
15 Ni ite vhungoho ha uri hu si vhe na ane a lifhedza vhuvhi nga vhuvhi, fhedzi ni dzule ni tshi fhisetshela u itelana zwivhuya na u zwi itela vhaṅwe vhoṱhe.
16 Ni dzule no takala.
17 Ni dzule ni tshi rabela.
18 Ni livhuhe zwoṱhe, ngauri zwenezwi ndi zwine Mudzimu a funa ni tshi zwi ita samusi ni vhatevheli vha Kristo Yesu.
19 Ni songo dzima mulilo wa muya mukhethwa.
20 Ni songo nyadza vhuporofita!
21 Ṱolisisani zwithu zwoṱhe; ni farelele kha zwo lugaho.
22 Iledzani vhuvhi hoṱhe.
23 Ndi rabela uri Mudzimu wa mulalo a ni ite vhakhethwa tshoṱhe tshumeloni yawe. Mavhonele aṋu na mbilu na mivhili yaṋu vhahashu, zwi vhe zwo vhulungwaho tshoṱhe, zwi sa solei tshifhingani tsha u vha hone ha Murena washu Yesu Kristo.
24 Ane a khou ni vhidza u a fulufhedzea, nahone u ḓo zwi ita zwa vhukuma.
25 Vhahashu, bvelani phanḓa ni tshi ri rabelela.
26 Ni lumelise vhahashu vhoṱhe nga khisi khethwa.*
27 Ndi khou ni humbela nga dzina ḽa Murena uri lwonolwu luṅwalo lu vhalelwe vhahashu vhoṱhe.
28 Vhuthu vhuhulu ha Murena washu Yesu Kristo vhu vhe na inwi.
Ṱhaluso dzi re magumoni a siaṱari
^ Yeneyo ndi nḓila ye Vhakriste vha vha vha tshi lumelisana ngayo musi vha tshi ṱangana.
