1 Yohane 3:1-24
3 Vhonani uri Khotsi o ri sumbedza lufuno-ḓe, uri ri vhidzwe uri ri vhana vha Mudzimu; nahone ndi zwine ra vha zwone. Ndi ngazwo shango ḽi sa ri ḓivhi, ngauri a ḽi mu ḓivhi.
2 Vhafunwa, zwino ri vhana vha Mudzimu, huno zwine ra ḓo vha zwone a zwi athu vhonala. Ri a ḓivha uri musi a tshi vhonala ri ḓo nga ene, ngauri ri ḓo vhona zwine a vha zwone.
3 Nahone muṅwe na muṅwe ane a vha na ḽeneḽi fulufhelo u a ḓikunakisa samusi na onoyo o kuna.
4 Muṅwe na muṅwe ane a dzulela u ita tshivhi u dovha a pfuka mulayo, samusi na u ita tshivhi hu u pfuka mulayo.
5 Na inwi ni a zwi ḓivha uri onoyo o vhonala uri a fhelise zwivhi zwashu, huno kha ene a hu na tshivhi.
6 Muṅwe na muṅwe ane a dzula e na vhuthihi nae ha dzuleli u ita tshivhi; ane a dzulela u ita tshivhi ha athu mu vhona kana ha mu ḓivhi.
7 Vhana’nga, ni songo tendela muthu naho e ufhio a tshi ni xedza; ane a dzulela u ita zwo lugaho o luga, samusi na onoyo o luga.
8 Ane a dzulela u ita tshivhi u bva ha Diabolo, ngauri Diabolo o ita tshivhi u bva mathomoni. Murwa wa Mudzimu o vhonadzwa nga hetshi tshiitisi: uri a fhelise mishumo ya Diabolo.
9 Muṅwe na muṅwe o bebwaho nga Mudzimu ha dzuleli u ita tshivhi, ngauri mbeu Yawe i dzula kha onoyo, nahone a nga si dzulele u ita tshivhi, ngauri o bebwa nga Mudzimu.
10 Vhana vha Mudzimu na vhana vha Diabolo vha vhonala nga hezwi: Muṅwe na muṅwe a sa dzuleli u ita zwo lugaho ha bvi ha Mudzimu, zwo tou ralo na kha ane a si fune wahawe.
11 Ngauri hoyu ndi mulaedza we na u pfa u bva mathomoni, uri ri fanela uri ri funane;
12 ri songo nga Kaini, ane a bva kha muvhi nahone a vhulaha murathu wawe. Ndi ngani o mu vhulaha? Ngauri mishumo yawe yo vha i mivhi, fhedzi ya murathu wawe yo vha yo luga.
13 Vhahashu, ni songo mangala musi shango ḽi tshi ni vhenga.
14 Ri a zwi ḓivha zwa uri ro fhira lufuni ra ya vhutshiloni, ngauri ri funa vhahashu. Ane a si vhe na lufuno u dzula lufuni.
15 Muṅwe na muṅwe ane a vhenga wahawe ndi muvhulahi, huno ni a zwi ḓivha uri a hu na muvhulahi ane a ḓo wana vhutshilo vhu sa fheli.
16 Nga nṱhani ha zwenezwo, ri vho ḓivha lufuno, ngauri onoyo o kumedza vhutshilo hawe a tshi itela riṋe; na riṋe ri a kombetshedzea u kumedza vhutshilo hashu ri tshi itela vhahashu.
17 Fhedzi arali naho e nnyi e na thundu dzi vhonalaho dza ḽino shango, a vhona wahawe a tshi shaya nahone a si mu pfele vhuṱungu, ri nga amba hani uri u a funa Mudzimu?
18 Vhana’nga, a ro ngo fanela u funa nga u amba fhedzi, fhedzi ri zwi sumbedze nga mishumo na nga ngoho.
19 Ri ḓo ḓivha nga zwenezwi uri ri vha ngoho, nahone ri ḓo vha na vhungoho mbiluni dzashu phanḓa hawe
20 naho mbilu dzashu dzi tshi nga ri vhona mulandu, Mudzimu ndi muhulwane u fhira mbilu dzashu nahone u ḓivha zwithu zwoṱhe.
21 Vhafunwa, arali mbilu dzashu dzi sa ri vhoni mulandu, ri amba na Mudzimu ro vhofholowa;
22 huno tshiṅwe na tshiṅwe tshine ra humbela khae ri a tshi wana, ngauri ri khou tevhedza ndaela dzawe nahone ri khou ita zwine zwa mu takadza.
23 Vhukuma, heyi ndi ndaela yawe ya uri ri vhe na lutendo kha dzina ḽa Murwa wawe Yesu Kristo na uri ri funane, vhunga o ri ṋea ndaela.
24 Zwiṅwe hafhu, ane a tevhedza ndaela dzawe u dzula e na vhuthihi na Mudzimu, na Mudzimu e na vhuthihi na muthu o raloho. Zwi tshi ya nga muya we a ri ṋea wone, ri a ḓivha uri u dzula e na vhuthihi na riṋe.
