1 Yohane 5:1-21
5 Muṅwe na muṅwe ane a tenda uri Yesu ndi Kristo o bebwa nga Mudzimu, huno muṅwe na muṅwe ane a funa Mudzimu u funa na onoyo we a bebwa ngae.
2 Nga nṱhani ha zwenezwi, ri a ḓivha uri ri funa vhana vha Mudzimu, musi ri tshi funa Mudzimu na u tevhedza ndaela dzawe.
3 Ngauri u funa Mudzimu zwi amba uri ri tevhedze ndaela dzawe; nahone ndaela dzawe a dzi konḓi,
4 ngauri muṅwe na muṅwe we a bebwa nga Mudzimu u kunda shango. Huno gundo ḽe ḽa kunda shango ndi lutendo lwashu.
5 Ndi nnyi ane a nga kunda shango? Naa a si ane a tenda uri Yesu ndi Murwa wa Mudzimu?
6 Onoyo ndi we a vha hone nga maḓi na nga malofha, Yesu Kristo; ho ngo vha hone nga maḓi fhedzi, fhedzi o vha hone nga maḓi na nga malofha. Huno muya ndi wone une wa ṱanziela, ngauri muya ndi ngoho.
7 Ngauri hu na zwithu zwiraru zwine zwa ṱanziela,
8 ndi muya, maḓi na malofha, huno vhuraru hazwo zwi a tendelana.
9 Arali ri tshi ṱanganedza vhuṱanzi vhune vhathu vha vhu ṋea, vhuṱanzi vhune Mudzimu a vhu ṋea ndi vhuhulwane u vhu fhira. Ngauri hovhu ndi vhuṱanzi vhune Mudzimu a vhu ṋea, ha u ri ṱanziela nga ha Murwa wawe.
10 Muthu ane a vha na lutendo kha Murwa wa Mudzimu u na vhuṱanzi ngomu hawe. Muthu a si na lutendo kha Mudzimu u mu ita muzwifhi, ngauri ho ngo vha na lutendo kha vhuṱanzi he Mudzimu a vhu ṋea malugana na Murwa wawe.
11 Hovhu ndi hone vhuṱanzi ha uri Mudzimu o ri ṋea vhutshilo vhu sa fheli, honovhu vhutshilo vhu kha Murwa wawe.
12 A re na Murwa u na honovhu vhutshilo; ane a si vhe na Murwa wa Mudzimu ha na honovhu vhutshilo.
13 Ndi khou ni ṅwalela zwenezwi uri ni ḓivhe uri ni na vhutshilo vhu sa fheli, inwi vha re na lutendo dzinani ḽa Murwa wa Mudzimu.
14 Huno fulufhelo ḽine ra vha naḽo khae ndi heḽi, naho tshi tshini tshine ra nga tshi humbela tshi tshimbidzanaho na zwine a zwi funa, u a ri pfa.
15 Zwiṅwe hafhu, arali ri tshi ḓivha uri u a ri pfa musi ri tshi humbela zwiṅwe na zwiṅwe, ri a zwi ḓivha uri ri ḓo wana zwe ra mu humbela zwone.
16 Arali muthu naho e ufhio a vhona wahawe a tshi khou ita tshivhi tshi sa isi lufuni, u fanela u mu rabelela, nahone Mudzimu u ḓo mu ṋea vhutshilo. Zwenezwi zwi ambela kha vha songo itaho tshivhi tshi isaho lufuni. Hu na tshivhi tshi isaho lufuni. Ndi kha tshenetsho tshivhi tshine ndi si mu vhudze uri a rabele.
17 U sa luga hoṱhe ndi tshivhi; fhedzi hu na tshivhi tshine tshi si ise lufuni.
18 Ri a ḓivha uri muthu muṅwe na muṅwe we a bebwa nga Mudzimu ha dzuleli u ita tshivhi, fhedzi We* a bebwa nga Mudzimu u a mu linda, nahone muvhi a nga si mu ite tshithu.
19 Ri a zwi ḓivha uri ri bva ha Mudzimu, huno shango ḽoṱhe ḽi zwanḓani zwa muvhi.
20 Fhedzi ri a ḓivha uri Murwa wa Mudzimu o ḓa a ri ṋea vhuṱali uri ri kone u ḓivha a re wa ngoho. Ri na vhuthihi na onoyo ane a vha wa ngoho, nga nṱhani ha Murwa wawe Yesu Kristo. Onoyu ndi Mudzimu wa ngoho na wa vhutshilo vhu sa fheli.
21 Vhana’nga, ḓilindeni kha midzimu ya zwifanyiso.
Ṱhaluso dzi re magumoni a siaṱari
^ “We” i khou ambela kha Yesu Kristo.
