2 Timotheo 1:1-18
1 Nṋe Paulo, muapostola wa Kristo Yesu nga u funa ha Mudzimu u tendelana na fulufhedziso ḽa vhutshilo ḽine ḽa vha hone nga Kristo Yesu,
2 ndi ṅwalela Timotheo, ṅwana’nga ane nda mu funa ndi ri:
Vhuthu vhuhulu, khathutshelo na mulalo zwi bvaho ha Mudzimu Khotsi na Kristo Yesu Murena washu nga zwi vhe na iwe.
3 Ndi livhuha Mudzimu, ane nda mu itela tshumelo khethwa ndi na luvalo lwo kunaho, u fana na zwe zwa itwa nga vhomakhulukuku wanga, uri ndi si litshe u u humbula kha zwine nda zwi humbela vhusiku na masiari.
4 Ndo ṱulutshelwa u u vhona, samusi ndi tshi dzula ndi tshi humbula miṱodzi yau, uri ndi takale.
5 Ngauri ndi humbula lutendo lwau lu si na muhoyo, lwe lwa thoma u vha na makhulu wau Loisa na mme au Oinike, fhedzi ndi na fulufhelo ḽa uri na kha iwe zwo tou ralo.
6 Nga zwenezwo, ndi a u humbudza uri tshifhiwa tshiḽa tshe Mudzimu a u ṋea tshone musi ndi tshi u vhea zwanḓa, u tshi shumise nga u fhisea zwi tou nga u khou khuṱhedza mulilo.
7 Ngauri Mudzimu ho ngo ri ṋea muya wa u vha magoswi, fhedzi o ri ṋea wa maanḓa, lufuno na u tsha muhumbuloni.
8 Ngauralo, u songo farwa nga ṱhoni musi u tshi ṱanziela nga ha Murena washu kana nga ha nṋe ndi re dzhele nga nṱhani hawe, fhedzi na iwe u ḓiimisele u pfiswa vhuṱungu u tshi itela mafhungo maḓifha nga u ḓitika nga maanḓa a Mudzimu.
9 O ri tshidza na u ri vhidza uri ri vhe vhakhethwa, hu si nga mishumo yashu, fhedzi nga ndivho yawe na nga vhuthu hawe vhuhulu. Ro ṋewa zwenezwi malugana na Kristo Yesu kale-kale,
10 fhedzi zwo itwa uri hu vhonale zwavhuḓi musi hu tshi vhonala Mutshidzi washu, Kristo Yesu, we a fhelisa lufu a bvisela tshedzani vhutshilo na u sa tshinyala nga mafhungo maḓifha
11 e nda nangelwa uri ndi vhe muhuweleli na muapostola na mugudisi wao.
12 Ndi ngazwo ndi tshi khou tambudzwa nga zwenezwi zwithu, fhedzi a thi farwi nga ṱhoni. Ngauri ndi a ḓivha ane nda mu tenda, nahone ndi fulufhela uri u a kona u tsireledza zwoṱhe zwe nda mu ṋea uri a zwi vhulunge u swika nga ḽeneḽo ḓuvha.
13 Bvela phanḓa u tshi farelela maipfi a pfalaho e wa a pfa kha nṋe samusi u tshi khou sumbedza lutendo na lufuno malugana na Kristo Yesu.
14 Tsireledza ḽeneḽi dzanga ḽa ndeme ḽe wa ṋewa ḽone nga muya mukhethwa une ra vha nawo.
15 U a zwi ḓivha uri vhathu vhoṱhe ngei tshiṱirikini tsha Asia vho ntshandukela, u katela na Figelo na Herimogene.
16 Murena nga a khathutshele muṱa wa Onesiforo, ngauri o vha a tshi nkhwaṱhisa tshifhinga tshoṱhe, nahone ho ngo farwa nga ṱhoni naho ndo vhoxwa nga ngeḓane.
17 Nṱhani hazwo, musi e Roma, o nṱoḓa nga vhuronwane a vhuya a nngwana.
18 Murena nga a ite uri a khathutshelwe nga Yehova nga ḽeneḽo ḓuvha. Na mishumo yoṱhe ye a i ita ngei Efesa u a i ḓivha zwavhuḓi.
