2 Timotheo 2:1-26
2 Nga zwenezwo, iwe ṅwana’nga bvela phanḓa u tshi wana maanḓa kha vhuthu vhuhulu vhune ha ḓiswa nga u vha na vhuthihi na Kristo Yesu,
2 na kha zwithu zwe wa vhudzwa nga nṋe zwe zwa khwaṱhisedzwa nga ṱhanzi nnzhi, zwenezwi zwithu u zwi kumedzele vhanna vha fulufhedzeaho, uri na vhone vha kone u funza vhaṅwe.
3 U ḓilugisele u tambula samusi u ḽiswole ḽavhuḓi ḽa Kristo Yesu.
4 A hu na ḽiswole ḽine ḽa ḓidzhenisa kha zwa mabindu, ḽi tshi itela uri ḽi takalelwe nga we a ḽi ṅwalisa uri ḽi vhe ḽiswole.
5 Zwiṅwe hafhu, arali muthu naho e ufhio a tshi ṱanganela kha zwa mitambo ha ambadzwi khare arali a songo ṱanganela u ya nga milayo.
6 Mulimi wa biko u fanela u vha ene wa u thoma u ḽa mitshelo.
7 Dzula u tshi humbula zwine nda khou zwi amba nahone Murena u ḓo ita uri u pfesese zwithu zwoṱhe.
8 U humbule uri Yesu Kristo o vuswa vhafuni nahone o vha e muḓuhulu wa Davida, u ya nga mafhungo maḓifha ane nda a huwelela,
9 ane nda khou tambudzelwa one na u valelwa dzhele sa muitazwivhi. Naho zwo ralo, ipfi ḽa Mudzimu a ḽo ngo vhofhiwa.
10 Ndi zwone zwine zwa ita uri ndi bvele phanḓa ndi tshi konḓelela zwithu zwoṱhe ndi tshi itela vho nangwaho, uri na vhone vha tshidzwe nga Kristo Yesu khathihi na u wana vhugala vhu sa fheli.
11 Mafhungo ane a fulufhedzea khea: Zwa vhukuma ndi uri arali ra fa nae, ri ḓo tshila nae;
12 arali ra bvela phanḓa ri tshi konḓelela, ri ḓo dovha ra vhusa roṱhe sa mahosi; arali ra mu landula, na ene u ḓo ri landula;
13 arali ri sa fulufhedzei, ene u dzula a tshi fulufhedzea, ngauri a nga si ite zwine zwa lwisana na zwine a vha zwone.
14 Dzula u tshi vha humbudza zwenezwi zwithu, u vha laye phanḓa ha Mudzimu uri vha songo lwa nga maipfi, zwithu zwine zwi si vhe na mushumo ngauri zwi huvhadza vho thetshelesaho.
15 Ita zwoṱhe zwi re maanḓani au uri u ḓiṋekedze sa a ṱanganedzeaho phanḓa ha Mudzimu, u mushumi ane a si shoniswe nga zwe a shuma, a faraho ipfi ḽa ngoho nga nḓila yo teaho.
16 Fhedzi u iledze zwiambo zwi si na mushumo zwine zwa tshinya zwikhethwa; ngauri zwi ḓo ita uri hu vhe na mishumo minzhi ya u sa ofha Mudzimu,
17 nahone zwine vha zwi amba zwi ḓo siṱa sa ṅwatela. Himeneo na Fileto ndi vhaṅwe vhavho
18 vhe vha ṱutshela ngoho, vha amba uri mvuwo yo no vha hone; nahone vha khou fhelisa lutendo lwa vhaṅwe.
19 Hu sa londwi zwenezwo, mutheo wa Mudzimu wo khwaṱhaho u ḓi dzula wo ima, u na luswayo lune lwa ri: “Yehova u a ḓivha vha re vhawe,” na uri: “Vhoṱhe vhane vha vhidzelela dzina ḽa Yehova vha fanela u furalela zwi songo lugaho.”
20 Huno nḓuni khulwane a hu na midzio ya musuku na ya tsimbi-tseṱha fhedzi, fhedzi hu dovha ha vha na ya thanda na ya vumba, miṅwe ndi ya ndivho i ṱhonifheaho, fhedzi miṅwe ndi ya ndivho i sa ṱhonifhei.
21 Ngauralo, arali muthu a tshi ḓifhambanya na midzio ya ndivho i sa ṱhonifhei, u ḓo vha mudzio wa ndivho i ṱhonifheaho, u re mukhethwa, u thusaho muṋe wawo, wo lugelaho mishumo mivhuya yoṱhe.
22 Nga zwenezwo, u shavhe nyemulo dza vhuswa, fhedzi u tovhole u luga, lutendo, lufuno, mulalo, u na vhane vha vhidzelela Murena zwi tshi bva mbiluni dzo kunaho.
23 Zwiṅwe hafhu, u iledze khani dza vhutsilu na u shaya nḓivho, u tshi ḓivha uri dzi bveledza dzinndwa.
24 Ngauri mulanda wa Murena ho ngo fanela u lwa, u fanela u vha na vhulenda kha vhoṱhe, a kone u funza, na u kona u ḓifara musi a tshi khakhelwa,
25 a laye mashandukwa o vuḓa; khamusi Mudzimu u ḓo ita uri vha shandule mbilu dzavho, zwi itaho uri vha wane nḓivho yo teaho ya ngoho,
26 na uri vha dzivhuluwe vha ponyoke tshikwekweni tsha Diabolo, ngauri o vha fasha vha tshi kha ḓi tshila uri vha ite zwine a zwi funa.
