2 Timotheo 3:1-17
3 Fhedzi ḓivha hezwi: Maḓuvhani a vhufhelo hu ḓo vha na zwifhinga zwi lemelaho zwi konḓaho u sedzana nazwo.
2 Ngauri vhathu vha ḓo funa vhone vhaṋe fhedzi, vha ḓo vha vhafuni vha tshelede, vhazuwi, vhadzia-u-ḓihudza, vhadzia-maṱamba, vha sa thetshelesi vhabebi, vha sa livhuhi, vha sa fulufhedzei,
3 vha si na lufuno, vha songo ḓiimiselaho u vhofha thendelano naho i ifhio, vhadzia-zwitshele, vha sa koni u ḓifara, vhadzia-khakhathi, vha sa funi zwivhuya,
4 vhafheṱi, vhadzia-swili, vhane vha ḓikukumusa, vhane vha funa miḓifho u fhira Mudzimu,
5 vhane vha ḓiita u nga vho ḓikumedza kha Mudzimu, fhedzi vha sa fulufheli maanḓa awe; u songo konana na vhathu vho raloho.
6 Ngauri kha vhenevho hu bva vhanna vha ṋengeledzaho vha dzhenela vhathu dzinḓuni vha thuba vhafumakadzi vha si na nungo vho lemedzwaho nga zwivhi, vha langwaho nga nyemulo dzo fhamba-fhambanaho,
7 vha dzulela u guda, fhedzi vha kundwa u wana nḓivho yo teaho ya ngoho.
8 Nga nḓila i fanaho na ye Yannesi na Yamburesi vha hanedza ngayo Mushe, na vhenevha vha bvela phanḓa vha tshi hanedza ngoho. Mihumbulo yavho yo tshikafhala, a vha fanelei u ya nga zwilinganyo zwa lutendo.
9 Naho zwo ralo, a vha nga ḓo ita mvelaphanḓa, ngauri vhutsilu havho vhu ḓo vhonala khagala, u fana na vhutsilu ha vhenevho vhanna vhavhili.
10 Fhedzi iwe wo tevhela pfunzo yanga nga vhuronwane, nḓila ine nda tshila ngayo, ndivho yanga, lutendo lwanga, u sa fhela mbilu hanga, lufuno lwanga, u konḓelela hanga,
11 u tovholwa hanga, u tambula hanga, na zwithu zwoṱhe zwe zwa itea kha nṋe ngei Antiokia, Ikonio, na Lisitara, na u tovholwa hoṱhe he nda hu konḓelela; naho zwo ralo, Murena o ntshidza kha zwoṱhe.
12 Zwi re zwone ndi uri vhane vha tama u tshila nga u ḓikumedza kha Mudzimu vhe vhathihi na Kristo Yesu na vhone vha ḓo tovholwa.
13 Fhedzi vhathu vhavhi na vhadzia-vhufhura vha ḓo tou ṋaṋa u ita vhuvhi, vha tshi fhura vhaṅwe na vhone vha tshi fhurwa.
14 Naho zwo ralo, iwe bvela phanḓa kha zwithu zwe wa zwi guda na zwe wa ṱuṱuwedzelwa uri u zwi tende, samusi u tshi ḓivha vhe wa zwi guda khavho
15 nahone wo ḓivha maṅwalo makhethwa u bva hanani, ane a kona u u ṱalifhisa uri u tshidzwe nga u tenda Kristo Yesu.
16 Maṅwalo oṱhe o hevhedzwa nga Mudzimu nahone a a vhuyedza kha u gudisa, kha u kaidza, kha u khakhulula, na kha u laya nga nḓila yo lugaho,
17 uri muthu wa Mudzimu a fanelee nga vhuḓalo, a lugele u ita mushumo muṅwe na muṅwe wavhuḓi.
