2 Timotheo 4:1-22
4 Ndi a u laya nga ho khwaṱhaho phanḓa ha Mudzimu na Kristo Yesu, ane a ḓo haṱula vha tshilaho na vho faho, na nga u vhonala hawe na muvhuso wawe,
2 uri u huwelele fhungo, u ḽi fhisetshele nga zwifhinga zwavhuḓi na zwi konḓaho, kaidza, laya, ṱuṱuwedza, nga u sa fhela mbilu na nga vhutsila ha u funza.
3 Ngauri hu ḓo vha na tshifhinga tshine vha si tsha ḓo thetshelesa pfunzo i pfalaho, fhedzi vha ḓo tevhedza nyemulo dzavho, vha kuvhanganya vhagudisi vhane vha ḓo vha vhudza zwine zwa takadza nḓevhe dzavho.
4 Vha ḓo litsha u thetshelesa ngoho nahone vha thetshelesa ngano dza mazwifhi.
5 Huno iwe dzula wo dzivhuluwa kha zwoṱhe, konḓelela zwi lemelaho, ita mushumo wa muevangeli, khunyeledza vhuḓinḓa hau nga vhuḓalo.
6 Ngauri ndo no ḓi shululwa sa tshinwiwa tshi shelwaho kha tshiṱhavhelo, nahone tshifhinga tsha u vhofhololwa hanga tshi tsini.
7 Ndo lwa nndwa yavhuḓi, ndo ṱhaphudza mbambe, ndo tevhedza lutendo.
8 U bva zwino u ya phanḓa ndo dzula ndo vhetshelwa khare ya u luga ine Murena ane a vha muhaṱuli o lugaho a ḓo nṋea yone sa malamba nga ḽeneḽo ḓuvha, ha nga ḓo ṋea nṋe ndi ndoṱhe, fhedzi u ḓo dovha a ṋea vhoṱhe vhane vha funa a tshi vhonala.
9 U ite zwoṱhe zwi re maanḓani au uri u ḓe kha nṋe nga u ṱavhanya.
10 Ngauri Dema o nṱutshela nge a vha a tshi funa zwithu zwa ano maitele, nahone o ya Thesalonika; Kiresensi o ya Galata, Tito o ya Dalmatia.
11 Ndo sala na Luka fhedzi. U ḓe na Marko, ngauri u a nthusa vhuḓinḓani.
12 Fhedzi ndo ruma Tixiko ngei Efeso.
13 Musi u tshi ḓa, u nḓele na tshiambaro tshe nda tshi sia na Karipo ngei Tiroasi, na mipombo, zwihuluhulu mikumba ya u ṅwalela.
14 Alesandere mufuli wa tsimbi-tswuku o nkhakhela zwihulu. Yehova u ḓo mu lifhedza u ya nga mishumo yawe.
15 Na iwe u mu thanyele, ngauri o pikisa mulaedza washu nga nḓila yo kalulaho.
16 Musi ndi tshi sengiswa lwa u thoma a hu na o imaho na nṋe, vhoṱhe vho nṱutshela—vha songo vhonwa mulandu.
17 Fhedzi Murena o ima tsini na nṋe a nṋea maanḓa, uri a ntshumise uri ndi huwelele nga vhuḓalo na uri tshaka dzoṱhe dzi zwi pfe; nahone ndo ponyokiswa mulomoni wa ndau.
18 Murena u ḓo mponyokisa kha mishumo mivhi yoṱhe nahone u ḓo ntshidza uri ndi ye muvhusoni wawe wa ṱaḓulu. Nga a rendwe lini na lini. Amen.
19 U lumelise Prisika* na Akwila na vha muṱa wa Onesiforo.
20 Erasito o sala Korinta, fhedzi ndo sia Tirofimo ngei Mileto a tshi khou lwala.
21 U ite zwoṱhe zwi re maanḓani au uri u ḓe vhuriha vhu sa athu swika.
Oibulo u a u lumelisa. U lumeliswa na nga Pudensi, Liko, Klaudia na vhatendi vhoṱhe.
22 Murena nga a vhe na mavhonele avhuḓi ane wa a sumbedza. Vhuthu vhuhulu hawe nga vhu vhe na iwe.
Ṱhaluso dzi re magumoni a siaṱari
^ U dovha a vhidzwa “Prisila.”
