2 Vhakorinta 1:1-24
1 Nṋe Paulo, muapostola wa Kristo Yesu nga u funa ha Mudzimu, na wahashu Timotheo ri ṅwalela tshivhidzo tsha Mudzimu tshine tsha vha Korinta, khathihi na vhakhethwa vhoṱhe vha re shangoni ḽoṱhe ḽa Axaya:
2 Vhuthu vhuhulu na mulalo zwi bvaho ha Mudzimu Khotsi ashu na kha Murena Yesu Kristo nga zwi vhe na inwi.
3 Nga hu rendwe Mudzimu ane a vha Khotsi a Murena washu Yesu Kristo, ane a vha Khotsi wa u khathutshela hoṱhe na Mudzimu wa u khuthadza hoṱhe,
4 ane a ri khuthadza kha vhuṱungu hashu hoṱhe, uri ri kone u khuthadza vhaṅwe kha vhuṱungu naho vhu vhufhio nge ra khuthadzwa nga Mudzimu.
5 Ngauri ro tambula zwihulu ri tshi itela Kristo, na Kristo u ri khuthadza nga nḓila khulwane.
6 Arali ri vhuṱunguni, ndi uri ni khuthadzwe na u tshidzwa; arali ri tshi khuthadzwa, ndi uri ni khuthadzwe nga nḓila ine ya ḓo ni thusa u konḓelela u tambula he na riṋe ra sedzana naho.
7 Fulufhelo ḽine ra vha naḽo kha inwi ḽo khwaṱha, ri tshi ḓivha uri samusi na inwi ni tshi khou tambula u fana na riṋe, na inwi ni ḓo khuthadzwa nga nḓila i fanaho.
8 Vhahashu, a ri ṱoḓi uri ni si ḓivhe nga ha u tambula he ra sedzana naho ngei tshiṱirikini tsha Asia, uri ro vha nga fhasi ha mutsiko muhulu lwe ri si kone u konḓelela nga nungo dzashu, nahone ro vha ri si na vhuṱanzi ha uri ri ḓo tshila.
9 Zwi re zwone ndi uri ro pfa ri na vhungoho ha uri ro haṱulelwa lufu. Zwenezwi zwo vha zwi zwa uri ri si ḓifulufhele, fhedzi ri fulufhele Mudzimu ane a vusa vhafu.
10 O ri tshidza kha zwihulwane zwi ngaho sa lufu nahone u ḓo ri tshidza; ri fulufhela ene uri u ḓo bvela phanḓa a tshi ri tshidza.
11 Ni nga dovha na thusa nga u ri rabelela, uri vhanzhi vha ri livhutshele nge ra sumbedzwa tshilidzi musi hu tshi fhindulwa thabelo dza vhathu vhanzhi.
12 Ngauri tshine ra zuwa tshone ndi tsha uri, mvalo dzashu dzi a ṱanziela uri ro ḓifara zwavhuḓi shangoni, zwihuluhulu kha inwi, nga u vha vhakhethwa na nga u fulufhedzea kha Mudzimu, hu si nga vhuṱali ha ṋama, fhedzi nga vhuthu vhuhulu ha Mudzimu.
13 Ngauri a ri khou ni ṅwalela zwiṅwe nga nnḓa ha zwine na vho zwi ḓivha zwavhuḓi na u zwi pfesesa; ndi fulufhela uri ni ḓo bvela phanḓa ni tshi ṱhogomela zwenezwi zwithu u swika vhufheloni,
14 samusi na inwi no zwi pfesesa, ndi riṋe vhane ra ita uri ni zuwe, samusi na inwi ni tshi ḓo ita uri na riṋe ri zuwe nga ḓuvha ḽa Murena washu Yesu.
15 Ngauralo, samusi ndo vha ndi na vhungoho ha zwenezwi, ndo vha ndo dzudzanya hu tshee nga phanḓa u ḓa kha inwi lwa vhuvhili uri ni dovhe ni takale,
16 ndi ḓo fhira ndi tshi ni vhona musi ndi tshi ya Makedonia, nahone ndi ḓo dovha nda ni vhona musi ndi tshi vhuya Makedonia uri ni mphelekedze musi ndi tshi ya Yudea.
17 Naho ndo vha ndo ḓiimisela u ita nga u ralo, naa ndo dzhia eneo mafhungo nga hu leluwaho? Kana ndo dzudzanya zwithu nga lwa ṋama, lune nda amba uri “Ee, Ee” nahone nga murahu nda ri “Hai, Hai”?
18 Fhedzi ri nga fulufhela Mudzimu uri zwine ra ni vhudza zwone a si Ee kana Hai.
19 Ngauri Murwa wa Mudzimu, ane a vha Kristo Yesu, we a huwelelwa vhukati haṋu nga riṋe, zwine zwa amba uri nga nṋe na Silvano na Timotheo, ho ngo vha Ee kana Hai, fhedzi Ee yo vha Ee kha ene.
20 Hu sa londwi uri zwe Mudzimu a zwi fulufhedzisa ndi zwinzhi lungafhani, zwo vha Ee nga ene. Nga zwenezwo, nga ene zwi dovha zwa vha “Amen” ine ya ambelwa kha Mudzimu uri ri mu rende.
21 Fhedzi ndi ene ane a ri khwaṱhisedza uri ri vha Kristo na uri we a ri nanga ndi Mudzimu.
22 O dovha a ri swaya na u ri sumbedza zwine zwa ḓo ḓa, lwonolwo luswayo ndi muya mukhethwa u re mbiluni dzashu.
23 Ndi ṱoḓa uri Mudzimu a vhe ṱhanzi yanga, ya uri ndi sa athu ḓa Korinta ho vha hu u ni vhavhalela.
24 A si uri ri vhavhusi vha lutendo lwaṋu, fhedzi ri vhashumisani vha uri ni takale, ngauri no ima nga lutendo lwaṋu.
