2 Vhakorinta 10:1-18
10 Huno nṋe Paulo, ndi khou ni humbela nga vhulenda na nga vhuthu ha Kristo, uri nṋe ane nda dzhiiwa ndi muṱuku vhukati haṋu, ndi amba nga tshivhindi kha marifhi ane nda ni ṅwalela one.
2 Vhukuma, ndi fulufhela uri musi ndi na inwi ndi si dzhie vhukando ho khwaṱhaho kha vhane vha humbula uri ri ḓifara u ya nga mahumbulele a shango.
3 Naho ri tshi tshimbila nga lwa ṋama, a ri lwi u ya nga zwine ra vha zwone ṋamani.
4 Ngauri zwihali zwa nndwa yashu a si zwa ṋama, fhedzi ndi zwihali zwi re na maanḓa zwe ra zwi ṋewa nga Mudzimu zwa u hanedza pfunzo dza mazwifhi.
5 Ngauri ri khou hanedza mihumbulo ya mazwifhi na zwithithisi zwoṱhe zwine zwa thivhela nḓivho ya Mudzimu, na u kunda mihumbulo yoṱhe uri i pfe Kristo;
6 na u ḓiimisela u pfisa vhuṱungu muthu muṅwe na muṅwe ane a si thetshelese, u swikela a tshi thetshelesa nga ho fhelelaho.
7 Ni haṱula zwithu u ya nga mbonalo yazwo. Arali muthu naho e ufhio a tshi ḓifulufhela uri ndi wa Kristo, nga a elekanye nga ha hezwi: vhunga e wa Kristo, zwo ralo na kha riṋe.
8 Naho arali ndi tshi fanela u zuwa zwihulu nga ha maanḓa e Murena a ri ṋea one ane a vha a u fhaṱa hu si a u thutha, ndi nga si ḓo farwa nga ṱhoni.
9 Ndi khou amba zwenezwi ngauri a thi ṱoḓi uri zwi vhonale u nga ndi khou ni tshuwisa nga marifhi anga.
10 Ngauri vha ri: “Marifhi awe a a lemela nahone a na maanḓa, fhedzi musi e hone u a nyadzea na zwine a amba zwi a nyadzea.”
11 Muthu o raloho nga a zwi ḓivhe uri zwine ra zwi amba marifhini ashu musi ri siho henefho, ri ḓo zwi ita musi ri henefho.
12 Ngauri a ri ḓivhei kha vhuimo ha vhaṅwe kana u ḓivhambedza na vhaṅwe vhane vha ḓithemendela. Musi vha tshi ḓieḓanyisa na vhone vhaṋe na u ḓivhambedza na vhone vhaṋe, a vha pfesesi.
13 Ri nga si zuwe nga zwithu zwi songo katelwaho kha mushumo we ra ṋewa wone uri ri u ite, fhedzi ri ḓo zuwa nga mushumo we Mudzimu a ri ṋea wone, une wa katela u swika kha inwi.
14 A ro ngo shuma mushumo we Mudzimu a si ri ṋee wone musi ri tshi ḓa kha inwi, fhedzi ro vha vha u thoma u ni ḓivhadza mafhungo maḓifha a Kristo.
15 Ri khou zuwa nga ha zwine ra khou zwi ita, hu si nga ha zwine zwa khou itwa nga vhaṅwe vhathu. Ri fulufhela uri lutendo lwaṋu lu ḓo engedzea, uri ni dzhiele nṱha mushumo we ra u ita. Zwenezwi zwi ḓo ri ṱuṱuwedza
16 uri ri ḓivhadze mafhungo maḓifha kha maṅwe mashango, uri ri sa zuwe nga ha mushumo we wa itwa nga vhaṅwe vhathu.
17 “Ane a zuwa, nga a zuwe nga Yehova.”
18 Ngauri ane a takalelwa a si ane a ḓithemendela, fhedzi ndi ane a themendelwa nga Yehova.
