2 Vhakorinta 11:1-33
11 Ndi tama arali ni tshi nga konḓelela vhutsilu hanga vhuṱuku-ṱuku. Fhedzi zwi re zwone ndi uri ni khou vhu konḓelela!
2 Ngauri a thi ṱoḓi uri ni vhe vha muṅwe samusi na Mudzimu a sa zwi ṱoḓi, ngauri ndo ni fulufhedzisa uri ni vhingwe nga munna muthihi, ndi ni ise ha Kristo ni musidzana* o kunaho.
3 Fhedzi ndi vho ofha uri samusi ṋowa yo fhura Eva nga vhukwila hayo, ndi vhilaela uri muṅwe muthu a nga vha o ni tshinya mihumbulo uri ni si fulufhedzee na uri ni vhe na tshika phanḓa ha Kristo.
4 Arali muṅwe muthu a ḓa a huwelela nga ha muṅwe Yesu nga nnḓa ha we ra mu huwelela, kana muṅwe a ni ḓisela muya nga nnḓa ha we na u ṱanganedza, kana mafhungo maḓifha nga nnḓa ha e na a ṱanganedza, ni a mu tendela.
5 Ngauri ndi humbula uri a tho ngo sumbedza kha tshithu na tshithihi arali ndi wa vhuimo ha fhasi kha vhaapostola vhaṋu vhavhuḓi.
6 Fhedzi naho ndi si na vhukoni ha u amba, a tho ngo ralo kha nḓivho; fhedzi ro zwi bvisela khagala kha inwi nga nḓila dzoṱhe kha zwithu zwoṱhe.
7 Kana naa ndo ita tshivhi nga u ḓiṱukufhadza uri inwi ni huliswe, ngauri ndo takalela u ni ḓivhadza mafhungo maḓifha ndi sa bviselwi tshithu?
8 Ndi nga ndo fhura zwiṅwe zwivhidzo nga u ṱanganedza thuso uri ndi ni shumele;
9 musi ndi na inwi ndo vha na zwine nda zwi shaya, fhedzi a tho ngo vha muhwalo kha muthu naho e ufhio, ngauri vhahashu vha bvaho Makedonia vho nthusa nga zwithu zwinzhi zwe nda vha ndi tshi zwi shaya. Ndo lingedza nga nḓila dzoṱhe uri ndi si vhe muhwalo kha inwi nahone ndi ḓo bvela phanḓa ndi tshi ita nga u ralo.
10 Samusi ndi mutevheli wa Kristo, a hu na tshine tsha ḓo nthivhela u zuwa nga ha zwenezwi madzinguni oṱhe a Axaya.
11 Nga tshiitisi tshifhio? Naa ndi ngauri a thi ni funi? Mudzimu u a zwi ḓivha uri ndi a ni funa.
12 Zwine nda khou zwi ita ndi ḓo ḓi bvela phanḓa ndi tshi zwi ita, uri ndi fhumudze vhane vha zuwa vha ri vha vhaapostola u fana na riṋe.
13 Ngauri vhathu vho raloho ndi vhaapostola vha mazwifhi, ndi vhafhuri, vhane vha ḓiita vhaapostola vha Kristo.
14 A zwi mangadzi, ngauri na Sathane ene muṋe u dzula a tshi ḓiita muruṅwa wa tshedza.
15 Nga zwenezwo, a zwi mangadzi arali na vhaḓinḓa vhawe na vhone vha tshi ḓiita vhaḓinḓa vha u luga. Fhedzi zwine zwa ḓo itea khavho mafheleloni zwi ḓo ya nga mishumo yavho.
16 Ndi dovha nda ri: Hu songo vha na ane a humbula u nga ndi tsilu. Arali ni tshi humbula nga u ralo, nṱanganedzeni sa tsilu, uri na nṋe ndi zuwe zwiṱuku.
17 Huno zwine nda zwi amba a zwi sumbedzi uri ndi tevhela tsumbo ya Murena, fhedzi ndi amba sa muthu wa tsilu ane a ḓifulufhela nga maanḓa.
18 Samusi vhanzhi vha tshi khou zuwa u ya nga lwa ṋama, na nṋe ndi ḓo zuwa.
19 Samusi ni tshi ḓiita vho “ṱalifhaho,” no takalela u konḓelela matsilu.
20 Zwi re zwone ndi uri ni konḓelela muṅwe na muṅwe ane a ni ita dziphuli, muṅwe na muṅwe ane a ni fhura, muṅwe na muṅwe ane a ni dzhiela zwine na vha nazwo, muṅwe na muṅwe ane a ḓihudza, na muṅwe na muṅwe ane a ni rwa tshifhaṱuwo.
21 Zwi a ri shonisa u zwi amba, samusi zwi tshi vhonala u nga ro ita zwithu nga nṱhani ha u vha na vhushayanungo.
Fhedzi arali vhaṅwe vho ita zwithu nga tshivhindi—ndi amba sa tsilu—na nṋe ndi ita zwithu nga tshivhindi.
22 Naa ndi Vhaheberu? Na nṋe ndi ene. Naa ndi Vhaisiraele? Na nṋe ndi ene. Naa ndi vha mbeu ya Abrahamu? Na nṋe ndi wa mbeu yawe.
23 Naa ndi vhaḓinḓa vha Kristo? Ndi fhindula sa muthu o ṱanganaho ṱhoho, ndi a vha fhira vhoṱhe: Ndo ita mushumo munzhi, ndo valelwa dzhele lunzhi, ndo rwiwa lunzhi, ndi lunzhi ndi tshi ṱoḓou fa.
24 Ndo rwiwa luṱanu nga Vhayuda ṱhamu dza furaru-ṱahe (39),
25 ndo rwiwa luraru nga ṱhamu, ndo kanḓwa nga matombo luthihi, ndo pwashetshelwa nga tshikepe luraru, ndo fhedza vhusiku na masiari ndi lwanzheni;
26 ndo vha ndi tshi dzula ndi nyendoni, ndi khomboni milamboni, ndi khomboni dza mavemu, ndi khomboni kha vhathu vha lushaka lwa hashu, ndi khomboni ya dziṅwe tshaka, ndi khomboni miḓini, ndi khomboni sogani, ndi khomboni lwanzheni, ndi khomboni kha vhahashu vha mazwifhi,
27 kha u shumesa na u ḓinetisa, ndi tshi fhedza vhusiku vhunzhi ndi sa eḓeli, ndi na nḓala na ḓora, zwifhinga zwinzhi ndi si na zwiḽiwa, ndi phephoni, ndi si na zwiambaro.
28 Nga nnḓa ha zwenezwo zwithu zwe nda sedzana nazwo, hu na zwine zwa ntsikeledza ḓuvha ḽiṅwe na ḽiṅwe, zwine zwa vha u vhilaelela zwivhidzo zwoṱhe.
29 Ndi nnyi ane a shaya nungo, nṋe ndi si shaye-vho? Ndi nnyi ane a khukhuliswa, nṋe ndi si sinyuwe?
30 Arali ndi tshi fanela u zuwa, ndi ḓo zuwa nga zwithu zwine zwa sumbedza vhushayanungo hanga.
31 Mudzimu ane a vha Khotsi a Murena Yesu, Ene ane a fanelwa u rendwa lini na lini, u a ḓivha uri a thi khou zwifha.
32 Muvhusi a re nga fhasi ha khosi Areta o vha o linda muḓi wa Damaseko uri a mpfare,
33 fhedzi nda tsitswa nga fasiṱere ḽa muḓi ndi nga ngomu ha tshirundu, nda ponyoka zwanḓani zwawe.
Ṱhaluso dzi re magumoni a siaṱari
^ Ipfi ḽa Lugerika ḽi ambela kha muthu wa tshisadzini a sa athu ita zwa vhudzekani.
