2 Vhakorinta 12:1-21
12 Ndi fanela uri ndi zuwe. A zwi vhuyedzi; fhedzi ndi ḓo fhirela phanḓa kha mabono na u dzumbululelwa nga Murena.
2 Ndi ḓivha muthu a re na vhuthihi na Kristo we miṅwahani ya fumi-iṋa (14) yo fhiraho a iswa kha ḽiṱaḓulu ḽa vhuraru. A thi ḓivhi arali o ya nga muvhili wa ṋama kana a songo ya ngawo.
3 Onoyo muthu ndi a mu ḓivha—a thi ḓivhi arali o ya nga muvhili wa ṋama kana a songo ya ngawo, ane a zwi ḓivha ndi Mudzimu—
4 uri onoyo muthu o iswa paradisoni a pfa maipfi ane a si kone u ambiwa na ane a si tendelwe uri muthu a a ambe.
5 Ndi ḓo zuwa nga onoyo muthu, fhedzi a thi nga zuwi nga nṋe muṋe, nga nnḓa ha uri ndi zuwe nga vhushayanungo hanga.
6 Naho ndi tshi ṱoḓa u zuwa, a thi nga ḓo vha tsilu, ngauri ndi ḓo vha ndi tshi khou amba ngoho. Fhedzi a thi iti nga u ralo, uri hu si vhe na ane a nkhoḓa u fhira zwine a zwi vhona kana u zwi pfa nga nṋe,
7 nga nṱhani ha uri ndo dzumbululelwa nga yeneyo nḓila i mangadzaho.
Nga zwenezwo, uri ndi sa ḓo ḓihudza lwo kalulaho, ndi na mupfa ṋamani, ndi muruṅwa wa Sathane, ane a dzula a tshi nthwa uri ndi si ḓikukumuse nga nḓila yo kalulaho.
8 Ngauralo, ndo humbela Murena luraru malugana na zwenezwi, uri a u vangule;
9 fhedzi a amba na nṋe a ri: “Vhuthu hanga vhuhulu ho u eḓana; ngauri maanḓa anga a vhonala tshoṱhe kha a shayaho nungo.” Ngauralo, ndi ḓo takala musi ndi tshi zuwa nga vhushayanungo hanga, uri maanḓa a Kristo a ntsireledze u fana na dennde.
10 Nga zwenezwo, ndi a takala musi ndi tshi shaya nungo, ndi tshi semiwa, zwifhingani zwa musi ndi tshi shaya, ndi tshi tovholwa na u ṱangana na zwi konḓaho nga nṱhani ha Kristo. Ngauri musi ndi tshi shaya nungo, ndi hone ndi tshi vha na maanḓa.
11 Ndo mbo ḓi vha tsilu. No nkombetshedza u ita nga u ralo, ngauri ndo vha ndo tea u themendelwa nga inwi. Ngauri a tho ngo sumbedza kha tshithu na tshithihi arali ndi wa vhuimo ha fhasi kha vhaapostola vhaṋu vhavhuḓi, naho ndi si tshithu.
12 Vhukuma, ndo ni sumbedza vhuṱanzi ha uri ndi muapostola, nga zwiga na nga zwithu zwi mangadzaho na nga mishumo ya maanḓa ndi sa fheli mbilu.
13 Ndi nga nḓila ifhio ye na si vhe na ndugelo i fanaho na ya zwiṅwe zwivhidzo, nga nnḓa ha uri a tho ngo vha muhwalo waṋu? Nkhangweleni honovhu vhukhakhi.
14 Ndi lwa vhuraru ndo lugela u ḓa ha inwi, huno a thi nga ḓo vha muhwalo. Ngauri a thi khou ṱoḓa thundu dzaṋu, fhedzi ndi khou ṱoḓa inwi; ngauri vhana a vha lavhelelwi uri vha vhulungele vhabebi vhavho, fhedzi vhabebi vha tea u vhulungela vhana vhavho.
15 A vha nṋe ndi ḓo shumisa zwoṱhe zwine nda vha nazwo ndi tshi itela inwi. Arali ndi tshi ni funa nga maanḓa, naa ndo tewa nga u funwa zwiṱuku?
16 Naho zwa vha nga yeneyo nḓila, a tho ngo vha muhwalo kha inwi. Naho zwo ralo, inwi ni ri, ndo ni “fhura” na uri ndo ni fasha “nga vhukwila.”
17 Naa ndo ni fhura nga u shumisa muṅwe wa vhe nda vha ruma kha inwi?
18 Ndo ṱuṱuwedza Tito nahone nda mu ruma khathihi na wahashu. Naa Tito o vhuya a ni fhura? Naa a ro ngo sumbedza uri ri na vhuthihi? Naa a ro ngo ita zwithu nga nḓila i fanaho?
19 Naa tshifhinga tshoṱhe no vha ni tshi khou humbula uri ri khou tou ḓiimelela kha inwi? Ri khou amba phanḓa ha Mudzimu samusi ri vhatevheli vha Kristo. Zwoṱhe zwine ra ita, ri itela u fhaṱa inwi vhafunwa.
20 Ngauri ndi a ofha uri khamusi ndi tshi swika, a thi nga ḓo ni wana ni nga nḓila ye nda vha ndo lavhelela ngayo, na mavhonele anga a ḓo vha o fhambana na e na a lavhelela, fhedzi nṱhani hazwo, hu na dzinndwa, vivho, u sinyuwa, dziphambano, zwitshele, u solana, vhaṅwe vha a ḓikukumusa na u vusa dzikhakhathi.
21 Khamusi ndi tshi dovha nda ḓa ha inwi, Mudzimu wanga u ḓo ntshonisa phanḓa haṋu, nahone nda fanela uri ndi lilele vhe vha vha vha tshi ita zwivhi, fhedzi vha sa athu rembuluwa kha vhuḓifari havho vhu si havhuḓi, vhupombwe, na u ḓifara nga nḓila i shonisaho zwe vha vha vha tshi dzulela u zwi ita.
