2 Vhakorinta 13:1-14
13 Holwu ndi lwa vhuraru ndi tshi ḓa ha inwi. “Mafhungo oṱhe a khwaṱhiswa nga u ambiwa nga milomo ya ṱhanzi mbili kana tharu.”
2 Naho ndi si na inwi zwa zwino, zwi tou nga ndo vha ndi na inwi lwa vhuvhili, nahone ndi dovha nda sevha vhe vha ita tshivhi tshifhingani tsho fhiraho na vhaṅwe vhoṱhe, uri arali nda dovha nda ḓa ndi nga si litshe u vha kaidza,
3 samusi ni tshi khou ṱoḓa vhuṱanzi ha uri Kristo, ane a si vhe na vhushayanungo kha inwi, fhedzi ane a vha na maanḓa kha inwi u khou amba a tshi shumisa nṋe.
4 Ndi ngoho uri o ombelwa kha danda nga nṱhani ha vhushayanungo, fhedzi u a tshila nga nṱhani ha maanḓa a Mudzimu. Zwiṅwe hafhu, ndi ngoho uri ri na vhushayanungo samusi na ene o vha e na vhushayanungo, fhedzi ri ḓo tshila khathihi nae ngauri maanḓa a Mudzimu a kha inwi.
5 Ni dzule ni tshi ḓiṱolisisa uri ni ḓivhe arali ni tshee no farelela kha lutendo, ni dzule ni tshi sumbedza zwine na vha zwone. Kana naa a ni zwi ḓivhi uri Yesu Kristo u na vhuthihi na inwi? Nga nnḓa ha musi ni sa takalelwi.
6 Ndi fulufhela vhukuma uri ni ḓo zwi ṱhogomela uri ri a takalelwa.
7 Huno ri rabela Mudzimu uri ni sa ite tshithu na tshithihi tsho khakheaho, hu si uri riṋe ri vhonale ri tshi takalelwa, fhedzi uri inwi ni ite zwo lugaho, naho riṋe ri tshi vhonala ri sa takalelwi.
8 Ngauri ri nga si kone u ita tshithu na tshithihi uri ri lwisane na ngoho, fhedzi ri lwela ngoho.
9 Ri a takala tshifhinga tshoṱhe musi ri na vhushayanungo, fhedzi inwi ni na maanḓa; zwenezwi ndi zwine ra khou zwi rabelela, uri ni dovhe ni khakhululwe mahumbulele aṋu.
10 Ndi ngazwo ndi tshi ni ṅwalela eneo mafhungo ndi siho henefho, uri musi ndi henefho, ndi si shumisese maanḓa anga e Murena a nṋea one a u fhaṱa, hu si a u thutha.
11 Vhahashu, bvelani phanḓa ni tshi takala, ni tshi dovha na dzudzanya mihumbulo yaṋu, ni tshi khuthadzwa, ni na muhumbulo muthihi, ni tshi tshila nga mulalo; nahone Mudzimu wa lufuno na wa mulalo u ḓo vha na inwi.
12 Ni lumelisane nga khisi khethwa.*
13 Vhakhethwa vhoṱhe vha a ni lumelisa.
14 Inwi noṱhe ni vhe na vhuthu vhuhulu ha Murena Yesu Kristo na lufuno lwa Mudzimu na muya mukhethwa zwine zwa ni vhuyedza sa tshivhidzo.
Ṱhaluso dzi re magumoni a siaṱari
^ Yeneyo ndi nḓila ye Vhakriste vha vha vha tshi lumelisana ngayo musi vha tshi ṱangana.
