2 Vhakorinta 2:1-17
2 Ngauri ndo ita phetho ya uri ndi si dovhe nda ḓa ha inwi nda ni ṱungufhadza.
2 Arali ndi tshi ni ṱungufhadza, ndi nnyi ane a ḓo ntakadza arali hu si onoyo we nda mu ṱungufhadza?
3 Ndo ṅwala zwe nda zwi ita uri musi ndi tshi ḓa ndi si ṱungufhadze vhane nda fanela u vha takadza; ngauri ndi na vhungoho ha uri zwine zwa ntakadza zwi takadza inwi noṱhe.
4 Ndo ni ṅwalela ndi tshi khou pfa vhuṱungu vhuhulu na u tsikeledzea ndi tshi khou tsengisa miṱodzi, hu si u itela u ni ṱungufhadza, fhedzi hu uri ndi sumbedze nḓila ine nda ni funa ngayo.
5 Huno arali hu na muthu we a ṱungufhadza muṅwe, u vha a songo ṱungufhadza nṋe, fhedzi u vha o ṱungufhadza inwi noṱhe—ngauri a tho ngo ḓiimisela u shumisa maipfi ane a ṱhavha kha zwine nda zwi amba.
6 Yeneyi ndayo yo ṋewaho nga vhunzhi haṋu yo eḓana muthu o raloho,
7 nṱhani hazwo, ni fanela uri ni mu hangwele na u mu khuthadza, uri onoyo muthu a si tsikeledzwe nga vhuṱungu ho kalulaho.
8 Nga zwenezwo, ndi khou ni ṱuṱuwedza uri ni mu sumbedze lufuno.
9 Ndi ngazwo ndo ni ṅwalela uri ndi vhone arali ni tshi ḓo sumbedza uri ni a thetshelesa kha zwithu zwoṱhe.
10 Arali ni tshi hangwela muṅwe muthu vhukhakhi naho vhu vhufhio, na nṋe ndi a mu hangwela. Zwi re zwone ndi uri kha zwoṱhe zwe nda hangwela (arali hu na zwe nda hangwela khazwo) ho vha uri ndi vhuyedze inwi phanḓa ha Kristo,
11 uri ri si fhurwe nga Sathane, ngauri ri a ḓivha vhukwila hawe.
12 Musi ndi tshi swika ngei Tiroasi uri ndi ḓivhadze mafhungo maḓifha nga ha Kristo, ndo wana uri Murena o mvulela muṋango tshumeloni yawe,
13 ndo vha ndi songo vhofholowa ngauri a tho ngo wana wahashu Tito. Ngauralo, nda onesana navho nda ya Makedonia.
14 Fhedzi ri livhuha Mudzimu ane a bvela phanḓa a tshi ri ranga phanḓa musi ri tshi tshimbila na Kristo kha gundo, ngauri nḓivho yawe i nga munukhelelo nahone ri phaḓaladza yeneyo nḓivho huṅwe na huṅwe nga mushumo washu.
15 Ngauri kha Mudzimu ri munukhelelo wa Kristo vhukati ha vhane vha ḓo tshidzwa na vhukati ha vhane vha ḓo fheliswa;
16 kha vhane vha ḓo fheliswa ri munukho u isaho lufuni, kha vhane vha ḓo tshidzwa ri munukhelelo u isaho vhutshiloni. Nahone ndi nnyi ane a fanelea zwavhuḓi kha zwenezwi zwithu?
17 Ngauri a ri vhavhambadzi vha ipfi ḽa Mudzimu sa zwine vhathu vhanzhi vha vha zwone, fhedzi ri amba nga u fulufhedzea sa vho rumiwaho nga Mudzimu na Kristo.
