2 Vhakorinta 3:1-18
3 Naa zwi kha ḓi ṱoḓea uri ri dovhe ri ḓithemendele kha inwi? Kana naa ri ṱoḓa maṅwalo a uri ni ri themendele u fana na vhaṅwe vhathu?
2 Inwi ni vhurifhi hashu, ho ṅwalwaho mbiluni dzashu vhune ha ḓivhiwa na u vhalwa nga vhathu vhoṱhe.
3 Ngauri no sumbedza uri ni vhurifhi ha Kristo ho ṅwalwaho nga riṋe sa vhaḓinḓa, vhu songo ṅwalwaho nga ennge, fhedzi ho ṅwalwaho nga muya wa Mudzimu a tshilaho, hu si kha mbaba dza matombo, fhedzi kha mbaba dza ṋama mbiluni.
4 Huno nga Kristo ri na ḽeneḽi fulufhelo kha Mudzimu.
5 Hu si uri riṋe vhaṋe ri a fanelea zwavhuḓi uri ri elekanye uri a ri na tshithu tshi bvaho kha riṋe, fhedzi u fanelea hashu hu bva ha Mudzimu,
6 we a ita uri ri fanelee zwavhuḓi u vha vhaḓinḓa vha mulanga muswa, hu si vha mulayo wo ṅwalwaho, fhedzi vha muya; ngauri mulayo wo ṅwalwaho u haṱulela lufu, fhedzi muya u a tshidza.
7 Zwiṅwe hafhu, arali mulayo wo ṅwalwaho u tshi ḓisa lufu nahone wo ṅwalwaho kha matombo wo ḓa u na vhugala ho raloho, he vharwa vha Isiraele vha si kone u lavhelesa tshifhaṱuwo tsha Mushe nga nṱhani ha vhugala ha tshifhaṱuwo tshawe, vhugala he ha vha vhu tshi ḓo fhela,
8 ndi ngani u shululwa ha muya hu si na vhugala vhuhulwane?
9 Arali mulayo u ḓisaho khaṱulo wo vha na vhugala, vhugala vhu ḓisaho u luga vhu ḓo vha vhuhulwane lungafhani!
10 Zwi re zwone ndi uri zwe zwa vhuya zwa vha na vhugala a zwi tsha vha na vhugala nga nṱhani ha vhugala vhune ha zwi fhira.
11 Arali zwine zwa ḓo fheliswa zwo ḓa na vhugala, zwine zwa dzula zwi hone zwi ḓo vha na vhugala vhungafhani!
12 Ngauralo, samusi ri na fulufhelo ḽo raloho, ri na mbofholowo khulu ya u amba,
13 na u sa ita zwe Mushe a ita musi a tshi fukedza tshifhaṱuwo tshawe nga labi uri vharwa vha Isiraele vha si vhone zwine zwa ḓo itea kha zwine zwa ḓo fheliswa.
14 Fhedzi mihumbulo yavho yo vha yo tsilufhala. Ngauri u swika na ṋamusi zwifhaṱuwo zwavho zwi kha ḓi vha zwo fukedzwa nga labi musi hu tshi vhalwa mulanga wa kale, ngauri ḽi fukulwa nga Kristo fhedzi.
15 Zwi re zwone ndi uri u swika na ṋamusi, musi hu tshi vhalwa maṅwalo a Mushe, labi ḽi fukedza mbilu dzavho.
16 Musi muthu a tshi rembulutshela kha Yehova, labi ḽi a fukulwa.
17 Huno Yehova ndi Muya; hune ha vha na muya mukhethwa wa Yehova hu na mbofholowo.
18 Nahone riṋe roṱhe ri na zwifhaṱuwo zwi songo fukedzwaho nga labi, ri nga zwivhoni zwine zwa vhonetshela vhugala ha Yehova. Musi ri tshi ita nga u ralo, ri a shandulwa ra fana nae, ra ḓi vhonetshela vhugala ri tshi ya, sa zwine zwa itwa nga Yehova ane a vha Muya.
