2 Vhakorinta 4:1-18
4 Nga zwenezwo, samusi ri na vhuḓinḓa honovhu u ya nga he ra khathutshelwa ngaho, a ri neti;
2 fhedzi ro ṱutshela zwithu zwa vhufhura zwi shonisaho, ri si tshimbile nga vhukwila, kana u shanda ipfi ḽa Mudzimu, fhedzi ro ita uri ngoho i vhonale nga u ḓithemendela phanḓa ha Mudzimu ri tsumbo yavhuḓi kha luvalo lwa muthu muṅwe na muṅwe.
3 Arali mafhungo maḓifha ane ra a ḓivhadza o fukedzwa, o fukedzwa kha vhane vha khou ya u fheliswa,
4 vhenevho ndi vhe mudzimu wa ano maitele a zwithu a swingisa mihumbulo ya vha sa tendiho, uri u vhonetshela ha mafhungo maḓifha a vhugala nga ha Kristo, ane a vha tshifanyiso tsha Mudzimu, hu si vha vhonetshele.
5 Ngauri a ri khou huwelela nga ha riṋe vhaṋe, fhedzi ri khou huwelela nga ha Kristo Yesu ane a vha Murena, uri ri vhalanda vhaṋu ri tshi itela Yesu.
6 Ngauri Mudzimu ndi ene we a ri: “Tshedza kha tshi vhonetshele swiswini,” nahone o vhonetshela mbilu dzashu uri ri vhe tshedza kha vhenevho nga nḓivho ya vhugala ya Mudzimu a tshi shumisa tshifhaṱuwo tsha Kristo.
7 Naho zwo ralo, lwonolwo lupfumo ro lu fara nga midzio ya vumba, uri maanḓa a fhiraho o ḓoweleaho a vhe a Mudzimu hu si ashu.
8 Ri a tsikeledzea nga nḓila dzoṱhe, fhedzi a ri vhuimoni vhune ri si kone u bva khaho; ro hanganea, fhedzi hu si uri a ri na tshibuli tshine ra nga bva ngatsho;
9 ri a tovholwa, fhedzi a ro ngo laṱwa, ri a poselwa fhasi, fhedzi a ri lozwiwi.
10 Misi yoṱhe ri konḓelela u farwa nga tshiṱuhu mivhilini yashu u fana na nḓila ye Yesu a konḓelela ngayo, uri vhutshilo ha Yesu na hone vhu vhonale mivhilini yashu.
11 Ngauri riṋe vhane ra khou tshila, tshifhinga tshoṱhe ri sedzana na lufu nga ṅwambo wa Yesu, uri vhutshilo ha Yesu vhu vhonale mivhilini yashu i faho.
12 Nga nṱhani ha zwenezwo, riṋe ro sedzana na lufu, fhedzi inwi no sedzana na u wana vhutshilo.
13 Ngauri ri na lutendo lu fanaho na lwe ha ṅwalwa ngalwo ha pfi: “Ndi na lutendo, ndi ngazwo ndi tshi amba,” na riṋe ri na lutendo ndi ngazwo ri tshi amba,
14 ri a zwi ḓivha uri we a vusa Yesu u ḓo dovha a vusa na riṋe khathihi na Yesu nahone a ri ḓisa roṱhe na inwi.
15 Ngauri zwenezwi zwithu zwoṱhe zwo itelwa inwi, uri vhuthu vhuhulu vhu ḓi engedzea vhu tshi ya ngauri vhanzhi vha livhuha vhugala ha Mudzimu.
16 Nga zwenezwo, a ri neti, fhedzi naho muthu wa nga nnḓa a tshi khou ṱahala, ngoho ndi ya uri muthu ane ra vha ene nga ngomu u dzula a tshi vusuluswa ḓuvha ḽiṅwe na ḽiṅwe.
17 Ngauri naho vhuṱungu vhu ha tshifhinganyana nahone vhu vhuṱuku, vhu ri ḓisela vhugala vhuhulu vhune ha ḓi engedzea vhu tshi ya nahone ndi ha tshoṱhe;
18 ri sa humbuli nga ha zwithu zwine ra zwi vhona, fhedzi ri tshi humbula nga ha zwithu zwi sa vhonali. Ngauri zwithu zwine zwa vhonala ndi zwa tshifhinganyana, fhedzi zwithu zwi sa vhonali ndi zwa tshoṱhe.
