2 Vhakorinta 5:1-21
5 Ngauri ri a zwi ḓivha uri arali nnḓu yashu i re kha ḽifhasi, heyi dennde, i tshi fanela u thuthwa, ri ḓo vha na tshifhaṱo tshi bvaho ha Mudzimu, nnḓu i songo fhaṱwaho nga zwanḓa, ya lini na lini ngei ṱaḓulu.
2 Ngauri kha yeneyi nnḓu ri a gomela, ri tama zwi tshi bva mbiluni u wana yashu i bvaho ṱaḓulu,
3 uri musi ro i ambara, ri si wanwe ri fhedzi.
4 Zwi re zwone ndi uri riṋe vhane ra vha kha ḽeneḽi dennde ri a gomela, ro tsikeledzea; ngauri a ri ṱoḓi u ḽi bvula, fhedzi ri ṱoḓa u ambara ḽiṅwe, uri zwi faho zwi dzhielwe vhudzulo nga vhutshilo.
5 Huno we a ri lugiselela zwenezwi zwithu ndi Mudzimu, we a ri ṋea muya wawe sa tshiga tsha zwine zwa ḓo ḓa.
6 Nga zwenezwo, ri na vhungoho ha zwenezwi uri naho ri na haya hashu muvhilini, ri kule na Murena,
7 ngauri ri tshimbila nga lutendo, hu si nga u vhona.
8 Fhedzi a ri timatimi nahone ro vha ri tshi ḓo takalela u vha kule na muvhili na u fhaṱa haya hashu na Murena.
9 Nga zwenezwo, hu sa londwi uri ri dzula nae kana ri kule nae, ro ḓiimisela u ṱanganedzwa ngae.
10 Ngauri roṱhe ri ḓo ima phanḓa ha tshidulo tsha Kristo tsha khaṱulo, uri muṅwe na muṅwe a wane malamba awe u ya nga zwithu zwe a zwi ita muvhilini, hu sa londwi uri ndi zwivhuya kana ndi zwivhi.
11 Ngauralo, samusi ri tshi ṱhogomela uri ri fanela u ofha Murena, ri dzula ri tshi gudisa vhaṅwe uri vha tende, fhedzi ro itwa uri ri vhonale phanḓa ha Mudzimu. Naho zwo ralo, ndi fulufhela uri mvalo dzaṋu dzo ni thusa uri ni pfesese nḓila ine ra vha ngayo.
12 Ngauri a ri khou dovha ra ḓithemendela kha inwi, fhedzi ri khou ni ṋea tshiitisi tsha u zuwa nga riṋe, uri ni kone u fhindula vhane vha zuwa nga ha mbonalo ya nga nnḓa, fhedzi hu si nga zwine zwa vha mbiluni.
13 Arali ro vha ro ṱangana ṱhoho, ro vha ri tshi ḓo vha ri tshi khou itela Mudzimu; arali ri na muhumbulo wo tshaho, ri khou itela inwi.
14 Lufuno lwa Kristo lu a ri kombetshedza, ngauri zwenezwi ndi zwe ra phetha ngazwo, uri muthu muthihi o ri fela roṱhe; nga zwenezwo, vhoṱhe vho fa;
15 nahone o fela vhoṱhe uri vhoṱhe vha tshilaho vha si tsha ḓitshilela, fhedzi vha tshilele we a vha fela nahone a vuswa.
16 Nga nṱhani ha zwenezwo, u bva zwino a ri tsha ḓivha muthu u ya nga mavhonele a vhathu. Naho ro vhuya ra ḓivha Kristo nga lwa ṋama, vhukuma a ri tsha mu ḓivha nga yeneyo nḓila.
17 Nga zwenezwo, arali muthu e na vhuthihi na Kristo, u vha tshivhumbwa tshiswa; zwa kale zwo fhira, huno ho bvelela zwiswa.
18 Fhedzi zwithu zwoṱhe zwi bva ha Mudzimu, ene we a ri pfumedzanya nae nga Kristo na u ri ṋea vhuḓinḓa ha u pfumedzanya,
19 zwa uri Mudzimu o ḓipfumedzanya na shango a tshi shumisa Kristo, a si vhalele vhutshinyi havho. O ri ṋea mushumo wa u vhudza vhathu uri vha nga pfumedzana na Mudzimu.
20 Nga zwenezwo, ri vhaimeli vha Kristo, zwa nga Mudzimu u humbela a tshi shumisa riṋe. Samusi ri vhaimeli vha Kristo, ri humbela uri: “Pfumedzanani na Mudzimu.”
21 We a vha a sa ḓivhi tshivhi a mu ita tshiṱhavhelo a tshi itela zwivhi zwashu, uri ngae ri vhe vho lugaho phanḓa ha Mudzimu.
