2 Vhakorinta 6:1-18
6 Ri shumisana nae, ri dovha ra ni ṱuṱuwedza uri ni ṱanganedze vhuthu vhuhulu ha Mudzimu nahone ni si xelelwe nga ndivho yaho.
2 Ngauri o amba a ri: “Ndo ni pfa nga tshifhinga tshi ṱanganedzeaho, ndo ni thusa nga ḓuvha ḽa u tshidzwa.” Huno ndi tshifhinga tshi ṱanganedzeaho nga ho khetheaho. Ndi ḓuvha ḽa u tshidzwa.
3 A ri khou ni khukhulisa nga nḓila naho i ifhio, uri vhuḓinḓa hashu vhu si solisee;
4 fhedzi ri a ḓithemendela sa vhaḓinḓa vha Mudzimu nga nḓila dzoṱhe, nga u konḓelela vhukuma, nga maṱungu, nga zwifhinga zwine ra shaya, nga zwifhinga zwi konḓaho,
5 ri tshi rwiwa, ri tshi valelwa dzhele, ri tshi itelwa khakhathi, ri tshi shuma nga maanḓa, ri tshi fhedza vhusiku ri sa eḓeli, nga zwifhinga zwa musi ri si na zwiḽiwa,
6 nga u tshila nga nḓila yo kunaho, nga u vha na nḓivho, nga u konḓelela, nga u vha na vhuthu, nga u vha na muya mukhethwa, nga u vha na lufuno lu si na muhoyo,
7 nga u amba nga u fulufhedzea, nga maanḓa a Mudzimu; nga u fara zwihali zwa u luga tshanḓani tsha u ḽa na tsha monde,
8 nga u rendwa na u nyadzwa, nga mivhigo i si yavhuḓi na yavhuḓi; nga u farwa sa vhafhuri ngeno ri tshi fulufhedzea,
9 ri tshi dzhiiwa sa vhane vha si ḓivhiwe, ngeno ri tshi ḓivhiwa, ri tshi dzhiiwa ro tewa nga lufu, ngeno ri tshi tshila, ri tshi rwiwa, fhedzi ri si fe,
10 ri tshi dzhiiwa sa vho ṱungufhalaho ngeno ro takala, sa vha shayaho, fhedzi ri tshi pfumisa vhanzhi, ri tshi dzhiiwa sa vha si na tshithu ngeno ri na zwithu zwoṱhe.
11 Inwi Vhakorinta, ro amba na inwi nga u fulufhedzea hoṱhe, ro ni vulela mbilu dzashu.
12 A ro ngo litsha u ni sumbedza lufuno, fhedzi ndi inwi ni songo ri sumbedzaho lufuno.
13 Ndi amba na inwi vhunga vhana vhanga, ni ri fare nga nḓila ye ra ni fara ngayo, ni ṱanḓavhudze lufuno lu re mbiluni dzaṋu.
14 Ni songo ḓikungela dzhogo na vha sa tendiho. Ngauri u luga na vhutshinyi zwi na vhushaka-ḓe? Kana tshedza na swiswi zwi ṱangana’fhi?
15 Zwiṅwe hafhu, Kristo na Sathane* vha nga anḓana nga nḓila-ḓe? Kana muthu a fulufhedzeaho u na vhushaka-ḓe na muthu ane a si vhe mutendi?
16 Thembele ya Mudzimu na midzimu ya zwifanyiso zwi tendelana ngafhi? Ngauri ri thembele ya Mudzimu a tshilaho; samusi Mudzimu o amba a ri: “Ndi ḓo dzula vhukati havho, nda tshimbila vhukati havho, ndi ḓo vha Mudzimu wavho, vhone vha ḓo vha vhathu vhanga.”
17 “Yehova u ri: ‘Ibvani vhukati havho, ni ḓifhambanye navho, ni songo fara naho tshi tshini tshi songo kunaho, ndi ḓo ni ṱanganedza.’”
18 “‘Ndi ḓo vha khotsi aṋu, inwi ni ḓo vha vharwa na vhananyana vhanga,’ Yehova Ramaanḓaoṱhe u ralo.”
Ṱhaluso dzi re magumoni a siaṱari
^ Kana “Beliali.”
