2 Vhakorinta 7:1-16
7 Vhafunwa, samusi ri na zwenezwo zwe ra fulufhedziswa, kha ri ṱambe tshika dzoṱhe dza ṋama na dza muya, uri ri vhe vhakhethwa nga ho engedzeaho musi ri tshi ofha Mudzimu.
2 Ri ṱanganedzeni. A ro ngo khakhela muthu, a ro ngo vhaisa muthu, a ro ngo fhura muthu u itela u ḓivhuyedza.
3 A thi khou zwi ambela u itela u ni vhona mulandu. Ngauri ndo amba hu tshee nga phanḓa, ni mbiluni dzashu uri ri fe na u tshila roṱhe.
4 Ndi na mbofholowo khulwane ya u amba na inwi. Ndi zuwa zwihulu nga inwi. Ndo khuthadzwa zwihulu, ndi tou fhufhuma nga dakalo vhuṱunguni hashu hoṱhe.
5 Zwi re zwone ndi uri musi ri tshi swika Makedonia, mivhili yashu a yo ngo awela, ro dzula ri tshi tambudzwa nga nḓila dzoṱhe—ho vha hu na dzinndwa nnḓa ha tshivhidzo, na nyofho tshivhidzoni.
6 Naho zwo ralo, Mudzimu ane a khuthadza vho tsikeledzeaho, o ri khuthadza nga u vha hone ha Tito;
7 hu si nga u vha hone hawe fhedzi, fhedzi na nga u khuthadzwa nga inwi, musi a tshi ri vhudza uri no nṱuvha, uri no ṱungufhala zwihulu, na uri ni khou mbilaelela; nahone zwenezwo zwo ita uri ndi takale zwihulu.
8 Naho ndo ni ṱungufhadza nga vhurifhi hanga, a thi ḓisoli. Naho ndo vhuya nda ḓisola, (ndi a zwi vhona zwauri honoho vhurifhi ho ni ṱungufhadza lwa tshifhinganyana,)
9 huno ndi a takala, hu si ngauri no ṱungufhala, fhedzi ngauri u ṱungufhala haṋu ho ita uri ni rembuluwe. Ngauri no vha no ṱungufhala nga nḓila ine ya takadza Mudzimu. Ndi ngazwo zwe ra ni vhudza zwone zwi songo ni vhaisa.
10 Ngauri u ṱungufhala nga nḓila ine ya takadza Mudzimu zwi ita uri ni rembuluwe ni tshidzwe, a zwi iti uri hu vhe na u ḓisola; fhedzi u ṱungufhala ha shango hu isa lufuni.
11 U ṱungufhadzwa haṋu nga nḓila ine ya takadza Mudzimu ho bveledza u ḓiimisela haṋu huhulwane, u sumbedza uri a ni na mulandu, u sinyuwa, nyofho, lutamo lu bvaho mbiluni, u fhisea, u lugisa zwo khakheaho! Kha masia oṱhe no sumbedza uri no kuna.
12 Naho ndo ni ṅwalela, a tho ngo ṅwalela we a khakha, kana we a khakhelwa, uri u ḓiimisela haṋu ni tshi itela riṋe hu vhonale vhukati haṋu, Mudzimu a tshi zwi vhona.
13 Ndi ngazwo ro khuthadzwa.
Naho zwo ralo, nga nnḓa ha u khuthadzwa hashu, ro dovha ra takadzwa zwihulu nga u vhona Tito o takala, ngauri inwi noṱhe no mu homolosa.
14 Arali ndo mu zuwela nga ha inwi, a no ngo ntshonisa; samusi zwithu zwoṱhe zwe ra ni vhudza zwi ngoho, na zwe ra zuwela Tito zwo vha zwi ngoho.
15 Zwiṅwe hafhu, nḓila ine a ni funa ngayo i a engedzea musi a tshi humbula u thetshelesa haṋu noṱhe, na nḓila ye na mu ṱanganedza ngayo nga nyofho na u tetemela.
16 Ndi a takala nga nḓila dzoṱhe ngauri ndi a ṱuṱuwedzea nga nṱhani haṋu.
