2 Vhakorinta 8:1-24
8 Vhahashu, ri ṱoḓa ni tshi ḓivha nga ha vhuthu vhuhulu ha Mudzimu he zwivhidzo zwa Makedonia zwa ṋewa hone,
2 nga tshenetsho tshifhinga tsha mulingo muhulwane musi vha tshi khou tambudzwa, dakalo ḽavho ḽihulwane na vhushai havho vhuhulwane zwo ita uri u vha havho na mafunda zwi engedzee.
3 Ngauri vho ita nga hune vha nga kona ngaho, ndi khwaṱhisedza zwenezwo, vho ita zwi fhiraho zwine vha zwi kona,
4 vho vha vha tshi dzulela u ri humbela uri vha wane ndugelo ya u ṋeela na u ṱanganela kha u thusa vhakhethwa.
5 Nahone vho ita zwi fhiraho zwe ra vha ro zwi lavhelela, vho thoma nga u ḓikumedza kha Murena na kha riṋe u ya nga u funa ha Mudzimu.
6 Zwenezwo zwo ita uri ri ṱuṱuwedze Tito uri a ṱhaphudze mushumo we a u thoma vhukati haṋu, une wa vha wa u kuvhanganya tshifhiwa tshaṋu tsha vhuthu tshe na tshi ṋea no takala.
7 Naho zwo ralo, zwoṱhe ni khou zwi ita zwavhuḓi. Lutendo lwaṋu lwo khwaṱha. Ni na vhukoni ha u amba. Nḓivho yaṋu yo engedzea. Ni khou ita vhuḓidini vhuhulwane kha zwoṱhe zwine na zwi ita. Ni funa vhaṅwe zwi tshi bva mbiluni nga nḓila ine ra ni funa ngayo. Ngavhe ni tshi bvela phanḓa ni tshi ṋea nga u ḓifunela.
8 A thi khou ni vhetshela mulayo, fhedzi ndi ṱoḓa ni tshi ṱhogomela u shumesa na u ḓiimisela ha vhaṅwe, na u linga lufuno lwaṋu arali lu lwa vhukuma.
9 Ngauri ni a ḓivha vhuthu vhuhulu ha Murena washu Yesu Kristo, uri naho o vha o pfuma, o vha mushai a tshi itela inwi uri ni pfume nga vhushai hawe.
10 Ndi khou ni vhudza mavhonele anga kha hezwi: enea mafhungo ndi a u ni vhuyedza, samusi ho no fhela ṅwaha no thoma wonoyo mushumo na u dovha na sumbedza lutamo lwa u ita wonoyo mushumo.
11 Huno ṱhaphudzani zwe na zwi thoma, uri u ḓiimisela haṋu u ita wonoyo mushumo hu khunyelele u ya nga zwine na vha nazwo.
12 Tshifhiwa tshine tsha bva mbiluni tshi a ṱanganedzwa vhukuma nga Mudzimu, ngauri Mudzimu u lavhelela uri muthu a ṋee zwine a nga kona, hu si zwine a si zwi kone.
13 Ngauri a thi ṱoḓi u ita uri vhutshilo ha vhaṅwe vhu leluwe, fhedzi haṋu vhu konḓe;
14 nga u linganyisela kha zwinzhi zwine na vha nazwo zwino ni nga thusa hune vha khou ṱahelelwa hone, uri zwinzhi zwine vha vha nazwo na zwone zwi thuse hune na khou ṱahelelwa hone, uri hu vhe na u linganyisela.
15 Vhunga ho ṅwalwa ha pfi: “Muthu a re na zwinzhi ho ngo vha na zwinzhi-zwinzhi, na muthu a re na zwiṱuku ho ngo vha na zwiṱuku-ṱuku.”
16 Ri livhuha Mudzimu we a ita uri Tito a ni vhilaelele u fana na riṋe,
17 ngauri o tenda u ṱuṱuwedzwa, a ḓiimisela u ḓa ha inwi nga u ḓifunela hawe.
18 Fhedzi ri khou mu ruma na wahashu ane a khoḓelwa mafhungo maḓifha zwivhidzoni zwoṱhe.
19 A si zwenezwo fhedzi, fhedzi o dovha a nangwa nga zwivhidzo uri a tshimbile na riṋe uri a ṋee tshenetshi tshifhiwa tsha vhuthu uri a rendise Murena na u sumbedza uri ro ḓiimisela u thusa vhaṅwe.
20 Nga zwenezwo, ri khou iledza uri muthu naho e ufhio a ri vhone mulandu malugana na miṋeelo ya mafunda ye ra ṋewa uri ri i phaḓaladze.
21 Ngauri ri “ṱhogomela zwithu zwoṱhe nga u fulufhedzea, hu si musi ri tshi vhonwa nga Yehova fhedzi, fhedzi na musi ri tshi vhonwa nga vhathu.”
22 Zwiṅwe hafhu, ri khou vha ruma na wahashu we a ita vhuḓidini vhuhulwane kha zwithu zwoṱhe, fhedzi zwino u ḓo ita vhuḓidini vhuhulwane vhu fhiraho he a vhu ita u thomani ngauri u a ni fulufhela vhukuma.
23 Arali hu na u timatima nga ha Tito, ndi khonani yanga na mushumisani na nṋe u itela u ni vhuyedza; kana arali hu na huṅwe u timatima nga vhahashu, ndi vhaapostola vha zwivhidzo vhane vha rendisa Kristo.
24 Ngauralo, vha sumbedzeni lufuno lwaṋu na zwi itaho uri ri zuwe nga ha inwi zwivhidzoni.
