2 Vhakorinta 9:1-15
9 Huno malugana na vhuḓinḓa ha vhakhethwa, a zwi tou vha zwa ndeme uri ndi ni ṅwalele,
2 ngauri ndi a ḓivha u ḓiimisela haṋu hune nda hu zuwa kha Vhamakedonia, uri Vhaaxaya vho no fhedza ṅwaha vho ḓilugisa, na uri u fhisea haṋu ho ṱuṱuwedza vhunzhi havho.
3 Fhedzi ndi khou rumela vhahashu, uri u zuwa hashu nga ha inwi malugana na zwenezwi hu si vhe ha fhedzi, uri ni dzule no ḓilugisa zwa vhukuma, samusi ndo amba uri ni ḓo ita nga u ralo.
4 Arali Vhamakedonia vha ḓa na nṋe nahone vha ni wana ni songo ḓilugisa, huno riṋe—ri si tsha amba inwi—ri ḓo farwa nga ṱhoni nge ra vha ro ni fulufhela.
5 Ngauralo, ndi vhona zwo tea u ṱuṱuwedza vhahashu uri vha ḓe kha inwi hu tshee na tshifhinga na uri ni lugise hu tshee nga phanḓa tshifhiwa tshe na fulufhedzisa, uri tshi vhonale tshi tshifhiwa tsha u ḓifunela hu si tsha u tou kombetshedzwa.
6 Fhedzi malugana na zwenezwi, ane a zwala zwiṱuku u ḓo kaṋa zwiṱuku; na ane a zwala zwinzhi u ḓo kaṋa zwinzhi.
7 Muṅwe na muṅwe nga a ite zwe a phetha mbiluni yawe, a songo zwi ita o ṱungufhala kana nga u tou kombetshedzea, ngauri Mudzimu u funa ane a ṋea o takala.
8 Zwiṅwe hafhu, Mudzimu u a kona u ita uri vhuthu hawe vhuhulu vhu engedzee kha inwi uri ni fushee tshifhinga tshoṱhe kha tshiṅwe na tshiṅwe, u itela uri ni vhe na zwinzhi zwi ṱoḓeaho u itela mushumo muṅwe na muṅwe wavhuḓi.
9 (Vhunga ho ṅwalwa ha pfi: “O ṋea zwifhiwa zwinzhi, o ṋea vhashai, u luga hawe hu ḓo dzula hu tshi humbulwa lini na lini.”
10 Huno ane a ṋea muzwali mbeu nga vhunzhi na tshinkwa tsha u ḽa u ḓo ni ṋea, a dovha a andisa mbeu ye na i zwala nahone u ḓo ni thusa uri ni kaṋe mvelelo dzavhuḓi mishumoni yaṋu yo lugaho.)
11 Kha zwithu zwoṱhe no wana phaṱhutshedzo uri ni ṋee nga mafunda nga nḓila dzo fhambanaho, zwe ra zwi ita zwo ṱuṱuwedza vhathu uri vha livhuhe Mudzimu;
12 ngauri vhuḓinḓa ha yeneyi tshumelo ya khagala a si ha u fusha zwishaiwa zwa vhakhethwa fhedzi, fhedzi zwi ḓo dovha zwa ḓisa ndivhuho nnzhi kha Mudzimu.
13 Nga nṱhani ha vhuṱanzi vhune ha ṋekedzwa nga honoho vhuḓinḓa, vha renda Mudzimu ngauri ni a ḓiṱukufhadza kha mafhungo maḓifha ane na a ḓivhadza nga ha Kristo, na nga uri miṋeelo yaṋu i sumbedza mafunda khavho na kha vhoṱhe;
14 nahone vha a ni rabelela ha Mudzimu, vha a ni funa nga nṱhani ha vhuthu vhuhulu he Mudzimu a ni sumbedza hone.
15 Nga ri livhuhe Mudzimu nge a ri ṋea tshenetshi tshifhiwa tsha fhedzi tshi sa vhambedzwi na tshithu.
