2 Vhathesalonika 2:1-17
2 Vhahashu, malugana na u vha hone ha Murena washu Yesu Kristo na u kuvhanganywa uri ri vhe nae, ri a ni humbela
2 uri ni songo ṱavhanya na dzinginyea kha mahumbulele aṋu kana u thithiswa nga maipfi o hevhedzwaho kana nga mulaedza wo ambiwaho kana nga vhurifhi he ha vha vhu tshi vhonala u nga vhu bva kha riṋe, malugana na uri ḓuvha ḽa Yehova ḽo swika.
3 Ni songo tenda muthu a tshi ni xedza nga nḓila naho i ifhio, ngauri ḽi nga si swike arali hu songo thoma ha vha na vhugunei na muthu muvhi a sa athu dzumbululwa, murwa ane a ḓo lozwiwa.
4 O ḓiimisela u hanedza nahone o ḓivhea nṱha ha muṅwe na muṅwe ane a vhidzwa u pfi “mudzimu” kana tshithu tshine tsha gwadamelwa, uri a dzule thembeleni ya Mudzimu, a tshi amba uri u mudzimu.
5 Naa a ni humbuli uri musi ndi tshi kha ḓi vha na inwi, ndo vha ndi tshi dzulela u ni vhudza zwenezwi zwithu?
6 Zwino ni a ḓivha tsho thivhelaho onoyo muthu uri a dzumbululwe nga tshifhinga tsho teaho.
7 Ndi ngoho uri tshiphiri tsha honovhu vhuvhi tsho no thoma u shuma; fhedzi tshi ḓo shuma u swika ane a khou tshi thivhela a si tsheeho.
8 Ngauralo, onoyo muthu muvhi u ḓo dzumbululwa, Murena Yesu u ḓo mu fhelisa nga mufemo u bvaho mulomoni wawe a si tsha vha hone nga u dzumbululwa ha u vha hone hawe.
9 Fhedzi u vha hone ha muthu muvhi ndi nga nṱhani ha Sathane nga mishumo yoṱhe ya maanḓa na zwiga na zwithu zwi mangadzaho zwa mazwifhi
10 na vhufhura hoṱhe ha vhane vha ḓo fheliswa, sa ndifhedzo ngauri a vho ngo ṱanganedza na u funa ngoho uri vha tshidzwe.
11 Ndi ngazwo Mudzimu a tshi tendela ṱhuṱhuwedzo ya vhufhura i tshi vha xedza, uri vha tende mazwifhi,
12 uri vhoṱhe vha haṱulwe ngauri a vho ngo tenda ngoho, fhedzi vho takalela u sa luga.
13 Naho zwo ralo, vhahashu vha funwaho nga Yehova, tshifhinga tshoṱhe ri a kombetshedzea u livhuha Mudzimu nga nṱhani haṋu, ngauri Mudzimu o ni nanga u bva mathomoni uri ni tshidzwe nga u ni ita vhakhethwa nga muya wawe na nga u tenda haṋu ngoho.
14 O ni vhidzela kha honoho u tshidzwa nga u huwelela hashu mafhungo maḓifha uri ni wane vhugala ha Murena washu Yesu Kristo.
15 Ngauralo vhahashu, imani no khwaṱha ni farelele kha zwe na funzwa zwone, hu sa londwi uri ndi nga mulaedza we na vhudzwa wone kana nga vhurifhi vhu bvaho kha riṋe.
16 Zwiṅwe hafhu, ngavhe Murena washu Yesu Kristo na Mudzimu Khotsi ashu, we a ri funa na u ri khuthadza nga hu sa fheli na u ri ṋea fulufhelo ḽavhuḓi nga vhuthu vhuhulu hawe,
17 a tshi ni khuthadza na u ni khwaṱhisa uri tshifhinga tshoṱhe ni ite na u amba zwithu zwavhuḓi.
